Türkmenistanyň we Ýaponiýanyň Halkara gatnaşyklary institutlarynyň ýolbaşçylary hyzmatdaşlygyň geljegi barada maslahatlaşdylar

27-nji aprelde Tokioda Türkmenistanyň we Ýaponiýanyň Halkara gatnaşyklary institutlarynyň ýolbaşçylarynyň duşuşygy boldy. Oňa Türkmenistanyň Daşary işler ministrliginiň Halkara gatnaşyklary institutynyň rektory Jumamyrat Gurbangeldiýew, Ýaponiýanyň Halkara gatnaşyklary institutynyň baş müdiri hanym Tomiko Itikawa, Türkmenistanyň Ýaponiýadaky ilçisi A.Baýramow we iki tarapyň wekilleri gatnaşdylar.

Duşuşygyň dowamynda iki ýurduň arasyndaky akademiki hyzmatdaşlygy we ylmy gatnaşyklary pugtalandyrmak meseleleri ara alnyp maslahatlaşyldy. Iki ýurduň hünärmenleriniň arasynda yzygiderli gepleşikleri, ylym-bilim ulgamynda pikir alyşmak boýunça onlaýn okuw sapaklaryny geçirmek, bilelikde ylmy neşirlerde çykyş edip, hünärmenleri alyş-çalyş maksatnamasyny işe girizmek ýaly ugurlarda hyzmatdaşlygy berkitmek babatda pikir alşyldy.