Bilim işgärleriniň iş tejribeleri artdyrylýar

15-nji awgustda Mary şäherindäki 10-njy orta mekdepde mugallymlaryň gatnaşmagynda usuly-amaly okuw geçirildi. Onda «Berkarar döwletiň täze eýýamynyň Galkynyşy döwründe hormatly Prezidentimiziň milli bilim ulgamyny döwrebaplaşdyrmak boýunça durmuşa geçirýän bilim özgertmeleriniň çäklerinde kabul edilen «Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-­nji ýyla çenli Konsepsiýasyna» laýyklykda ýaş nesle berilýän bilimiň hilini we netijeliligini ýokarlandyrmak babatda pedagogik işgärleriň öňünde durýan wezipeler» diýen tema boýunça çykyşlar edildi. Olar bu Konsepsiýa laýyklykda, okuwçylaryň özbaşdak pikirlenmek başarnyklaryny we endiklerini kämilleşdirmekde, şahsyýete gönükdirilen okuwy kemala getirmekde innowasion çemeleşmelerden peýdalanmagyň ähmiýetli taraplary dogrusynda aýdyldy. Multimedia tagtasynda taýýarlanan tanyşdyryşlara hem tomaşa edildi.

Altyngözel GURBANDURDYÝEWA,

Mary şäherindäki 24-nji zehinli ýaşlar mekdebiniň mugallymy.

* * *

Ahal welaýat Baş bilim müdirliginiň düzümindäki umumybilim berýän orta mekdeplerde we mekdebe çenli çagalar edaralarynda 2024–2025-nji okuw ýylyna taýýarlyk işleri tamamlaýjy tapgyrlarda alnyp barylýar. Şu günler bolsa bilim işgärleriniň hünär taýýarlygyny ýokarlandyrmak, olaryň okatmagyň usulyýeti boýunça düşünjelerini kämilleşdirmek işlerine usuly-amaly okuwlarda aýratyn üns berilýär. Bilim işgärleriniň usuly-amaly okuwlary welaýatymyzyň ähli etraplarynda ýokary guramaçylykly geçirilýär. Oňa bilim işgärler işjeň gatnaşýarlar. Bu okuwlar özara tejribe alyşmagyň, okatmagyň usulyýeti boýunça täze maglumatlary öwrenmegiň, hünäre kämilleşmegiň özboluşly mekdebine öwrüldi.

Bilim işgärleriniň usuly-amaly okuwlary welaýatymyzyň umumybilim berýän orta mekdeplerinde we mekdebe çenli çagalar baglarynda dowam edýär.

Garýagdy HAJYÝEW,

Ahal welaýat Baş bilim müdirliginiň umumy orta bilim bölüminiň baş hünärmeni.

* * *

«Pähim – paýhas ummany Magtymguly Pyragy» diýen at bilen geçirilýän bilim işgärleriniň usuly-amaly okuwlary Türkmenabat şäheriniň bilim bölüminiň düzümindäki bilim-terbiýeçilik edaralarynda guramaçylykly geçirilýär.

Döwrebap bilimli, öňdebaryjy innowasion tehnologiýalardan baş çykarýan, watansöýüji, terbiýeli ýaş nesli kemala getirmegi maksat edinýän bilim işgärleri usuly-amaly okuwlarda bu wezipeler dogrusynda maslahatlaşýarlar. Meýilnamadaky bellenilen temalaryň üstünde durlup geçilýär. Usuly-amaly okuwlara welaýat Baş bilim müdirliginiň okuw işleri boýunça bölüm müdiri Kerimbergen Maşaripow, Türkmenistanyň Milli Bilim institutynyň işgärleriň hünärlerini kämilleşdiriş bölüminiň bölüm müdiri, biologiýa ylymlarynyň doktory, dosent Sapargeldi Durdyýew, Türkmenistanyň Milli bilim institutynyň zähmet we hünär okuwy bölüminiň esasy ylmy işgäri Agamyrat Täşliýew hem gatnaşyp, bilim işgärlerine maslahatlary berdiler, olar bilen sowal-jogap alyşdylar. 

Nurtäç REJEPOWA,   

Türkmenabat şäherindäki takyk we tebigy ugurlara ýöriteleşdirilen 28-nji orta mekdebiň müdiriniň okuw işleri boýunça orunbasary.  

* * *

Dänew etrap bilim bölüminiň düzümindäki mekdeplerde we mekdebe çenli çagalar edaralarynda usuly-amaly okuwlar işjeň ýagdaýda geçirilýär. Okuwlarda meýilnama esasynda bellenilen temalar boýunça täsirli çykyşlar edilýär. «Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasynda» beýan edilen umumybilim berýän orta mekdeplerde zähmet we hünär ugurly derslerde sapagy guramagyň usulyýetini kämilleşdirmegiň ugurlary boýunça maslahatlaşylýar. Halypa mugallymlar ýaş nesliň bilim bilen birlikde, terbiýesini, başarnyklaryny ösdürmek baradaky tejribelerini paýlaşdylar. Bilim işgäriniň öz hünär taýýarlygyny ýokarlandyryp, okadýan dersiniň okadylyş usulyýetini kämilleşdirmäge jogapkärli çemeleşmelidigi baradaky çykyşlar bolsa, okuwa gatnaşanlarda ýakymly täsir galdyrdy.

Mährijemal JORAÝEWA,

Dänew etrabyndaky 45-nji orta mekdebiň mugallymy.

* * *

Usuly-amaly okuwlar Ak bugdaý etrap bilim bölüminiň çägindäki mekdebe çenli çagalar edaralarynyň terbiýeçileriniň arasynda hem guramaçylykly dowam edýär. Etrap boýunça mekdebe çenli çagalar edaralarynyň 21-si bar. Olarda terbiýeçileriň 245-si zähmet çekýär.

Usuly-amaly okuwlarda «Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasyna» laýyklykda, ösüp gelýän ýaş nesle berilýän bilimiň hilini we netijeliligini ýokarlandyrmakda öňde durýan wezipeler ara alnyp maslahatlaşyldy. «Türkmenistanda çaganyň irki ösüşini we mekdebe taýýarlygyny ösdürmek babatda 2020 — 2025-nji ýyllarda mekdebe çenli çagalar edaralarynyň işini kämilleşdirmegiň Maksatnamasy» ýaş nesliň hemmetaraplaýyn sazlaşykly ösüşini, saglygyny, mekdebe taýýarlygynyň talabalaýyk bolmagyny göz öňünde tutýar. Ýurdumyzda irki ýaşdan başlap, körpeleriň beden we ruhy taýdan sagdyn ösüp kemala gelmegi, döwrebap bilim we terbiýe almagy üçin döredilýän giň mümkinçilikler barada hem usuly-amaly okuwlarda aýdyldy.

Mekdebe çenli çagalar edaralary bilim ulgamynyň iň möhüm basgançagydyr. Usuly-amaly okuwlarda terbiýeçiler körpelere bilim we terbiýe berişleri, olarda ilkinji düşünjeleri kemala getirişleri barada hem beýan etdiler. Etrabyň 9-njy çagalar bakja-bagynyň terbiýeçisi Täzegül Myradowanyň, 10-njy çagalar bakja-bagynyň terbiýeçisi Orazgözel Sopyýewanyň çykyşlary täsirliligi bilen tapawutlandy.

Tawus SUHANOWA,

Ak bugdaý etrap bilim bölüminiň mekdebe çenli çagalar edaralary bölüminiň baş hünärmeni.

* * *

Şu günler Bäherden etrap bilim bölüminiň çägindäki mekdebe çenli çagalar edaralarynyň müdirleriniň arasynda usuly-amaly okuwlar dowam edýär. Etrap boýunça mekdebe çenli çagalar edaralarynyň 20-sinde zähmet çekýän mekdebe çenli çagalar edaralarynyň müdirleri etrapdaky 13-nji çagalar bagyna ýygnandylar. Bu ýerde «Mekdebe çenli çagalar edaralarynda akyldar şahyrymyz Magtymguly Pyragynyň döredijiligini körpe nesle düşündirmegiň ýollary we usullary», «Çagalaryň tebigy zehinini ýüze çykarmakda, ösdürmekde we olary durmuşa taýýarlamakda çeper döredijiligi ösdüriji gurnaklaryň işini netijeli guramagyň usullary» diýen temalardaky çykyşlar has-da täsirli boldy. Etrapda zähmet çekýän mekdebe çenli çagalar edaralarynyň müdirleri çaga terbiýelemek ýaly asylly işlerinde gazanylan üstünlikler, ýetilen sepgitler barada hem durup geçdiler. Etrapda göreldeli zähmet çekýän bilim işgärleriniň hem ady agzalyp geçildi. Olardan etrapdaky 3-nji çagalar bagynyň müdiri Maýsa Kulyýewanyň, 17-nji çagalar bagynyň müdiri Laçyn Nuryýewanyň, 16-njy çagalar bagynyň müdiri Bahar Hojaýewanyň atlaryny görkezmek bolar.

Maýagözel HUDAÝGULYÝEWA,

Bäherden etrap bilim bölüminiň mekdebe çenli çagalar edaralary bölüminiň baş hünärmeni.

* * *

Daşoguz şäherindäki iňlis diline ýöriteleşdirilen 29-njy orta mekdepde şäheriň mekdepleriniň taryh dersini okadýan mugallymlarynyň usuly-amaly okuwlary geçirildi. Usuly-amaly okuwlarda «Ynsanperwer durmuş bilimleri ugry derslerinde Magtymguly Pyragynyň döredijiliginiň esasynda ýaş nesle ruhy-ahlak we raýat-watançylyk terbiýesini bermegiň iş tejribesinden» diýen temadan mugallymlaryň çykyşlary diňlenildi. Daşoguz şäherindäki iňlis dili, himiýa we biologiýa derslerini çuňlaşdyryp öwredýän ýöriteleşdirilen 26-njy orta mekdebiň mugallymy Meýlis Muhammedowyň, şäherdäki daşary ýurt dillerine ýöriteleşdirilen 36-njy orta mekdebiň taryh mugallymy Göwher Kitaýewanyň okuwçylara ýurdumyzyň taryhyny öwretmekde ulanýan öňdebaryjy iş usullary baradaky çykyşlary üns bilen diňlenildi. Mugallymlar sowal-jogap hem alyşdylar.

Andreý DURDYÝEW,

Daşoguz welaýat Baş bilim müdirliginiň umumy orta bilim bölüminiň baş hünärmeni.

* * *

Daşoguz şäherindäki daşary ýurt dillerini çuňlaşdyryp öwredýän ýöriteleşdirilen 39-njy çagalar bakja-bagynda şäheriň mekdebe çenli çagalar edaralarynyň terbiýeçileriniň usuly-amaly okuwlary dowam edýär. Şäher boýunça mekdebe çenli çagalar edaralarynyň 39-sy bar.

Usuly-amaly okuwlarda «Türkmenistanda çaganyň irki ösüşini we mekdebe taýýarlygyny ösdürmek babatda 2020—2025-nji ýyllarda mekdebe çenli çagalar edaralarynyň işini kämilleşdirmegiň Maksatnamasyna» laýyklykda, körpeleriň beden we ruhy taýdan sagdyn ösüp kemala gelmegi, döwrebap bilim-terbiýe almagy üçin ýurdumyzda döredilýän oňyn mümkinçilikler barada aýdyldy. Şäherdäki 38-nji çagalar bagynyň terbiýeçisi Aýna Nepesowanyň, 36-njy çagalar bakja-bagynyň terbiýeçisi Merjen Ataýewanyň, 39-njy çagalar bakja-bagynyň terbiýeçisi Gunça Ataýewanyň körpeleri terbiýelemekde ulanýan öňdebaryjy iş usullary baradaky çykyşlary has hem täsirli boldy.

Bahargül DÄDÄÝEWA,

Daşoguz welaýat Baş bilim müdirliginiň mekdebe çenli bilim, terbiýe we mekdepden daşary edaralary bölüminiň müdiri.

Çeşmesi: Türkmenmetbugat