Halkara sergi we ylmy maslahat öz işine başlady

2025-nji ýylyň 10-njy oktýabrynda Türkmenistanyň Söwda-senagat edarasynda Türkmenistanyň saglygy goraýyş we derman senagaty işgärleriniň güni mynasybetli «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergi we ylmy maslahat öz işine başlady.

Halkara sergide daşary ýurt öňdebaryjy iri kompaniýalarynyň bilim we sport, saglygy goraýyş ulgamy boýunça alyp barýan işleri, ýokary okuw jaýlarynyň, ýurdumyzyň ministrlikleriniň, pudaklaýyn dolandyryş edaralarynyň, hususy kärhanalaryň we telekeçileriň ekspozisiýalary görkezildi. Onda saglygy goraýyş ulgamynyň tehnologiýalarynyň soňky gazananlary hem-de dermanlyk ösümliklerden taýýarlanan melhem çaýlar sergä gatnaşyjylara hödürlendi.

Ýeri gelende bellesek, Türkmenistanyň Söwda-senagat edarasynda türkmen halkynyň Milli Lideri, Gahryman Arkadagymyzyň «Türkmenistanyň dermanlyk ösümlikleri» atly ylmy-ensiklopedik kitabynyň XVII jildiniň hem-de «Saglygy goraýyş ulgamynda ýetilen sepgitler» atly kitabynyň tanyşdyrylyş dabaralary geçirildi. Gahryman Arkadagymyzyň täze kitaplary saglygy goraýyş we derman senagaty işgärleriniň hünär baýramyna uly sowgat boldy.

Sergide Türkmenistanyň Daşary işler ministrliginiň Halkara gatnaşyklary institutynyň hem ekzpozisiýasy ýerleşdirildi. Bu halkara çärä institutymyzyň professor-mugallymlary we talyp ýaşlary hem işjeň gatnaşyp, oňa gatnaşyjylar bilen söhbetdeşlikler taýýarladylar. Bu bolsa talyp ýaşlaryň tejribe toplamagynda, hünär taýdan kämilleşmeginde möhüm ähmiýete eýedir.

«Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergi we ylmy maslahat 12-nji oktýabra çenli öz işini dowam edýär.

Aýsona AMANJAÝEWA,

Türkmenistanyň Daşary işler ministrliginiň

Halkara gatnaşyklary institutynyň Halkara žurnalistikasy fakultetiniň III ýyl talyby.