"Bedew münen hassa bolsa, sag bolar"

Mälim bolşy ýaly, Ahalteke bedewlerimiz öz köpasyrlyk taryhy, gaýtalanmajak özboluşlylygy, ýyndamlygy we aýratyn gözelligi boýunça umumadamzat siwilizasiýasynyň gymmatly hazynasydyr. Bedew atlaryň türkmen halkynyň durmuşyndaky we ykbalyndaky möhüm ähmiýeti barada Gahryman Arkadagymyzyň kitaplary atlaryň bu gadymy tohumynyň gelip çykyşynyň we kemala gelmeginiň taryhy barada giňişleýin gürrüň berýär. 

Gahryman Arkadagymyzyň «Atda wepa-da bar, sapa-da» atly kitaby şol maglumatlaryň üstüni ýetirip, behişdi bedewlerimiziň şan-şöhratyny tutuş dünýä ýaýýar. Gahryman Arkadagymyz bu kitabynda «...halkymyzyň watançylygynyň ynsanperwerlik ýörelgeleriniň kemala gelmeginde bedewleriň ornunyň has ýokary bolupdyr diýmek bilen» nesil terbiýesinde ganatly bedewlerimiziň hem ýakyn arabaglanyşygynyň bardygyny belläp geçýär.

Hormatly Gahryman Arkadagymyzyň çuňňur paýhasyndan syzylyp çykan behişli bedewlerimiz hakyndaky gymmatly eserleri tutuş halkymyzyň taryhymyz we milli gymmatlyklarymyz hakynda bilimleriniň has-da ýokarlanmagynda möhüm gollanma bolup durýar. Çünki bedewler biziň milli buýsanjymyz, uçar ganatymyz hem-de köňül syrdaşymyz bolup türkmen durmuşynyň aýrylmaz bölegidir.

Türkmen bedewleriniň owadanlykda, çalasynlykda, ukyp-başarnyklarynda deňi-taýy bolmandyr. Eýesiniň her bir hereketlerine, duýgularyna werziş bolan bedew at onuň sesinden, hereketinden, ýürek urşundan ýagdaýy duýupdyr. Türkmen bedewleriniň dünýä meşhur ajaýyplyklarynyň birine öwrülmeginde türkmen seýisleriniň ähmiýeti örän uludyr.

Serkerde şahyrymyz Seýitnazar Seýdi hem bedewlerimiziň waspyny şeýle ýetirýär:

Bedew münen hassa bolsa sag olur,

Çeşmi hyra bolur, keýpi çag olur,

Köňli hup açylan täze bag olur,

Gunça-gülüstandyr üsti bedewiň.

Atlaryň bu tohumy türkmen topragynda halk seçgiçiliginiň esasynda müňýyllyklaryň dowamynda kemala getirilipdir. Türkmenistanda gözelligiň we ajaýyplygyň nusgasy hasaplanylýan ahalteke bedewleriniň dünýä derejesindäki at-abraýynyň has hem belende galdyrylmagy ugrunda ähmiýetli işler durmuşa geçirilýär. Türkmenistanda atly sportuň dürli görnüşleri bilen meşgullanmak, halkara derejesindäki ýaryşlary geçirmek, şeýle-de bedewleriň häzirki döwrüň ösen talaplaryna laýyklykda saklanylmagy babatynda zerur bolan ähli şertler döredilýär.

Mähri DAŇATAROWA,

M.Garryýew adyndaky Türkmenistanyň Döwlet

lukmançylyk uniwersitetiniň Lukmançylyk

fizikasy we informatikasy kafedrasynyň mugallymy.