Sapaly hem şypaly gökdere

12-nji iýunda Türkmenistanyň Bilim ministrliginiň hem-de Türkmen döwlet bedenterbiýe we sport institutynyň bilelikde guramagynda Türkmenistanyň Merkezi bankynyň Gökderedäki Muhammetmyrat Nyýazow adyndaky çagalar sagaldyş we dynç alyş merkezinde «Şadyýan tomus ― 2026» ady bilen geçirilen merkezara ýaryş gyzykly pursatlara baý boldy. Oňa gatnaşan çagalar sportuň hereketli we sanly görnüşleri boýunça ukyp-başarnyklaryny görkezdiler.

Ir säherden bu ýerde aýdym-sazly dabara guraldy. Onda çagalaryň tanslaryna, ýaşajyk gimnastikaçylaryň çykyşlaryna tomaşa edildi. Ýaryşa gatnaşmaga gelen çagalar, ilki bilen, irki maşklary ýerine ýetirdiler. Soňra uly ruhubelentlik bilen ýaryşa badalga berildi. Ýaş nesilde toparlaýyn işlemek, agzybirlik, birek-birege hormat goýmak we maksada okgunlylyk ýaly oňyn şahsy häsiýetleri kämilleşdirmek maksady bilen geçirilen ýaryşa 8 ― 14 ýaşly çagalardan düzülen toparlaryň 14-si gatnaşdy.

Gyzykly geçen ýaryşda çagalar fijital — sport tansy, fijital-futbol, 3x3 basketbol, ylgaw ýaryşy, stoluň üstünde oýnalýan tennis, tanap çekmek, şaşka boýunça ýaryşdylar. Eminleriň baha bermeginde şahsy we toparlaýyn ýeňijiler yglan edildi. Netijede, toparlaýyn görnüşde Türkmenistanyň Söwda we daşary ykdysady aragatnaşyklar ministrliginiň Gökderedäki «Ýaşlyk» çagalar sagaldyş we dynç alyş merkezi 1-nji orna, Türkmenistanyň Merkezi bankynyň Gökderedäki Muhammetmyrat Nyýazow adyndaky çagalar sagaldyş we dynç alyş merkezi 2-nji orna, Türkmenistanyň Suw hojalygy baradaky döwlet komitetiniň Gökderedäki «Altyn damja» çagalar sagaldyş we dynç alyş merkezi hem 3-nji orna mynasyp boldy. Olar Hormat hatlary, kuboklar we ýadygärlik sowgatlar bilen sylaglandy. Biz hem bu ýere gelen çagalaryň birnäçesi bilen söhbetdeş bolduk.

Leýli MÖWLAMOWA,

Birleşen Arap Emirlikleriniň Prezidenti Şeýh Zaid bin Sultan Al Nahaýýan adyndaky Döwletliler köşgüniň 5-nji synp okuwçysy:

― 2025-2026-njy okuw ýylyny gowy bahalar bilen tamamlap, Gökdere jülgesindäki «Çynar» çagalar sagaldyş we dynç alyş merkezine dynç almaga geldim. Bu ýerde deň-duşlarym bilen dürli bäsleşiklere gatnaşyp, köp zatlary öwrenýärin. Bu gün hem topardaşlarym bilen «Şadyýan tomus ― 2026» atly merkezara ýaryşa gatnaşýaryn. Men fijital-sport tans görnüşi boýunça ýaryşa gatnaşýaryn. Tans bilen meşgullanmak meniň iň halaýan güýmenjäm. 7 ýaşymdan bäri Döwletliler köşgüniň «Joşgun» tans toparyna gatnaýaryn.

Men şu ýyl «Iň eýjejik gyzjagaz — 2026» diýen ada mynasyp boldum. Ýaşajyk zehinleriň ýagty geljegi üçin ençeme işleri durmuşa geçirýän Gahryman Arkadagymyza, Arkadagly Gahryman Serdarymyza sagbolsun aýdýaryn.

Ýusup AKMYRADOW,

Sarahs etrabyndaky 11-nji orta mekdebiň 7-nji synp okuwçysy:

― Bu günki geçirilýän ýaryşyň maksady ýaş nesli sporta höweslendirmek we Gökderedäki çagalar sagaldyş we dynç alyş merkezleriniň arasynda dostlukly gatnaşyklary pugtalandyrmakdan ybarat. Şeýle bäsleşikler, duşuşyklar yzygiderli guralýar. Bu bolsa bizde uly täsir galdyrýar. Men «Çeşme» çagalar sagaldyş we dynç alyş merkezinde dynç alýaryn. Boş wagtlarym kitap okaýaryn. Şeýle hem birnäçe gurnaklara gatnap, mugallymlaryň berekellasyny alýaryn.

Men bu günki ýaryşa tomaşaçy hökmünde geldim. Sportuň dürli görnüşleri boýunça bäsleşmäge gelen oglan-gyzlaryň ählisine şowlulyk arzuw edýärin.

Meýlis SAPAROW,

Türkmenabat şäherindäki 29-njy orta mekdebiň 8-nji synp okuwçysy:

― Men bu ýaryşa ykjam taýýarlanyp geldim. Sportuň basketbol görnüşini gowy görýärin. Şeýle hem şaşka we tennis bilen gyzyklanýaryn. Bu günki ýaryşda basketbol boýunça bäsleşýärin.

«Demirýolçy» çagalar sagaldyş we dynç alyş merkezine men eýýäm üç ýyl bäri dynç almaga gelýärin. Her gezek gelenimde, bu ýerde täze dostlar edinýärin. Gyzykly zatlary öwrenýärin. Şu günki ýaryşa gatnaşýan ähli deň-duşlaryma üstünlik arzuw edýärin. Biz bagtyýar nesillere ähli mümkinçilikleri döredip berýän Milli Liderimiziň, hormatly Prezidentimiziň janlary sag, belent başlary aman bolsun!

Mährijemal ÇARYÝEWA,

«Watan».

Çeşmesi:Türkmenmetbugat