Göçme okuw sapagy

Ýakynda Halkara senagatçylar we telekeçiler uniwersitetiniň professor-mugallymlary we talyp ýaşlary Arkadag şäherinde ýerleşýän Döwletmämmet Azady adyndaky Arkadag şäher kitaphanasynda göçme okuw sapagyny gurnadylar. Bu göçme okuw sapagynyň dowamynda talyp ýaşlar kitaphananyň baý kitap gory, elektron kitaphana mümkinçilikleri we ol ýerde okyjylar üçin döredilen giň mümkinçilikler bilen ýakyndan tanyşdylar. Şeýle hem döwrebap kitaphanalaryň çäginde asman jisimlerini ylmy esasda öwrenmäge niýetlenen obserwatoriýalar talyp ýaşlarda uly gyzyklanma döretdi.

Bu göçme okuw sapagynda talyp ýaşlaryň saýlap alan hünär ugurlaryna we öwrenýän dillerine degişli birnäçe daşary ýurt edebiýatlary, türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň halkymyza peşgeş berýän  kitaplaryny okamagy, milli ýörelgelerimizi, taryhymyz bilen bagly gymmatly maglumatlary yzygiderli öwrenmegi maslahat berildi. Bu ajaýyp kitaphanada döredilen şertleriň we mümkinçilikleriň ählisi ýaş nesillerimiziň ylymly-bilimli, ussat hünärmenler bolup ýetişmegi üçin döwlet derejesinde edilýän aladanyň aýdyň mysalydyr.