«Oguz hanyň zehinli nesilleri» olimpiadanyň II tapgyry 8-nji aprelde geçiriler

Türkmenistanyň Oguz han adyndaky Inžener-tehnologiýalar uniwersiteti tarapyndan geçirilýän «Oguz hanyň zehinli nesilleri» atly integrirlenen olimpiadanyň II tapgyryna, ýagny welaýat we Aşgabat şäher tapgyryna ýokary derejede taýýarlyk görülýär. II tapgyr 9-10-11-nji synp mekdep okuwçylarynyň arasynda şu ýylyň aprel aýynyň 8-ne welaýat merkezlerinde we Türkmenistanyň Oguz han adyndaky Inžener-tehnologiýalar uniwersitetiniň özünde geçiriler.

Integrirlenen olimpiadada ýumuşlar «Matematika», «Fizika», «Himiýa», «Biologiýa» we «Iňlis dili» dersleri boýunça berler. Guramaçylyk toparynyň çözgüdi esasynda, her synp boýunça 5 sany okuwçy (IX synpdan — 5, X synpdan (6 ýaş) — 5, X synpdan (7 ýaş) — 5, XI synpdan — 5), jemi 20 okuwçy ýeňiji diýlip yglan ediler we olar «Oguz hanyň zehinli nesilleri» atly altyn gaznanyň II derejeli agzalary hökmünde hasaba alnar.

Mekdep okuwçylarynyň II tapgyra taýýarlanmagy üçin usuly gollanmalar uniwersitetiň etut.edu.tm web sahypasynda ýerleşdirilendir.

Ýatlap geçsek, integrirlenen olimpiadanyň I tapgyryna ýurt boýunça 30 müňe golaý okuwçy gatnaşypdy we şolardan 1,5 müňe golaýy II tapgyra gatnaşmaga hukuk gazandylar. II tapgyrda ýeňiji bolan okuwçylar olimpiadanyň ahyrky — döwlet tapgyry bolan III tapgyra gatnaşmaga hukuk gazanarlar. III tapgyr uniwersitetiň özünde «Tomusky okuw» görnüşinde geçiriler.

I tapgyryň ýeňijileri, II tapgyryň geçiriljek senesi we ýeri baradaky maglumatlar bilen uniwersitetiň web sahypasy arkaly tanşyp bilersiňiz.