Konsepsiýa durmuşa geçirilýär

Berkarar döwletimiziň bagtyýarlyk döwründe ýurdumyzyň milli bilim ulgamy dünýä derejesine çykýar. Bilim ulgamynda amala aşyrylýan beýik özgertmeler bu günki gün özüniň oňyn netijeleri berýär. Şu ýylyň maý aýynda kabul edilen ,,Umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli konsepsiýasynyň kabul edilmegi ýurdumyzda taryhy waka boldy. Täze okuw ýylynyň barha ýakynlaşmagy bilim işgärleriniň öňünde möhüm wezipeleri goýdy.

Kabul edilen konsepsiýanyň many-mazmunyny, ähmiýetini, maksadyny, wezipelerini bilim işgärlerine wagyz etmek, düşündirmek boýunça ylmy usuly maslahatlar, söhbetdeşlikler, usuly okuwlar yzygiderli geçirilýär. 14-nji awgustda Halaç etrabynyň 31-nji orta mekdebiniň binýadyna geçirilen ,,Umumybilim maksatnamalary boýunça okatmagyň usulyýetini kämilleşdirmegiň Konsepsiýasy: ösüşlere, täze mümkinçiliklere, üstünliklere ýol" atly ylmy-usuly maslahat geçirildi. Ylmy-usuly maslahaty Türkmenistanyň Milli bilim instituty, Lebap welaýat Baş bilim müdirligi bilelikde gurady. Maslahata etrabyň orta mekdepleriniň, çagalar baglarynyň ýolbaşçylary we okuw dersleri boýunça usuly birleşmeleriň ýolbaşçylary, şeýle-de öňdebaryjy bilim işgärleri gatnaşdylar.

Maslahatda Türkmenistanyň Milli bilim institutynyň bölüm müdiri, biologiýa ylymlarynyň dosenti Sapargeldi Durdyýew ,,Umumybilim maksatnamalary boýunça okatmagyň usulyýetini kämilleşdirmegiň Konsepsiýasynyň” many-mazmunyny giňişleýin düşündirdi. Ýurdumyzda kabul edilmeginiň maksatlary bilim ulgamyny halkara derejesine çykarmak, bilimiň hiliniň has-da ýokarlandyrmak, okatmagyň usulyýetini halkara derejesine çykaryp milliliklerimize hormat goýýan şahsyýetleri kemala getirmek, bilim işgärlerini döredijilik başarnyklaryny ösdürmek bolup durýandygyny nygtady we Konsepsiýasynyň baplary bilen içgin tanyşdyrdy.

Soňra Milli bilim institutynyň uly ylmy işgäri Agamyrat Hommadow kabul edilen Konsepsiýanyň wezipeleri we ony iş ýüzünde amal etmekde alnyp barylmaly işler dogrusynda giňişleýin durup geçdi. Bu Konsepsiýasynyň esasy wezipeleri umumybilim maksatnamalary boýunça okatmagyň usulyýetini kämilleşdirmegiň esasy ugurlaryny we ýollaryny kesgitlemek, umumybilim maksatnamalary boýunça pedagogik işgärleri taýýarlamagyň, gaýtadan taýýarlamagyň, hünär derejelerini ýokarlandyrmagyň, pedagogik işgärleriň hünär ussatlyklaryny, bilimlerini we başarnyklaryny kämilleşdirmegiň ulgamyny döwrebaplaşdyrmak, pedagogik ugurly ýokary (orta) hünär bilim edaralarynda umumybilim maksatnamalary boýunça okatmagyň usulyýetine degişli dersleriň okuw maksatnamalarynyň nazary hem-de usulyýet esaslaryny döwrebaplaşdyrmagy, mazmunyny baýlaşdyrmagy we hilini ýokarlandyrmagy yzygiderli dowam etmek, okatmagyň usulyýetini kämilleşdirmek arkaly okuw işini okaýanlaryň her biri bilen aýratynlykda alyp barmak (indiwiduallaşdyrmak) ýörelgelerini bilim ulgamyna tapgyrlaýyn ornaşdyrmak, döwrebap innowasion tehnologiýalary, şeýle hem sanly bilim tehnologiýalaryny okuw-terbiýeçilik işinde giňden ulanmak arkaly umumybilim maksatnamalary boýunça okatmagyň usulyýetini kämilleşdirmäge degişli täze elektron okuw-usulyýet toplumlaryny taýýarlamak bolup durýandygyny aýratyn belledi.

Soňra Lebap welaýat Baş bilim müdirliginiň umumy bilim bölüminiň müdiri Kerim Maşeripow Konsepsiýadan geljekde garaşylýan netijeler dogrusynda çykyş etdi. Ol öz çykyşynda geljekde şu netijelere : umumybilim maksatnamalary boýunça okatmagyň usulyýetini kämilleşdirmek işine innowasion tehnologiýalary ornaşdyrmak dowam etdiriler, okatmagyň usullary, usulyýet tärleri, serişdeleri okuwçylaryň akyl ýetirijilik başarnyklaryny, öwrenijilik işjeňligini, konstruktorçylyk ukybyny, özbaşdak pikirleniş endiklerini ösdürmäge gönükdiriler; okatmagyň innowasion usullaryny okuw-terbiýeçilik işlerine giňden ornaşdyrmagyň esasynda umumybilim maksatnamalary boýunça meýilnamalar we okuw maksatnamalary, okuw kitaplary we gollanmalary, şol sanda elektron okuw serişdeleri ylmylyk, millilik, taryhylyk, yzygiderlilik, nazaryýet bilen amalyýetiň utgaşyklylygy, dersara baglanyşyklylyk, döredijilikli çemeleşmek ýaly ýörelgeleriň esasynda yzygiderli kämilleşdiriler hem-de halkara ülňülerine laýyklykda döwrebaplaşdyrylar; umumybilim maksatnamalary boýunça okatmagyň usulyýetine degişli okuw dersleriniň mazmuny we onda berilýän okuw maglumatlary milli we dünýä ösüşiniň hem-de ylmyň gazananlaryna laýyklykda baýlaşdyrylar; okuw derslerini okatmagyň usulyýetinde ylmylyk, durmuş bilen arabaglanyşyklylyk, terbiýeleýjilik, okuwçylara aýratynlykda çemeleşmek, bilimi akyl ýetirip, düşünip, berk özleşdirmek, berilýän bilimiň okuwçylaryň güýjüne kybap bolmak, görkezme esbaply okatmak ýaly ýörelgeler esasynda kämilleşdirmek dowam etdiriler; PISA, TIMSS, PIRLS maksatnamalarynyň görkezijilerini milli bilim ulgamyna ornaşdyrmak boýunça işler alnyp barlar we olaryň esasynda yzygiderli seljermeler geçirilmek garaşylÿandygyny belledi.

Maslahatda etrabyň 25 -nji orta mekdebiniň matematika mugallymy Agageldi Hojaýew, 24-nji orta mekdebiniň iňlis dili mugallymy Şageldi Ýabanow dagylar çykyş etdiler. Işlemeklik üçin döredilýän mümkinçiliklerden peýdalanyp geljekde has-da gaýratly zähmet çekip ýaşlar bilim-terbiýe berjekdiklerini etrabyň bilim işgärleriniň adyndan ynandyrdylar. Şeýle-de Konsepsiýany durmuşa geçirmekde, bilim işgärleriniň arasynda wagyz etmekde yhlasly işlejekdiklerini bellediler. 

Rahmanguly Ýazhanow

ylym we bilim işgärleriniň kärdeşler arkalaşyklarynyň 

Halaç etrap Geňeşiniň başlygy.

Türkmenistanyň Milli bilim instituty.