«PARAHATÇYLYGYŇ ÝAŞ ÇAPARLARY»: IV MÖWSÜMIŇ VI SAÝLAMA OÝNY GEÇIRILDI

2025-nji ýylyň 5-nji martynda Türkmenistanyň Daşary işler ministrliginiň Halkara gatnaşyklary institutynda «Parahatçylygyň ýaş çaparlary» atly akyl-paýhas bäsleşiginiň «Bitarap Türkmenistanyň parahatçylygy dörediji diplomatiýasy: netijeli hyzmatdaşlygyň we durnukly ösüşiň ygtybarly guraly» atly umumy şygar astynda geçirilýän IV möwsüminiň VI saýlama oýny geçirildi. Akyl-paýhas bäsleşiginiň nobatdaky saýlama oýny «Türkmenistanyň ulag diplomatiýasy: yklymlary birleşdiriji ýollaryň mizemez binýady» atly tema bagyşlanyldy.

«Parahatçylygyň ýaş çaparlary» atly akyl-paýhas bäsleşiginiň IV möwsüminiň VI saýlama oýnuna Aşgabat şäheriniň 69-njy orta mekdebiniň 12-nji synp okuwçysy Agamyradowa Enejan, Mary welaýatynyň Mary şäheriniň 19-njy orta mekdebiniň 12-nji synp okuwçysy Amanowa Näzik, Aşgabat şäheriniň 39-njy orta mekdebiniň 12-nji synp okuwçysy Garataýewa Leýli, Aşgabat şäheriniň 51-nji orta mekdebiniň 12-nji synp okuwçysy Orazowa Nurjemal, Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň 12-nji synp okuwçylary Möwlamberdi Ödemyradow we Ýanabaýew Ýusupbaý, Aşgabat şäheriniň tebigy ugurlara ýöriteleşdirilen 44-nji orta mekdebiniň 12-nji synp okuwçysy Sadykow Hemra, Dașoguz welaýatynyň Boldumsaz etrabynyň 58-nji orta mekdebiniň 11-nji synp okuwçysy Ödäýew Meretgeldi dagy gatnaşdylar.

Akyl-paýhas bäsleşiginiň IV möwsüminiň VI saýlama oýnuna «Pähimdarlar geňeşiniň» agzalary hökmünde Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň uly mugallymy, filosofiýa ylymlarynyň kandidaty Begenç Karaýew, Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary kafedrasynyň müdiri, uly mugallymy Perhat Çaryýew, Türkmenistanyň Inžener-tehniki we ulag kommunikasiýalary institutynyň mugallymy Gülşirin Agaýewa dagy adalatly eminlik etdiler. Gyzgalaňly geçen bäsleşigiň netijelerine laýyklykda, Mary welaýatynyň Mary şäheriniň 19-njy orta mekdebiniň 12-nji synp okuwçysy Amanowa Näzik we Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň 12-nji synp okuwçysy Ýanabaýew Ýusupbaý ýeňiş gazanmagy başardylar.

Akyl-paýhas bäsleşiginiň IV möwsüminiň VI saýlama oýnuna Türkmenistanyň Magtymguly adyndaky Ýaşlar guramasynyň Merkezi Geňeşi we Türkmenistanyň Milli ýaý atyjylyk federasiýasy hemaýatkärlik etdiler. Ýeňijiler we bäsleşige gatnaşyjylar ýadygärlik sowgatlar bilen sylaglandylar. Şeýle-de olara institutymyzyň Hormat hatlary gowşuryldy.

«Parahatçylygyň ýaş çaparlary» atly akyl-paýhas bäsleşiginiň IV möwsüminiň VI saýlama oýny Türkmenistanyň Telewideniýe, radiogepleşikler we kinematografiýa baradaky döwlet komitetiniň «Miras» teleradioýaýlymy hem-de Türkmenistanyň Daşary işler ministrliginiň Halkara gatnaşyklary institutynyň okuw studiýasy bilen bilelikde ýazgy edildi. Bäsleşik ýakyn günlerde «Miras» teleýaýlymynda tomaşaçylara ýetiriler.

Kakageldi AKMYRADOW,

Türkmenistanyň Daşary işler ministrliginiň

Halkara gatnaşyklary institutynyň

Halkara žurnalistikasy fakultetiniň III ýyl talyby

Çeşmesi: Halkara gatnaşyklary instituty