HOWANYŇ ÜÝTGEMEGI BOÝUNÇA ÝAŞLARYŇ JEMLEÝJI MILLI MASLAHATY GEÇIRILDI

2024-nji ýylyň 16-njy sentýabrynda Türkmenistanyň Daşary işler ministrliginiň Halkara gatnaşyklary institutynda Howanyň üýtgemegi boýunça Ýaşlar maslahatynyň (COY19) we BMG-niň Howanyň üýtgemegi baradaky Çarçuwaly konwensiýasyna gatnaşýan taraplaryň maslahatynyň (COP29) 29-njy mejlisiniň öňüsyrasyndaky jemleýji Ýaşlar maslahaty geçirildi. 

Bakuda geçiriljek (COY19) Ýaşlar maslahatynyň öňüsyrasynda geçirilen Milli maslahatyň esasy wezipesi Howanyň üýtgemegi baradaky Çarçuwaly konwensiýasynyň häzirki ýagdaýy we ýurdumyzyň bu ugur bilen baglylykda alyp barýan işlerini ýaşlara öwretmekden, şeýle-de howanyň üýtgemegi meseleleriniň dürli ugurlaryna degişlilikde ýaşlara bilim bermekden ybarat boldy. 

Maslahat zehinli ýaşlary bir ýere jemlemek bilen, olara daşky gurşawy goramak boýunça pikir alyşmaga we howanyň üýtgemegi bilen bagly meselelere garşy göreşmekde öz goşantlaryny goşmaklyga mümkinçilik döretdi.

Maslahata 17 ýaşdan 35 ýaş aralygyndaky ýaşlar, Durnukly ösüş maksatlarynyň (DÖM) ýaş ilçileri, ýurdumyzyň ýokary okuw mekdepleriniň talyp-ýaşlary, şeýle hem BMG-niň ýerli edaralarynyň wekilleri, Germaniýanyň, Beýik Britaniýanyň, Birleşen Arap Emirlikleriniň, Azerbaýjan Respublikasynyň Türkmenistandaky Ilçihanalarynyň wekilleri, Halkara Hyzmatdaşlyk boýunça German jemgyýetiniň (GIZ), Ýewropa Bileleşiginiň Türkmenistandaky wekilhanasynyň we Türkmenistanyň Daşary işler, Bilim, Energetika we Daşky gurşawy goramak ministrlikleriniň wekilleri gatnaşdylar.

Maslahatyň umumy mejlisiniň dowamynda oňa gatnaşyjy wekilleriň çykyşlary diňlenildi. Çykyşlarda hormatly Prezidentimiziň parasatly baştutanlygynda ýurdumyzda daşky gurşawy goramak hem-de Durnukly ösüş maksatlaryna ýetmek boýunça durmuşa geçirilýän işlerde ýaşlara möhüm ornyň degişlidigi barada bellenip geçildi. 

Umumy mejlisden soňra maslahat öz işini dürli mowzuklar boýunça bölümçelerde dowam etdi. Onuň dowamynda Howanyň üýtgemegi babatynda halkara hukuk gurallarynyň ulanylyşy, Howanyň üýtgemegine garşy göreşde IT tehnologiýalaryň orny, Howanyň üýtgemegi bilen baglylykda Aral deňziniň tebigy baýlyklaryny gorap saklamak, oba hojalygynda suw gorlaryndan tygşytly peýdalanmak, gaýtadan dikeldilýän energiýa çeşmeleri we energiýany tygşytly peýdalanmak boýunça jemgyýetçilik maglumat Strategiýasyny işläp düzmek, howanyň hili we Ozon gatlagynyň goragyny durnukly saklamak, şeýle hem howanyň üýtgemegine garşy göreşmekde bilim ulgamynyň tutýan orny barada pikir alşyldy. Garalan mowzuklar boýunça ýaşlaryň öňe süren teklipleri seljerilip, olaryň esasynda Türkmenistanyň Ýaşlarynyň Beýannamasyny taýýarlamak meselesine seredildi. 

Beýan edilenler bilen birlikde, çäräniň Ozon gatlagyny goramagyň halkara günine gabatlanyp geçirilýändigini aýratyn bellemek gerek. Şeýlelik-de geçirilen maslahatyň ýaşlaryň ekologiýa we daşky gurşawy goramak bilen baglanyşykly bilimlerini artdyrjakdygyny we olara bu ugurda bar bolan täzeçil pikirlerini durmuşa geçirmekde ýardam berjekdigini ynamly aýtmak bolar.

Türkmenistanyň Bilim ministrligi

Ýaşlar syýasaty bölümi