Türkmen alymlarynyň nobatdaky üstünligi

Türkmen alymlary ylmy gözleglerini üstünlikli alyp amala aşyrýarlar. Biz size Türkmenistanyň Ylymlar akademiýasynyň Tehnologiýalar merkeziniň alymlarynyň ýurdumyzyň ykdysady durmuşynda wajyp orun eýelejek ylmy makalalaryň çap edilmegi üçin ýörite saýty taýýarlandygyny hem-de Magtymguly Pyragynyň ähli goşgularynyň, onuň ömrüne we döredijiligine bagyşlanan makalalaryň ýerleşdirilmegi üçin niýetlenen portaly döredendiklerini habar beripdik.

Alymlar bu asylly maksatlary göz öňünde tutýan taýýarlamalarynyň üstünlikli durmuşa geçirilýändigini görkezýän ýene-de bir hoş habar gelip gowuşdy. Ýakynda bu açyşlaryň ikisini hem tassyklaýan patent gowşuryldy.

Magtymguly Pyragynyň döredijiligine bagyşlanan portal bu ýylyň mart aýynda taýýarlanylypdy. Portal Ylmy institularda, ýokary okuw jaýlarda ylmy gözlegleri alyp barýan talyp ýaşlarymyz, daşary ýurtly magtymgulyşynaslar, şahyryň döredijiligi bilen gyzyklanýanlar üçin döredilendir.

Tehnologiýalar merkeziniň alymlarynyň ýanwar aýynda taýýarlan elektron ylmy-amaly žurnaly hem halk içinde gyzgyn garşylandy. Bu programma arkaly alymlar ylmy makalalaryny žurnalyň redaksiýasyna iberip, öz penjiresiniň üsti bilen makalanyň ýagdaýy bilen tanşyp hem-de özüne degişli neşir edilen makalalaryň hasabyny ýöredip bilerler. Okyjylar bolsa žurnalyň arhiwinde bar bolan ylmy makalalary okap we göçürip alyp, ony peýdalanyp bilerler: https://journal.scitech.gov.tm/.