Hytaýda BMG-niň 4-nji Bütindünýä maglumat forumy öz işine başlady

Hytaýyň gündogaryndaky Hançžou şäherinde BMG-niň 4-nji Bütindünýä maglumat forumy başlandy – diýip, China daily habar berýär.

100-den gowrak ýurduň wekiliýetleriniň gatnaşýan forumy bütindünýä öndürijileriniň we maglumatlardan peýdalanyjylaryň arasynda hyzmatdaşlygy höweslendirmäge, maglumata adalatly we açyk elýeterliligiň ýoluny üpjün etmäge gönükdirilendir.

«Biziň dünýämiziň mümkinçiliklerini giňeldýän maglumatlara tarap ýol» şygary astynda geçirilýän çäre dört sany esasy ugra: maglumatlar babatynda innowasiýalar we hyzmatdaşlyk, maglumatlaryň gymmatyny barlamak, olaryň hakykylygyny ýokarlandyrmak we maglumatlaryň ynamly ekologiýasyny gurmaga gönükdirilendir.

«Häzir, XXI asyrda maglumatlar geçen asyrda nebitiň eýe bolan gymmaty ýaly gymmata eýedir, olar ösüşiň we öňe gidişligiň hereketlendiriji güýjüdir. Bu forum — maglumatlaryň özgerdiji güýjüne itergi bermek we şu tankydy möhüm pursatda ösüşi çaltlandyrmak üçin esasy mümkinçilikdir» — diýip, BMG-niň Baş sekretary Antoniu Guterriş foruma gatnaşyjylara iberen gutlag hatynda nygtady.

2020-nji ýylda BMG Çžeszýan welaýatynda uly maglumatlaryň dört sany sebitleýin merkezinden birini döretdi. Geçen ýyl welaýatda BMG-niň ýene-de bir instituty — geogiňişlik bilimleriniň we innowasiýalaryň Bütindünýä merkezi esaslandyryldy.

«Hytaý 2030-njy ýyla çenli döwür üçin Gün tertibini “maglumatlary dolandyrmak” arkaly ýerine ýetirmäge kömek etmek üçin beýleki ýurtlar bilen işlär we maglumatlar babatynda açyk, özara bähbitli halkara hysmatdaşlygyny saklar we ähli ýurtlaryň umumy ösüşine we öňe gitmegine ýardam eder» — diýip, HHR-nyň başlygy Si Szinpin forumyň gatnaşyjylaryna ugradan gutlag hatynda belledi.

Hytaýyň Milli statistika býurosy we Çžeszýan welaýatynyň hökümeti tarapyndan guralan bu forum penşenbe gününe çenli dowam eder.