Çagalaryň ýürek owazlary — bagtyýarlyk mukamy

6-njy sentýabrda Ahal welaýatynyň Ak bugdaý etrabynyň «Nowruz ýaýlasyndaky» «Türkmeniň ak öýi» binasynda mukaddes Garaşsyzlygymyzyň 34 ýyllygy mynasybetli «Garaşsyzlygyň merjen däneleri» çagalar aýdym-saz bäsleşiginiň jemleýji tapgyryna gatnaşyjylaryň konsertiniň uly şatlyk-şowhuna beslenip geçirilmegi ýurdumyzyň bagtyýar çagalygyň mekanydygyny nobatdaky gezek subut etdi. Türkmenistanyň Prezidentiniň «Türkmeniň Altyn asyry» baýragyny almak ugrundaky bäsleşiginiň çäklerinde ýaş nesliň wekilleriniň arasynda her ýyl geçirilýän bu döredijilik festiwalyna ýurdumyzyň ähli künjeklerinden deslapky tapgyrlarda ýeňiji bolan zehinli çagalar gatnaşdylar. Dabaranyň dowamynda ýaşajyk artistler mähriban Watanymyzy, zähmetsöýer halkymyzy, türkmen topragynyň gözel tebigatyny ruhubelentlik bilen wasp etdiler. Gazetimiziň şu sanynda bäsleşigiň ýeňijileriniň ýürek buýsançlaryny okyjylarymyza ýetirmegi makul bildik.

Perhat GAÝITNAZAROW,

Aşgabat şäherindäki daşary ýurt dillerini, takyk, tebigy dersleri çuňlaşdyryp öwredýän ýöriteleşdirilen 140-njy orta mekdebiň 8-nji synp okuwçysy:

— Aýdym-saz — täsin dünýä. Men 6 ýaşymdan bäri aýdym aýdyp gelýärin. Okuwymdan boş wagtlarym bolsa Aşgabat şäheriniň Medeniýet müdirliginiň 2-nji çagalar sungat mekdebine gatnaýaryn. Ol ýerde bize mugallymlarymyz aýdym aýtmagyň hem-de sahnada täsirli çykyş etmegiň inçe syrlaryny öwredýärler. Bu gün bäsleşikde ýeňiji bolmagym hossarlarymy, şeýle hem dostlarymy örän begendirdi. Geljekde has-da kämilleşip, türkmen aýdym-saz sungatynyň ösüşine öz mynasyp goşandymyzy goşarys.

Muhammetemir ÇARYÝEW,

Arkadag şäherindäki iňlis dili dersine ýöriteleşdirilen 3-nji orta mekdebiň 8-nji synp okuwçysy:

— Bu gün meniň üçin ýatdan çykmajak günleriň biri boldy. Gazanan ýeňşim bolsa täze döredijilik üstünliklerine ruhlandyrýar. Bu bäsleşik körpe nesilleriň özboluşly sungat baýramçylygydyr. Çagalar aýdym-saz bäsleşigine taýýarlan mugallymymyza hem-de meni goldan ähli dostlaryma köp sagbolsun aýdýaryn. Bäsleşikde ýeňiji bolan ähli deň-duşlarymy hem tüýs ýürekden gutlaýaryn. Goý, mähriban Watanymyzda elmydama toýlar toýa ulaşsyn, şol ajaýyp dabaralarda bolsa aýdym-sazlarymyzyň belent owazy ýaňlanyp dursun!

Aýmelek TÄÇMUHAMMEDOWA,

Ahal welaýatynyň Kaka etrabyndaky tebigy ugurly dersleri çuňlaşdyryp öwredýän ýöriteleşdirilen 16-njy orta mekdebiň 4-nji synp okuwçysy:

— «Garaşsyzlygyň merjen däneleri» bäsleşigi gaty gyzykly hem-de ýatda galyjy boldy. Deň-duşlarymyzyň ýerine ýetiren ajaýyp çykyşlary her birimizi begendirdi. Aýdym aýdyp, tans edýän çagalaryň buýsançlary, ýylgyryşlary, mähirli el çarpyşmalary bizi ýeňşe ruhlandyrdy. Bäsleşikde «Ýylgyryş» atly rus aýdymyny ýerine ýetirdim. Ony tomaşaçylaryň gowy görendiklerini olaryň şadyýan el çarpyşmalaryndan hem duýdum. Şeýle uly bäsleşikde ýeňiji bolan günümi hemişe guwanç duýgulary bilen ýatlaryn.

Arzuw AGANYÝAZOWA,

Balkan welaýatynyň Türkmenbaşy şäherindäki 9-njy orta mekdebiň 7-nji synp okuwçysy:

— «Garaşsyzlygyň merjen däneleri» bäsleşiginiň jemleýji tapgyrynda «Joşgun» çagalar tans topary bilen «Çalsana, bagşy!» aýdymyny ýerine ýetirdim. Bäsleşigiň soňunda ýeňiji bolanlaryň arasynda adymyň tutulandygyna gaty tolgundym. Biz — bagtyýar çagalaryň arzuwlarynyň hasyl bolmagy üçin uly tagallalary edýän türkmen halkynyň Milli Lideri Gahryman Arkadagymyza hem-de hormatly Prezidentimize tüýs ýürekden sagbolsun aýdýarys.

Dädemyrat ARAZKLYÇOW,

Daşoguz welaýatynyň Boldumsaz etrabyndaky 76-njy orta mekdebiň 8-nji synp okuwçysy:

— Kiçiligimden türkmen halk aýdymlaryny höwes bilen diňleýärin. Teleýaýlymlarda halk aýdymlaryny aýdýan aýdymçylary görüp, meniňem uly çärelerde, bäsleşiklerde çykyş edesim gelýärdi. Ynha, bu gün bolsa şol arzuwym hasyl boldy. Bäsleşikde «Gümmürlendi» diýen türkmen halk aýdymyny ýerine ýetirdim. Tomaşaçylar bu aýdymy uly gyzyklanma bilen diňlediler hem-de goldadylar. Ýeňiji bolmagym has-da belent maksatlara ruhlandyrdy. Geljekde-de halypalaryň ussatlyk bilen aýdan aýdymlaryny diňläp, olaryň ýoluny mynasyp dowam etdireris.

Daýanç RAÝHANOW,

Lebap welaýatynyň Çärjew etrabyndaky daşary ýurt dillerine ýöriteleşdirilen 42-nji orta mekdebiň 8-nji synp okuwçysy:

— Mugallymymyz: «Maksadyňa ýetmäge yhlas edip, öz üstüňde köp işleseň, arzuwlaryň hökman hasyl bolar» diýýärdi. Bu, çyndanam, şeýle ekeni. «Garaşsyzlygyň merjen däneleri» çagalar aýdym-saz bäsleşigine gatnaşyp, jemleýji tapgyrda çykyş etmek bagtyna eýe boldum. Aýdym-saza kiçiligimden höwesli bolamsoň, mekdebimizde geçirilýän dürli çärelerde hem aýdym aýdýaryn. Bäsleşikdäki tomaşaçylaryň şowhunly el çarpyşmalary bolsa özüme bolan ynamymy has-da artdyrdy.

Jemşit GARÝAGDYÝEW,

Mary welaýatynyň Wekilbazar etrabyndaky 12-nji orta mekdebiň 7-nji synp okuwçysy:

— Asuda Watanymyzyň her bir güni toý-baýrama beslenýär. Men bu bäsleşikde «Aýjan» tans topary bilen birlikde Nury Baýramowyň sözlerine, Nury Muhadowyň sazyna döredilen «Parahatlyk guşy» atly aýdymy ýerine ýetirdim. Özüm 4-nji synpdan bäri aýdym aýdyp gelýärin. Meni bu bäsleşige halypam Parahat Öwezow taýýarlady. Geljekde bagşy bolup, toý-baýramlarymyzda aýdym aýtmagy arzuw edýärin. Eziz Diýarymyzy bagtyýar çagalygyň mekanyna öwren Gahryman Arkadagymyzyň hem-de Arkadagly Gahryman Serdarymyzyň janlary sag, belent başlary aman bolsun!

Taýýarlan Nury SAKÇYÝEW,

«Nesil».

Çeşmesi:Türkmenmetbugat