ARKADAG ŞÄHERINIŇ UMUMYBILIM OJAKLARYNDA GEÇIRILEN ÇÄRELER

Arkadag şäheriniň bilim müdirligi meşhur şahyr Gurbannazar Ezizowyň doglan gününiň 85 ýyllygy mynasybetli Arkadag şäheriniň 1-nji ýöriteleşdirilen okuw-terbiýeçilik toplumynda şäheriň ähli umumybilim berýän orta mekdepleriniň okuwçylarynyň arasynda labyzly goşgy aýtmak, XX asyryň görnükli şahyrlarynyň goşgularyny şahyrana dilde okamak we okuwçylary XX asyryň görnükli şahyrlaryna bagyşlap öz düzen goşgularyny labyzly okamak boýunça bäsleşikleri geçirdi.

Döwletmämmet Azady adyndaky Arkadag şäher kitaphanasynyň guran kitap sergisi bäsleşik çärelerine özboluşly bezeg berdi. Arkadag şäherinde hereket edýän bilim ojaklarynda zähmet çekýän işjeň mugallymlarynyň käbiriniň “Arkadag” teleýaýlymynda eden çykyşlaryna hem olaryň ýürek buýsançlaryny beýan ediji aýdyň subutnama hökmünde garamak bolar.

Hormatly Prezidentimiz Arkadagly Gahryman Serdarymyzyň “Magtymguly – dünýäniň akyldary” atly kitaby hem ildeşlerimiziň, şol sanda Arkadag şäherindäki ak mekdepleriň, esasan, ýokary synp okuwçylarynyň söýüp okaýan kitaplarynyň birine öwrüldi. Arkadag şäheriniň Medeniýet toplumynyň mejlisler jaýynda Arkadagly Gahryman Serdarymyzyň döwlet galamyndan çykan bu ajaýyp esere bagyşlanyp geçirilen maslahatda “Akylly şäher” adyny alan bu şäheriň iňlis dili dersine ýöriteleşdirilen 3-nji orta mekdebiniň taryh mugallymy A.Ataýewiň çykyşynda, şeýle hem beýleki çykyşlarda bular dogrusynda joşgunly, buýsançdan doly ýürek sözleri beýan edildi.

Bulardan başga-da, ýaňy-ýakynda Arkadag şäheriniň bilim müdirligi Türkmenistanyň Bazar Amanow adyndaky Döwlet çagalar kitaphanasy bilen bilelikde şäheriň iňlis dili dersine ýöriteleşdirilen 2-nji orta mekdebinde Gahryman Arkadagymyzyň atalyk kitaplarynyň terbiýeçilik ähmiýeti barada wagyz-nesihat çäresini geçirdi. Bu çärede guralan kitap sergisinde mekdep kitaphanasynyň gorunyň hem täze kitaplaryň hasabyna juda baýlaşandygyna äşgär göz ýetirildi. “Arkadag” teleýaýlymynyň gatnaşmagynda zehinli mekdep okuwçylarynyň arasynda geçirilen sorag-jogaply döredijilik duşuşygy hem örän täsirli boldy.

Ýagşy Garaýew,

Arkadag şäheriniň bilim müdirliginiň kitaphana usulçysy