Hormatly Prezidentimiz «Daewoo Engineering & Construction Co., Ltd» koreý kompaniýasynyň müdiriýetiniň başlygyny kabul etdi

28-nji iýunda hormatly Prezidentimiz Serdar Berdimuhamedow ýurdumyza sapar bilen gelen «Daewoo Engineering & Construction Co., Ltd» koreý kompaniýasynyň müdiriýetiniň başlygy Jong Won-juny kabul etdi.

Myhman duşuşmaga döredilen mümkinçilik üçin hoşallyk bildirip, baý medeni mirasa we ykdysady ösüş kuwwatyna eýe bolan Türkmenistanda iş alyp barmagyň ýolbaşçylyk edýän kompaniýasy üçin uly hormatdygyny belledi we pursatdan peýdalanyp, döwlet Baştutanymyzy Arkadag şäheriniň açylmagynyň iki ýyllygy bilen tüýs ýürekden gutlady hem-de Koreýa Respublikasynyň Prezidenti Li Çže Mýonyň mähirli salamyny ýetirdi.

Hormatly Prezidentimiz hoşniýetli sözler üçin minnetdarlyk bildirip, Koreýa Respublikasynyň Baştutanyna iň gowy arzuwlaryny beýan etdi hem-de işewüriň saparynyň dowamynda geçiriljek gepleşikleriň özara hyzmatdaşlygy ösdürmegiň geljegi barada pikir alyşmak üçin oňat mümkinçilik berjekdigine ynam bildirdi we saparyň netijeli bolmagyny arzuw etdi.

Duşuşygyň dowamynda bellenilişi ýaly, Türkmenistan Koreýa Respublikasy bilen özara hormat goýmaga, ynanyşmaga we düşünişmäge esaslanýan gatnaşyklaryň ösdürilmegine aýratyn ähmiýet berýär. Köp ýyllaryň dowamynda iri koreý kompaniýalary ýurdumyzyň nebitgaz we himiýa senagatynda iri taslamalary durmuşa geçirmekde giň gerimli işleri alyp barýarlar hem-de ikitaraplaýyn ykdysady hyzmatdaşlygy ösdürmäge uly goşant goşýarlar. «Daewoo» kompaniýasy hem ýurdumyzda döredilýän mümkinçiliklerden peýdalanyp, türkmen hyzmatdaşlary bilen netijeli gatnaşyklary ýola goýdy.

Häzirki wagtda himiýa senagaty Türkmenistanyň depginli ösýän pudaklarynyň biridir. Içerki çig mallardan milli ykdysadyýetimiz üçin zerur bolan, şeýle hem eksporta niýetlenen himiýa önümlerini öndürmek pudagyň işiniň esasy ugry bolup durýar.

– “Türkmenhimiýa” döwlet konserni bilen «Daewoo Engineering & Construction Co., Ltd» kompaniýasynyň arasynda Türkmenabatdaky himiýa zawodynda mineral dökünleri öndürýän toplumy gurmak barada şertnama baglaşyldy. Bu bolsa, ikitaraplaýyn hyzmatdaşlygyň taryhynda täze tapgyryň başlanýandygyny görkezýär diýip, hormatly Prezidentimiz aýtdy hem-de «Daewoo» kompaniýasynyň ähli işgärlerine bu taslamany amala aşyrmakda üstünlikleri arzuw etdi.

Işewür geljegi uly türkmen bazarynda netijeli iş alyp barmaga döredilýän mümkinçilikler üçin döwlet Baştutanymyza hoşallyk bildirip, ýolbaşçylyk edýän kompaniýasynyň öz üstüne alan şertnamalaýyn borçnamalaryny ýerine ýetirjekdigine ynandyrdy.

Duşuşygyň ahyrynda hormatly Prezidentimiz Serdar Berdimuhamedow ýola goýlan netijeli we özara bähbitli hyzmatdaşlygyň mundan beýläk-de üstünlikli ösdüriljekdigine ynam bildirip, Daewoo Engineering & Construction Co., Ltd» kompaniýasynyň müdiriýetiniň başlygy Jong Won-juna türkmen-koreý gatnaşyklaryny ösdürmekde täze üstünlikleri arzuw etdi.