Halkara gatnaşyklary berkidilýär: Türkmen we iňlis uniwersitetleriniň wekilleriniň duşuşygy

Amala aşyrylan iş saparynyň çäginde Halkara ynsanperwer ylymlary we ösüş uniwersitetiniň wekiliýetiniň Westminster uniwersitetiniň prorektorlary Endrýu Linn hem-de Dibýeş Anand bilen duşuşygy geçirildi. Duşuşygyň dowamynda ikitaraplaýyn hyzmatdaşlygyň mümkinçilikleri ara alyp maslahatlaşyldy. Professor Endrýu Linn Westminster uniwersitetiniň alyp barýan ylmy işleri bilen tanyşdyrdy hem-de özüniň Aşgabat şäherine birnäçe gezek netijeli iş saparlary amala aşyrandygyny, ylmy maslahatlara gatnaşandygyny hem-de uniwersitetleriň arasynda bilelikde Britan Geňeşiniň “Merkezi Aziýada iňlis dilini öwrenilişini çaltlandyrmak” atly maksatnamasy boýunça hünär kämilleşdiriş okuwlaryny geçirilendigini belledi. Soňra professor Dibýeş Anand Westminster uniwersitetiniň alyp barýan halkara işleri barada gürrüň berdi. Hususan-da Merkezi Aziýa sebitinde ornaşdyrylan tejribeleri bilen paýlaşdy. Halkara ynsanperwer ylymlary we ösüş uniwersitetiniň wekiliýeti uniwersitetde mähirli kabul edilendigi üçin hoşallygyny beýan etdi we uniwersitetiň alyp barýan işi, ýeten sepgitleri, hyzmatdaşlygy we daşary ýurtly hyzmatdaş uniwersitetler bilen alnyp barylýan işler barada gürrüň berdi. Duşuşykda Westminster uniwersitetiniň ylmy merkezleri bilen geçirilen duşuşyklaryň netijeli häsiýeti bellenildi. Soňra Professor Dibýeş Anand Halkara ynsanperwer ylymlary we ösüş uniwersitetiniň talyplary üçin alyş-çalyş maksatnamalary, gysga möhletli tomusky okuwlary, özara gyzyklanma bildirilýän ugurlar boýunça onlaýn okuwlary guramak boýunça degişli işleri alyp barmak barada teklip etdi, şeýle-de uzakmöhletleýin maksat hökmünde bilelikde “2+2” ýa-da “1+1” görnüşindäki iki diplom maksatnamalary işläp düzmek barada teklibi öňe sürdi. Duşuşygyň ahyrynda taraplar özara bähbitli ikitaraplaýyn hyzmatdaşlygy ýola goýmak üçin diplomatik ýollaryň üsti bilen degişli işleri alyp barjakdyklary barada ylalaşdylar.

Soňra Westminster uniwersitetiniň “Akademiki iňlis dili” dersleri boýunça professor-mugallymlary bilen gibrid görnüşindäki duşuşygy geçirildi. Duşuşykda Westminster uniwersitetiniň professor-mugallymlary iňlis dilini okatmakda täze usulyýetleri barada tejribelerini paýlaşdylar.

Şeýle-he, iş saparyň dowamynda Westminster uniwersitetiniň mejlisler zalynda Türkmenistanyň Garaşsyzlygynyň 35 ýyllygy mynasybetli halkara maslahat geçirildi. Maslahata Halkara ynsanperwer ylymlary we ösüş uniwersitetiniň wekiliýeti bilen bilelikde Westminster uniwersitetiniň prorektorlary, professor-mugallymlary, ylmy merkezleriniň ýolbaşçylary hem-de talyplary gatnaşdylar. Halkara maslahatynda

Halkara ynsanperwer ylymlary we ösüş uniwersitetiniň rektory M.Kuliýewa türkmen halkynyň Milli Lideri Gahryman Arkdagymyzyň we hormatly Prezidentimiz Arkadagly Gahryman Serdarymyzyň ýolbaşçylygynda alnyp barylýan Türkmenistanyň hemişelik Bitaraplygyna esaslanýan daşary syýasaty we diplomatiýasy barada çykyş etdi. Halkara ynsanperwer ylymlary we ösüş uniwersitetiniň Halkara gatnaşyklary kafedrasynyň mugallymy A.Çaryýew Türkmenistanyň şöhratly taryhy, häzirki üstünlikleri we ýeten sepgitleri, bilim ulgamynda alnyp barylýan halkara hyzmatdaşlygy hem-de Watanymyzda ylymly, bilimli ýaşlary ösdürip ýetişdirmek boýunça döredilýän mümkinçilikler barada çykyş etdi. Halkara ynsanperwer ylymlary we ösüş uniwersitetiniň Menejment kafedrasynyň uly mugallymy G.Seýilbaýewa ýurdumyzda daşary ýurt dilleriniň okadylyşy we bu ugurda Halkara ynsanperwer ylymlary we ösüş uniwersitetiniň alyp barýan işleri barada çykyş etdi.

Halkara maslahata gatnaşyjylar ýurdumyzyň parahatsöýüjilige, ynanyşmaga we dostlukly gatnaşyklary pugtalandyrmaga gönükdirilen daşary syýasatyna hem-de halkara başlangyçlaryna, bilim ulgamynda alnyp barylýan netijeli özgertmelere ýokary baha berdiler.

Halkara ynsanperwer ylymlary we ösüş uniwersiteti