Türkmenistanyň Oguz han adyndaky Inžener-tehnologiýalar uniwersitetinde «Innowasiýalar, parahatçylyk, durnukly ösüş» atly halkara ylmy-amaly maslahat geçirilidi.

Halkara parahatçylyk we ynanyşmak ýylynda Ylymlar güni mynasybetli 11-nji iýunynda Türkmenistanyň Oguz han adyndaky Inžener-tehnologiýalar uniwersitetinde «Innowasiýalar, parahatçylyk, durnukly ösüş» atly halkara ylmy-amaly maslahat geçirilidi. Halkara ylmy-amaly maslahata dünýäniň jemi 5döwletinden jemi 11 sany, sanly ulgam arkaly 20 sany dünýäniň abraýly ýokary okuw mekdepleriniň professor-mugallymlary, ylmy-barlag institutlarynyň tanymal alymlary, edara-kärhanalarynyň we kompaniýalarynyň ýolbaşçylary gatnaşdylar. Şolaryň hatarynda, Ýaponiýa, Russiýa, Gruziýa, Ukraina, Türkiýe, Germaniýa, Azerbaýjan, Owganystan, Gazagystan, Fransiýa, Awstriýa, Özbegistan, Koreýa, Hindistan, Päkistan, Braziliýa we beýlekiler bar.. Halkara ylmy-amaly maslahatynyň gün tertibine ylmy barlaglaryň ileri tutulýan ugurlary boýunça özara gatnaşyklar, innowasion tehnologiýalary işläp taýýarlamak we olary ulanmak, durnukly ösüşi üpjün etmekde parahatçylyk we ynanyşmak taglymatynyň ähmiýeti ýaly meseleler girizildi.

Halkara ylmy-amaly maslahatyň açylyş dabarasy aýdym-sazly dabaralara, baýramçylyk ruhubelentligine beslendi. Myhmanlara milli däp-dessurlarymyz görkezilip, milli tagamlar hödür edildi. Olar «Oguzlar» döredijilik toparynyň çykyşlaryna tomaşa etdiler. Ýaňlanan aýdym-sazlar hem-de ýerine ýetirilen ajaýyp tanslar bu ýere ýygnananlary baýramçylyk ruhubelentligine besledi.

Halkara parahatçylyk we ynanyşmak ýylynda türkmen ylmynyň täze galkynyşlarynyň nyşany bolan halkara ylmy-amaly maslahata gatnaşyjylar uniwersitetiň professor-mugallymlary we talyplary tarapyndan döredilen innowasion tehnologiýalaryň sergisi bilen tanyşdylar. Maslahat bilen utgaşyklylykda uniwersitetiň ýurdumyzyň ýaşlarynyň arasynda yglan eden innowasion tehnologiýalaryň bäsleşiginiň jemleýji tapgyryna saýlanan ylmy taslamalar sergide aýratyn orna eýe boldy. Bu bäsleşige gatnaşýan talyplaryň, ýaş ylmy işgärleriň we mugallymlaryň arasynda mekdep okuwçylarynyň hem bolmagy örän buýsandyryjydyr. Innowasion tehnologiýalaryň bäsleşiginiň jemleýji tapgyryna 150-den gowrak taslama işi gatnaşyp, oňa uniwersitetiň professor mugallymlarydan düzülen eminler topary we halkara ylmy-amaly maslahata hormatly myhman hökmünde gatnaşýan daşary ýurtly wekiller baha berdiler.

Soňra daşary ýurtly hormatly myhmanlar hem-de maslahata gatnaşyjylar uniwersitetde Halkara parahatçylyk we ynanyşmak ýylynda yglan edilen Parahatçylygyň we durnukly ösüşiň hatyrasyna ylym we innowasiýalar atly ýylyň şygary bilen geçirilýän “Innowasiýalar, parahatçylyk, durnukly ösüş” atly halkara ylmy-amaly maslahatynyň çäklerinde döredilen “Bilimler dünýäsi we kibersport toplumy” bilen tanyşdylar.

“Innowasiýalar, parahatçylyk, durnukly ösüş” atly halkara ylmy-amaly maslahatynyň açylyşynda maslahata gatnaşyjylara gutlag sözleri okaldy. Masalahat sanly ulgam arkaly utgaşykly görnüşde geçirilip, onuň umumy mejlisinde durnukly ösüşi üpjün etmekde parahatçylyk taglymaty, dürli ugurlara degişli innowasion tehnologiýalary ykdysadyýetiň pudaklaryna, senagata ornaşdyrmak, ýokary tehnologiýalar babatda ykdysadyýetiň döwlet we hususy bölekleriniň arasyndaky hyzmatdaşlygy ösdürmek, ýurdumyzyň senagat kärhanalarynda döredilýän nano, bio, maglumat ulgamlary hakyndaky çykyşlara giň orun berildi. Halkara ylmy-amaly maslahatynyň umumy mejlisinde edilen çykyşlar ylmy täzeçilligi, derwaýyslygy bilen tapawutlandy.

Halkara ylmy-amaly maslahatynyň umumy mejlisi tamamlanandan soňra onuň işi 3 sany bölümlerde, ýagny “Ylym – ösüş arkaly parahatçylygyň binýady”, “Milli medeni ýörelge – dostlukly hyzmatdaşlygyň kämil köprüsi”, “Innowasion tehnologiýalar durnukly ösüşi üpjün etmegiň kämil serişdesi” atly bölümlerde öz işini dowam etdi. Daşary ýurtly wekilleriň çykyşlary ikitaraplaýyn bähbitli ylmy hyzmatdaşlygy alyp barmakda işjeň häsiýete eýe boldy.

Maslahatyň çäklerinde ikitaraplaýyn Ähtnamalara gol çekmek dabarasy geçirildi. Türkmenistanyň Oguz han adyndaky Inžener-tehnologiýalar uniwersiteti bilen Wengriýanyň Dermanlyk ösümlikler boýunça ylmy-barlag institutynyň arasynda Özara düşünişmek hakynda Ähtnama gol çekildi.

Halkara maslahatyň ahyrynda Türkmenistanyň Oguz han adyndaky Inžener-tehnologiýalar uniwersitetinde geçirilen «Innowasiýalar, parahatçylyk, durnukly ösüş» atly halkara ylmy-amaly maslahata gatnaşyjylar döwrüň ösüşleri bilen aýakdaş täze innowasiýalardyr tehnologiýalary milli bilim ulgamyna ornaşdyrmaga aýratyn üns berýän, ýerli çig mallara esaslanýan durnukly ykdysady ösüşi gazanmak üçin ähli şertleri döredip berýän Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak, il-ýurt bähbitli, dünýä nusgalyk işleriniň hemişe rowaç bolmagyny arzuw etdiler.