Okuw-terbiýeçilik işlerini guramagyň usullary

Murgap etrabynyň bilim bölüminiň düzümindäki mekdeplerde we mekdebe çenli çagalar edaralarynda zähmet çekýän bilim işgärleriniň usuly-amaly okuwlary işjeň ýagdaýda geçirilýär. Usuly-amaly okuwlarda Türkmenistanyň Bilim ministrligi, Türkmenistanyň Milli bilim instituty tarapyndan taýýarlanan usuly maslahatlar we hödürlenen temalar boýunça pikir we tejribe alşylýar. Usuly-amaly okuwlar etrabyň 18-nji, 19-njy, 36-njy orta mekdeplerinde, etrap merkezindäki «Bilim güzeri» okuw merkezinde, 1-nji, 6-njy çagalar bakja-baglarynda, «Ruhubelent» çagalar we ýetginjekler döredijilik öýünde guramaçylykly geçirilýär.   

Usuly-amaly okuwlarda Türkmenistanyň Milli bilim institutynyň jemgyýetçilik bilimleri bölüminiň müdiri Ogulbaýram Meläýewa «Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasyna» laýyklykda pedagogik işgärleriň hünär başarnyklaryny ýokarlandyrmagyň we mugallymçylyk ussatlygyny kämilleşdirmegiň ýollary», şol institutyň dil we edebiýat bölüminiň uly ylmy işgäri Gülaýym Sahatowa «Türkmen dili we edebiýat derslerinde okuwçylaryň kommunikatiw başarnyklaryny kemala getirmegiň usullary» diýen temalardan eden çykyşlary üns bilen diňlenildi. Mary welaýat Baş bilim müdirliginiň ýanyndaky Hünär derejesini ýokarlandyryş merkeziniň müdiri Akmyrat Kiçikulyýew hem «Okuw-terbiýeçilik işlerini döwrebap ýola goýmagyň usullary» diýen temadan täsirli çykyş etdi.  

Bilim işgärleriniň usuly-amaly okuwlarynda hödürlenen temalarda özleriniň iş tejribeleri boýunça gündelik sapaklarda multimedia, kompýuter enjamlaryndan netijeli peýdalanmagyň ähmiýeti barada, çagalara daşary ýurt dillerini öwretmekde öňde durýan wezipeler dogrusynda hem aýratyn bellenildi.

Annamyrat HOTJYÝEW,

Murgap etrap bilim bölüminiň hünärmeni.

* * *

Akdepe etrabyndaky tebigy ugurlara ýöriteleşdirilen 53-nji orta mekdepde hem usuly-amaly okuwlar dowam edýär. Şu gün şeýle okuw etrabyň mekdep müdirleriniň arasynda geçirildi. Usuly-amaly okuwlara Türkmenistanyň Milli bilim institutynyň wekilleri hem gatnaşdylar. Bu ýerde çykyş edenler bilim ulgamyny döwrebaplaşdyrmak, umumybilim maksatnamalary boýunça okatmagyň usulyýetini kämilleşdirmek babatdaky işleriň giň gerimde alnyp barylýandygy hakynda aýtdylar. Şeýle hem «Türkmenistanyň Prezidenti Serdar Berdimuhamedowyň «Ýaşlar – Watanyň daýanjy», «Änew – müňýyllyklardan gözbaş alýan medeniýet» atly kitaplarynyň many-mazmunyny okuw-terbiýeçilik işlerinde netijeli peýdalanylyşyna gözegçilik etmek», «Umumybilim edaralarynda hünär taýýarlygy boýunça hünär ugurly dersleri öwretmekde okatmagyň döwrebap usullarynyň okuw-terbiýeçilik işlerine ornaşdyrylyşy» atly temalardaky çykyşlar aýratyn mazmuna eýe boldy. Bular boýunça sowal-jogaplar alşyldy. Munuň özi usuly-amaly okuwlaryň täsirliligini has hem artdyrdy.

Arazmämet ALLANAZAROW,

Daşoguz welaýat Baş bilim müdirliginiň umumy orta bilim bölüminiň müdiri.

* * *

Balkan welaýat Baş bilim müdirliginiň umumybilim berýän orta mekdepleriniň we mekdebe çenli çagalar edaralarynyň bilim işgärleriniň awgust usuly-amaly okuwlary dowam edýär. Has takygy, usuly-amaly okuwlar Balkanabat şäherindäki 12-nji orta mekdepde, daşary ýurt dillerine ýöriteleşdirilen 15-nji orta mekdepde, iňlis dili, fizika we matematika okuw derslerine ýöriteleşdirilen 22-nji orta mekdepde, Türkmenbaşy şäherindäki daşary ýurt dillerine ýöriteleşdirilen 13-nji orta mekdepde, Türkmenbaşy etrabyndaky 1-nji orta mekdepde, Gyzylarbat etrabyndaky 17-nji, 28-nji, 29-njy orta mekdeplerde, Bereket etrabyndaky 19-njy orta mekdepde, Esenguly etrabyndaky 9-njy orta mekdepde, Etrek etrabyndaky 8-nji orta mekdepde ýokary guramaçylykly geçirilýär. Bilim işgärleriniň awgust usuly-amaly okuwlaryna Türkmenistanyň Milim bilim institutynyň mekdebe çenli terbiýe we başlangyç bilim bölüminiň müdiri Ogulmaral Matalowa hem-de jemgyýetçilik bilimleri bölüminiň esasy uly ylmy işgäri Gurbanjemal Nuryýewa dagy hem gatnaşdylar. Okuwlara gatnaşanlar hormatly Prezidentimiziň bilim ulgamyna berýän taýsyz tagallalary üçin çäksiz hoşallyk aýtdylar. 

Jumageldi ANNAMÄMMEDOW,

Balkan welaýat Baş bilim müdirliginiň ýanyndaky döwlet umumybilim edaralarynyň mugallymlarynyň we mekdebe çenli çagalar edaralarynyň terbiýeçileriniň hünär derejesini ýokarlandyryş merkeziniň müdiri.

Çeşmesi: Türkmenmetbugat