Asylly ýörelgeleriň beýany

Halkymyzda döwletlilik, agzybirlik, jebislik ýaly ýörelgeler rowaçlanýar. Nusgawy we häzirki zaman edebiýatymyzda döwletlilik, agzybirlik hakynda giňişleýin pikirleri özünde jemleýän eserler bar. Bu bolsa pikirdir garaýyşlarymyzyň kämil bolmagyna getirýär.

Asylly ýörelgeler asyrlaryň dowamynda halkymyz tarapyndan ösdürilip, kämilleşdirilip gelipdir. Häzirki döwürde hem bu asylly ýörelgeler ylmy esasda öwrenilýär, ýaş nesillere ýetirilýär. Gahryman Arkadagymyz «Hakyda göwheri» atly ajaýyp kitabynda döwletlilik barada beýan edýär. Ajaýyp kitaby okan her bir okyjynyň göwün gözi açylýar, ol dünýäni, durmuşy has gözel hem kämil görnüşde görýär.

Gahryman Arkadagymyz bu ajaýyp kitabynda: «Döwletlilik» örän giň düşünje. «Döwlet guşy» diýenimde, men şol mazmunyň diňe bir jähetini açmaga synanyşypdym. Aslynda bolsa, sylaşyklylyk, agzybirlik, jebislik, meniklilik, ýiti üşüklilik hem başga-da juda köp oňyn häsiýetdäki bagtyýarlygy, gurgunlygy aňladýan şeýle düşünjeler «döwletlilikde» jemlenendir» diýip belleýär.

Gahryman Arkadagymyz taryhy hem çeper maglumatlara baý kitabynda «Oguznama» eserine aýratyn ünsi çekýär. Milli Liderimiziň öz halkynyň taryhyna bolan päk söýgüsinden gelip çykýan bu ýagdaý okyjyda hem ruhy telwas döredip, geçmişdäki ata-babalaryna, merdana pederlerine bolan buýsanjy artdyrýar.

Döwletlilik halkymyza geçmişden şu güne çenli hemra bolan, geljekde hem ýaran boljak bagtdyr. Türkmen halkynyň Milli Lideri Gahryman Arkadagymyzyň «Hakyda göwheri» atly kitabyndaky ruhubelent jümleler ynam bilen öňe gitmäge esas berýär.

Gülnara SAPARMÄMMEDOWA,

Myrat Garryýew adyndaky Türkmenistanyň Döwlet lukmançylyk uniwersitetiniň uly mugallymy, lukmançylyk ylymlarynyň kandidaty.

"Mugallymlar gazeti"

Çeşme: Türkmenmetbugat