Kitaplar dünýäsinde

Çagalygyndan kitap okamagy endige öwren gyz geljekde kitaphanaçylygy hünär edinjekdigi hakda pikir etmese-de, wagtyň gymmatyna düşünýärdi. Ejesi onuň eline iňňe-sapak alyp, keşde etmegini isleýärdi. Ol bolsa sapaklaryna taýýarlanyp, öý işlerine kömek edip, gyz doganlary bilen birlikde el işiniň başyna barsa-da, ähli oý-pikiri kitap hakyndady. Doganlary keşdelerini gyrada goýup, az-kem dynç alarlar, ol bolsa dessine eline kitap alar. Ene ýüregi gyzynyň bu hereketlerini duýýardy, ýöne oňa ýagşydan-ýamandan zat diýmezdi. Kakasy Mämmet aga çagalarynyň her biriniň ukybyna, höwesine başardygyndan uly üns berýärdi. Şeýle-de bolsa, aýalynyň gyzlara ilki girim-çykym, tikin-çatyn işlerini öwretmegini dogry hasaplaýardy.

Ol orta mekdepde çeper okaýyşlara, medeni dabaralara gatnaşýardy. Özüniň aýdym aýtmaga bolan höwesi hakda welin ene-atasynyň ýanynda dil ýarmaga çekinipdi. Haçanda hünär saýlamaly bolanda, diňe kitaphanaçy bolmaly diýen pikire uýdy.

Ogulsabyr Alowowa 1974-nji ýylda Kaka etrabyndaky 14-nji orta mekdebi tamamlap, Aşgabatda şol wagtky Gara Seýitliýew adyndaky medeni aň-bilim tehnikumynyň kitaphanaçylyk bölümine gaýybana okuwa girýär. 1975-nji ýylda etrabyň merkezleşdirilen kitaphanasynda usulyýetçi bolup işe başlaýar. Kitaba söýgi işe yhlasly ýapyşmaga, döredijilikli çemeleşmäge ruhlandyrýar. Çagalykdan kitap okap, okan kitabyny jigilerine, deň-duşlaryna höwes bilen gürrüň bermäge endik eden gyz kitaphana gelýän ýaş okyjylar bilen söhbetdeş bolup, olarda kitap okamaga höwesi artdyrýar, täsirli edebiýat çeşmelerini maslahat berýär.

Ogulsabyr maşgala gurandan soňam söýgüli kärini dowam etdirip, ilki etrap merkezleşdirilen kitaphanasynyň ýerli şahamçalarynda jogapkärli wezipelerde zähmet çekýär. Soňra ykbal ony Ak bugdaý etrabyna getirýär. Haçanda etrap merkezi kitaphanasynda işläp başlanda, ukyp-başarnygy, çekýän yhlasly zähmeti göz öňünde tutulyp, oňa birinji derejeli kitaphanaçy derejesi berilýär.

Halypa kitaphanaçy zenanyň başarnygyny, toplan baý iş tejribesini göz öňünde tutup, ony welaýat kitaphanasyna işe çagyrýarlar. Ogulsabyr daýza indi birnäçe ýyl bäri kitaphananyň ülkäni öwreniş, düşündiriş, sorag-jogap bölüminde zähmet çekip gelýär. Ol özüne ynanylan wezipäni birkemsiz ýerine ýetirýär. Onuň edebi agşamlary, döredijilik duşuşyklaryny, çeper okaýyşlary guramaçylykly we döredijilikli geçirişi ýaş hünärmenlere görelde bolýar.

Ogulsabyr ykdysadyýet ugrundan ýokary bilim alan adamsy Gaýypnazaryň ugradylan iş ýerlerine görä, welaýatyň dürli ýerlerinde ýaşaýar, baran ýerinde goňşy-golamlar bilen sylaşykly gatnaşýar. Häzirki wagtda Ak bugdaý etrabynyň Änew şäherinde ýaşaýan Ogulsabyr Alowowa perzentlerine maşgala mukaddesligine sarpa goýmagyň, birek-birek bilen düşünişip ýaşamagyň, mynasyp dost tutunmagyň, goňşyny sylamagyň, ula hormat goýmagyň, kiçini söýmegiň iň gowy ynsan häsiýetleridigini hemişe ündeýär. Şonuň üçinem Gurbanjahan, Guwanç, Röwşen, Tawus dagy ene-atalarynyň göreldesine eýerip, özleri bagtyýar, döwletli maşgalanyň eýeleri boldular.

— Atam köp okaýan eken, ol öz döwründe iňlis, rus dillerini öwrenip, köp dil bilmegiň ähmiýetini adamlara düşündiripdir. Babam bolsa öz döwründe belli zergär bolupdyr. Kakada işleýän wagtym uly ýaşly bir okyjy aýal ýanyma gelip: «Sen Durdymyrat zergäriň agtygy ekeniň. Mende babaň öz eli bilen ýasan gülýakasy bar. Enem-atam ony meniň üçin ýörite ýasadypdylar. Ony babaňdan ýadygärlik hökmünde ulan, nesliňe buýsanç bilen geçir!» diýdi. Şonda begençden ýaňa bokurdagym doldy — diýip, Ogulsabyr halypa tolgunyp gürrüň berdi.

Onuň iş otagynda görkezme esbaplarynyň, okyjylar üçin döredilen temalaýyn bukjalaryň onlarçasy bar. Olarda türkmen edebiýatynyň görnükli wekilleridir olaryň eserleri, sungat ussatlarynyň ömri we döredijiligi hakda gymmatly maglumatlar, suratlar bar. Gahryman Arkadagymyzyň, hormatly Prezidentimiziň ajaýyp kitaplary babatda döredilen bukjalar kitaphanada gymmatly çeşmeleriň biri hasaplanylýar. Olaryň her biri barada metbugatda, radioýaýlymlarda yzygiderli çykyş etmegi halypa kitaphanaçynyň iş tejribesiniň baýdygyny görkezýär. Çekýän halal hem göreldeli zähmeti göz öňünde tutulyp, ýaşlaryň halypasy Ogulsabyr Alowowa «Türkmenistanyň Garaşsyzlygynyň 25 ýyllygyna» ýubileý medaly bilen sylaglandy. Ol birnäçe gezek hünär ýaryşlaryna gatnaşyp, şowly çykyş edip, Hormat hatlaryna mynasyp boldy.

Halkara parahatçylyk we ynanyşmak ýylynda halypa kitaphanaçynyň zähmet ýoluna başlanyna ýarym asyr bolýar. Gözel kalply, ýüzi nurana enäniň arzuwy mydama agzybirlik, asudalyk, halallyk, bagtyýarlyk, döwletlilikdir. Bular her bir ömrüň many ýüküni ýetirýän bahasyz baýlykdyr.

Nurtäç ANNAMUHAMMEDOWA,

žurnalist

Çeşme: Türkmenmetbugat