Halypa-şägirtlik ýoly – gadymdan gelýän ýörelge

Türkmenistanyň Oguz han adyndaky Inžener-tehnologiýalar uniwersitetiniň professor-mugallymlary we talyp ýaşlary bilen Türkmenistanyň Gahrymany, hormatly il ýaşulusy Saragt Babaýewiň we Türkmenistanyň halk artisti, hormatly il ýaşulusy Atageldi Garýagdyýewiň gatnaşmagynda halypa-şägirtlik ýoly dogrusynda duşuşyk geçirildi. Duşuşygyň dowamynda halypalar özüniň manyly ömri, döredijilikli zähmet ýoly dogrusynda talyp ýaşlara özleriniň maslahatlaryny berdiler. Uniwersitetde geçirilen duşuşykda halypa Atageldi Garýagdyýewiň şeýle hem “Oguzlar” döredijilik toparynyň ýerine ýetirmeginde ajaýyp aýdymlar we tanslar ýerine ýetirildi.

Halypa äpet bir daragta, şägirt onuň miwesine meňzedilýär. Halkymyzda «miweli daragt» düşünjesi, ilkinji nobatda, şägirt ýetişdirip bilýän halypalar hakynda söz açylanda has köp ýatlanylýar. Sebäbi, halypa-şägirtlik ýoly müňýyllyklardan gözbaş alyp gaýdýan milli ýörelgämiziň biridir. Her bir ynsan halypa görmezdenem, belli bir ýoly külterläp biler, emma halypalar has uzak menzillere ýetmäge güýç-gaýrat, ynam döredip bilýän ynsanlardyr. Uzak ýyllaryň dowamynda munuň netijeli ugurdygyna göz ýetiren pederlerimiz halypa-şägirtlik ýoluny ýörelge derejesine çykarypdyrlar. Haýsy ugurda zähmet çekýändigine garamazdan, halypa öz ugrunyň alymy hasaplanýar. Taryhdaky alym-akyldarlarymyz hem şeýle menzili — halypa-şägirtlik ýoluny geçen beýik ynsanlardyr.

Arkadagly Gahryman Serdarymyz ýaş nesliň ýokary bilimli, kämil dünýägaraýyşly bolmagyny gazanmak, Watan söýgüsiniň belentliginde durmuşa döredijilikli çemeleşýän ýaşlary terbiýeläp ýetişdirmek ugrunda alyp barýan döwlet syýasatynyň içinden halypa-şägirtlik mekdebi eriş-argaç bolup geçýär. Watanymyzyň geljegi bolan ýaş nesliň ylymly-bilimli, ilhalar hünärmenler bolup ýetişmeginde halkymyzyň ruhy-ahlak ýoly bolan halypa-şägirtlik ýoluny dowam etdirmegiň ähmiýeti diýseň uludyr. Bu babatda pederlerimiziň ýörelge mekdebiniň röwşen ertirleriň ösüş menzillerini nazarlaýandygy şübhesizdir.

Ýaşlar barada edilýän alada we olara bildirilýän ynam ýaş nesliň ýurduň geljekki ösüşi bilen baglanyşykly köptaraply wezipeleri öz üstüne alyp bilýän başarnykly hünärmenler, il halar adamlar bolup ýetişmegini üpjün etmegi nazarlaýar. 2022-nji ýylyň 1-nji sentýabrynda kabul edilen «Ýaşlar barada döwlet syýasaty hakynda» Türkmenistanyň Kanunynyň rejelenen görnüşinde bu ugurda öňde durýan wezipeleriň hukuk esaslary aýdyň kesgitlenendir.

Döwrüň, döwletiň beýik ynamyna öz başarnygy we hünäri bilen jogap bermek her bir ynsan üçin zerurdyr. Bu ynam ýaşlara ylym-bilim berýän, olary durmuşa taýýarlaýan alymlara, professor-mugallymlara we halypalara degişlidir. Bu ynam ussat halypalaryň ýaş nesli ýetişdirmek bilen baglanyşykly işlerine jogapkärçiligini artdyrýar. Türkmen halkynyň Milli Lideri, Halk Maslahatynyň Başlygy Gurbanguly Berdimuhamedow «Ömrümiň manysy» atly kitabynda: «Hünär meselesi — adamyň ykbaly. Ykballar birleşip, halkyň ykbalyny emele getirýär. Halkyň ykbaly bolsa ýurduň, döwletiň ykbalydyr. Munuň özi biziň umumy ýol-ýörelgämiziň, diýmek, hatda ynam-ygtykatymyzyň berkligi bilen hem baglanyşyp gidýär» diýip belleýär. Görşümiz ýaly, hünärli ýaşlary ýetişdirmek ýurduň, döwletiň ykbaly bilen baglydyr. Şonuň üçin Gahryman Arkadagymyzyň bu ugurdaky başlangyçlaryny, öňe süren oý-pikirlerini bu günki günde üstünlikli dowam etdirýän hormatly Prezidentimiz Arkadagly Gahryman Serdarymyzyň halypa-şägirt gatnaşyklarynyň hünärmenleriň täze neslini ýetişdirmekdäki orny bilen baglanyşykly meseleleriň uly ähmiýete eýe bolýandygyny belleýär.

Ýurdumyzda halypa-şägirtlik ýoluny dowam etdirmekde nusgalyk işleri alyp barýan hormatly Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak bolmagyny, alyp barýan işleriniň rowaçlyklara beslenmegini arzuw edýäris.