Altyn güýzüň ilkinji baýramy

Sahawatly güýz paslynyň ilkinji gününde bilim ojaklary toý lybasyna beslendi. Ýurdumyzyň çar künjegini gurşap alan «Ilkinji jaň» dabaralary hemmeler, aýratyn-da, 1-nji synpa gadam basýan çagalar üçin tolgundyryjy boldy. Orta mekdepleri, ýokary we orta hünär okuw mekdeplerini Bilimler we talyp ýaşlar gününiň baýramçylyk dabaralarynyň toý ruhy gurşap aldy. 2025-2026-njy okuw ýyly mynasybetli täze okuw mekdepleridir çagalar baglarynyň açylyp ulanmaga berilmegi «Ilkinji jaň» dabaralarynyň şatlyk-şowhunyny has-da artdyrdy. Aşgabat, Arkadag şäherlerinde, welaýatlardaky döwrebap bilim edaralarynda, okuw mekdeplerinde täze okuw ýylynyň ilkinji sapagynyň «Halkara parahatçylyk we ynanyşmak ýyly» ady bilen geçirilmegi bu güne aýratyn many-mazmun berdi.

AŞGABATDA

Gözel paýtagtymyz Aşgabatda täze okuw ýylyna uly joşgun bilen girişildi. Paýtagtymyzyň ak mekdeplerine 1-nji synpa kabul edilen okuwçylaryň 17 müň 864-sine Arkadagly Gahryman Serdarymyzyň, Gahryman Arkadagymyzyň adyndan noutbuk kompýuterleriniň gowşurylmagy has-da ýatda galyjy boldy. Aşgabatda 2025-2026-njy okuw ýylynda bilim edaralarynyň 341-si, şol sanda mekdebe çenli çagalar edaralarynyň 189-sy, orta mekdepleriň 146-sy, ýöriteleşdirilen orta mekdepleriň 51-si, mekdepden daşary edaralaryň 6-sy hereket eder. Ýöriteleşdirilen orta mekdepleriň 33-sinde daşary ýurt dilleri çuňlaşdyrylyp öwrediler.

Täze okuw ýylyna taýýarlygyň çäginde, orta hünär we ýokary okuw mekdeplerini tamamlan uçurymlardan jemi müňe golaý ýaş mugallym bilim edaralaryna işe ýollanyldy. Okuw ýylynyň ilkinji gününde paýtagtymyzyň «Parahat — 7» ýaşaýyş jaý toplumynda 960 hem-de 720, «Çoganly» ýaşaýyş jaý toplumynda bolsa 720 orunlyk orta mekdepler, şeýle-de «Ýasmansalyk» ýaşaýyş jaý toplumynda 320, «Parahat — 7» ýaşaýyş jaý toplumynda 160, Büzmeýin etrabynda 320 we «Çoganly» ýaşaýyş jaý toplumynda 320 orunlyk çagalar baglary dabaraly ýagdaýda açylyp ulanmaga berildi.

ARKADAGDA

Köpetdagy etekläp oturan Arkadag şäherinde täze okuw ýylyna badalga bermek çäreleri Berdimuhamet Annaýew adyndaky Arkadag şäher mugallymçylyk orta hünär okuw mekdebinde edermen esger, ussat mugallym, ilhalar ynsan Berdimuhamet Annaýewiň heýkeline gül desselerini goýmak bilen başlandy. «Akylly» şäheriň orta mekdeplerinde 1-nji synpa kabul edilen okuwçylaryň 620-sine Arkadagly Gahryman Serdarymyzyň we Gahryman Arkadagymyzyň adyndan «Bilimli» atly noutbuk kompýuterleri gowşuryldy.

Häzirki döwürde ýurdumyzda milli bilim ulgamyny kämilleşdirmek, innowasion tehnologiýalar esasynda, döwrebap usullarda işlemäge, döretmäge, gurmaga ukyply ýokary hünärli ýaşlary terbiýeläp ýetişdirmek ugrunda uly tagallalar edilýär. Bu babatda Arkadag şäherinde durmuşa geçirilýän işler nusgalyk häsiýete eýedir. Bu ýerde çagalaryň, okuwçy ýaşlaryň we talyplaryň häzirki zaman şertlerinde bilim almagy, hünär öwrenmegi üçin ähli mümkinçilikler döredilendir. Täze şäherde täze okuw ýylynda ýaş hünärmenleriň 16-sy zähmet ýoluna başlady. «Halkara parahatçylyk we ynanyşmak ýyly» ady bilen geçirilen ilkinji sapaklar ýaşlary watansöýüjilik ruhunda terbiýelemekde örän ähmiýetli boldy.

Sona DURDYÝEWA.

«Türkmenistan».

AHALDA

Öňňin Gökdepe etrabynyň Yzgant şäherçesinde ýerleşýän Berdimuhamet Annaýew adyndaky ýöriteleşdirilen 27-nji orta mekdep ir säherden köp adamly boldy. Däp bolşy ýaly, welaýatyň dürli ýerinden gelen okuwçy ýaşlar hem-de bilim işgärleri, ilki bilen, Milli Liderimiziň atasy, hormatly Prezidentimiziň garry atasy, watançy esger, halypa mugallym, ilhalar ynsan Berdimuhamet Annaýewiň nurana ýadygärligine ter gül desselerini goýdular. Bilim ojagyndaky muzeý bilen tanyşlyk hem olarda ýakymly täsirleri döretdi.

Täze, 2025-2026-njy okuw ýylynyň başlanýandygyny alamatlandyrýan dabaralar welaýatdaky umumybilim berýän mekdepleriň 241-sinde hem şatlyk-şowhuna beslendi. Altyn güýzüň ilkinji günündäki joşgunly dabaralar Döwlet senamyzyň ýaňlanmagy bilen başlandy. Arkadagly Gahryman Serdarymyzyň täze okuw ýyly mynasybetli ýurdumyzyň mekdep okuwçylaryna, talyp ýaşlaryna, mugallymlaryna we ähli bilim işgärlerine iberen Gutlagy dabara gatnaşyjylaryň ruhuny has-da belende göterdi.

Welaýat boýunça şu ýyl ilkinji gezek ak mekdepleriň bosagasyndan ätlän 6 ýaşly çagalaryň 18 müňe golaýyna «Bilimli» atly noutbuk kompýuterleriniň gowşurylmagy olaryň şatlygyna şatlyk goşdy. Bu günki wakalar welaýatyň bilim-terbiýeçilik edaralarynda işe başlan 900-den gowrak ýaş hünärmeniň durmuşynda-da aýratyn ähmiýete eýe boldy.

Aýdo ŞEKEROW.

(Öz habarçymyz).

BALKANDA

Bilimler we talyp ýaşlar güni mynasybetli dabaralar welaýatyň ähli etrapdyr şäherlerinde ýokary ruhubelentlige beslendi. Bagtyýar çagalara hormatly Prezidentimiziň, Gahryman Arkadagymyzyň adyndan noutbuk kompýuterleriniň sowgat berilmegi olaryň begenjini has-da artdyrdy.

Häzirki wagtda Balkan welaýatynyň çäginde 165 sany umumybilim berýän orta mekdep, 173 sany mekdebe çenli çagalar edarasy, kömekçi mekdep-internat, Saglygy dikeldiş okuw-terbiýeçilik toplumy, çagalar öýi, 11 sany Çagalar we ýetginjekler döredijilik öýi hereket edýär.

Geçen okuw ýylynda welaýatda orta mekdepleri tamamlan uçurymlaryň 7193-sine orta bilim hakyndaky şahadatnama, 7168-sine hünär hakyndaky şahadatnama dabaraly ýagdaýda gowşuryldy.

Täze okuw ýylynyň başlanmagy mynasybetli guralan dabaralar ir säher bilen şatlyk-şowhuna beslendi. Hormatly Prezidentimiziň baýramçylyk Gutlagy okalandan soňra ýaňlanan ilkinji jaň sesleri 2025-2026-njy okuw ýylyna badalga berdi. Döwrebap aýdym-sazlar, tans toparlarynyň joşgunly çykyşlary baýramçylyk dabaralaryna gatnaşanlara egsilmez ruhy lezzet paýlady.

Şu ýyl welaýat boýunça 6 ýaşly çagalaryň 10 müňe golaýy ilkinji gezek ak mekdebiň bosagasyndan ätledi. Ýeri gelende bellesek, şu ýyl welaýat boýunça orta mekdepleri tamamlan ýaşlaryň ençemesi ýokary we orta hünär okuw mekdepleriniň talyplary boldy.

Arazguly HUDAÝGULYÝEW.

(Öz habarçymyz).

DAŞOGUZDA

Täze okuw ýylynyň başlanmagy welaýatyň ähli künjeklerinde Bilimler we talyp ýaşlar güni mynasybetli geçirilen baýramçylyk çäreleri bilen utgaşdy. Daşoguz şäherinde welaýat kitaphanasynyň dabaralar meýdançasy toý lybasyna beslendi. Bu ýerde welaýat we şäher häkimlikleriniň, Baş bilim, Saglygy goraýyş, Medeniýet müdirlikleriniň, jemgyýetçilik guramalarynyň bilelikde guramagynda geçirilen baýramçylyk çäresi ýatdan çykmajak şatlykly wakalaryň biri boldy. Täze okuw ýylynyň başlanmagy mynasybetli welaýatyň ähli bilim edaralarynda giň gerimli dabaralara uly orun berildi. Ähli bilim ojaklarynda okuw ýylynyň ilkinji sapagy toýly ýylymyzyň şanyna «Halkara parahatçylyk we ynanyşmak ýyly» diýen at bilen geçirildi hem-de ol aýratyn many-mazmuna eýe boldy. Şu ýyl welaýat boýunça 6 ýaşly çagalaryň 33 müňden gowragy ilkinji gezek ak mekdebiň bosagasyndan ätledi.

Ýeri gelende bellesek, demirgazyk welaýatyň çägindäki jemi 531 mekdebiň ählisiniň işini kämilleşdirmek, olarda ýaşlara berilýän bilimiň hiliniň dünýä derejesine laýyk bolmagyny gazanmak ugrunda yzygiderli tagallalar edilýär. Welaýatda 31 ugur boýunça ýöriteleşdirilen orta mekdepler bolup, olarda ýaşlara iňlis, fransuz, nemes, arap, hytaý, ýapon, pars, italýan dilleri hem-de tebigy we takyk ugurly dersler boýunça ýörite maksatnamalaýyn bilim berilýär.

Amanmyrat SAPAROW.

(Öz habarçymyz).

LEBAPDA

Mukaddes Garaşsyzlygymyzyň şanly 34 ýyllyk baýramy bilen gelen güýzüň ilkinji gününde ýurdumyzyň gündogar sebiti hem täze okuw ýylyny ýatdan çykmajak wakalar bilen garşylady. Çärjew etrabyndaky 29-njy orta mekdebiň täze binalar toplumynyň açylyp ulanmaga berilmegi sebitde eýýäm birnäçe ýyldan bäri dowam edip gelýän asylly däbiň mynasyp dowamatyna öwrüldi.

400 okuwça niýetlenen mekdebiň gurluşyk işlerini gündogar sebitde bilim we terbiýeçilik binalaryny gurmakda baý tejribe toplan «Ussat Tirkiş» hususy kärhanasynyň gurluşykçylary alyp bardylar. Onda ýaş nesliň döwrebap derejede bilim almagy üçin ähli mümkinçilikler bar. Täze mekdepde etrabyň Hojaili geňeşliginiň çagalary bilim alar.

Bilimler we talyp ýaşlar güni mynasybetli dabaralar welaýatyň ähli etrap-şäherlerinde geçirildi. Hususan-da, birinji synpa okuwa kabul edilen körpeler bilen bagly çäreler aýratyn gyzykly boldy. Şu ýyl gündogar sebitde bagtyýar çagajyklaryň 24 müň 832-si ilkinji gezek ak mekdebiň bosagasyndan ätlediler. Olara hormatly Prezidentimiziň we Gahryman Arkadagymyzyň adyndan öwrediji kompýuterler sowgat berildi. Welaýat Baş bilim müdirliginiň wekilleriniň habar bermegine görä, sebitdäki 400-e golaý orta mekdepde 330 müňden gowrak okuwçy bilim alýar.

Seýitnazar Seýdi adyndaky Türkmen döwlet mugallymçylyk institutynda, sebitdäki ýörite we orta hünär okuw mekdeplerinde-de täze okuw ýylynyň ilkinji sapaklary aýratyn täsirli boldy. Türkmenabat şäherindäki baýry ýokary okuw mekdebi täze okuw ýylyna talyplaryň 5 müňden gowragy bilen girişdi. Olaryň müňden gowragy bolsa talyplyk dünýäsine ilkinji gezek gadam goýan ýaşlardyr.

Agageldi ITALMAZOW.

(Öz habarçymyz).

MARYDA

Ýurdumyzda Arkadagly Gahryman Serdarymyzyň parasatly baştutanlygynda milli bilim ulgamyny döwrebaplaşdyrmak we sanly bilimi has-da ösdürmek maksady bilen düýpli özgertmeler amala aşyrylýar. Bu ugurda Mary welaýatynda hem giň gerimli işler durmuşa geçirilýär. Welaýatda 2025-2026-njy okuw ýylynyň başlanmagy hem-de Bilimler we talyp ýaşlar güni mynasybetli guralan dabaralarda, baýramçylyk çärelerinde muňa ýene bir ýola aýdyň göz ýetirildi.

Welaýatyň bilim işgärleri geçen okuw ýylyny oňat netijeler bilen jemlediler. Orta mekdepleri tamamlan müňe golaý uçurym ýokary we orta hünär okuw mekdepleriniň talyby boldy. Ýokary we orta hünär okuw mekdeplerini üstünlikli tamamlan ýaş mugallymlaryň 520-den gowragy bilim ojaklarynda işe başlady.

Welaýatda täze okuw ýylynyň başlanmagy mynasybetli geçirilen dabaralar şatlyk-şowhuna beslendi. Täze okuw ýylynyň ilkinji gününde 1-nji synpa barýan bagtyýar körpeleriň on müňe golaýyna hormatly Prezidentimiziň we Gahryman Arkadagymyzyň adyndan «Bilimli» atly noutbuk kompýuterleri dabaraly ýagdaýda gowşuryldy.

Baýramçylyk gününde Mary şäherinde Türkmenistanyň Döwlet energetika institutynyň täze goşmaça okuw binasynyň, umumy ýaşaýyş jaýynyň, sport desgasynyň hem-de aýlawly ýoluň ugrundaky monumentiň açylyş dabarasy hem aýratyn ýakymly pursatlara beslenip, mugallymlardyr talyplar üçin ajaýyp sowgat boldy.

Welmuhammet GALANDAROW.

(Öz habarçymyz).

Surata düşürenler Begençmyrat ATAÝEW, Andreý PAKULOW, Merdan ORAZOW.

Çeşmesi:Türkmenmetbugat