V Açyk Halkara Matematika Olimpiadasynyň ýeňijileri sylaglaýyş dabarasy

18-nji aprelde Halkara ynsanperwer ylymlary we ösüş uniwersitetinde V Açyk Halkara Matematika Olimpiadasynyň sylaglandyrylyş dabarasy boldy.

Uniwersitetiň girelgesinde Gahryman Arkadagymyzyň, Arkadagly Gahryman Serdarymyzyň jöwher paýhasyndan syzylyp çykan eserlere bagyşlanan sergi, şeýle-de sanly ulgamyň sansyz mümkinçilikleriniň Türkmenistanyň Bilim ulgamyna giňden ornaşdyrylandygyny şöhlelendirýän sergi daşary ýurtlylaryň ünsüni özüne çekdi. Halkara ynsanperwer ylymlary we ösüş uniwersitetiniň Maslahatlar zalynda ýaňlanan ajaýyp aýdym-sazly çykyşlar gatnaşyjylary joşguna geltirdi. Bu ýerde V Açyk Halkara Matematika Olimpiadasynyň ýapylyş dabarasy mynasybetli birnäçe aýdym-sazly çykyşlar ýerine ýetirildi. Aýdym-sazly çykyşlarda gözel Watanymyzyň gül goýnunda amala aşyrylýan beýik işler özüniň aýdyň beýanyny tapdy. Uly şatlyk-şowhuna beslenen sylaglandyrylyş dabarasynda Halkara ynsanperwer ylymlary we ösüş uniwersitetiniň talyplary tarapyndan ýerine ýetirilen aýdym-sazly çykyşlara tomaşa eden daşary ýurtly myhmanlar türkmen medeniýetiniň, türkmen sungatynyň ajaýyp älemine bir pursat seýran etdiler. Ýaňlanan ajaýyp aýdymlar, ýerine ýetirilen milli tanslar myhmanlarda ýatdan çykmajak ýakymly täsirleri galdyrdy.

Açylyş dabarasyna bagyşlanan aýdym-sazly çykyşlardan soňra V Açyk Halkara Matematika Olimpiadasynyň sylaglandyrylyş dabarasy boldy. Netijlere laýyklykda Türkmenistanyň ýokary okuw mekdepleriniň talyp ýaşlary jemi 201 medala, Özbegistan Respublikasynyň talyp ýaşlary jemi 77 medala, Russiýa Federasiýasynyň talyp ýaşlary jemi 29 medala, Birleşen Arap Emirlikleriniň talyp ýaşlary jemi 5 medala, Hindistan Respublikasynyň talyp ýaşlary jemi 2 medala, Polşa Respublikasynyň talyp ýaşlary jemi 1 medala, Rumyniýanyň talyp ýaşlary jemi 1 medala, Indoneziýa Respublikasynyň talyp ýaşlary jemi 1 medala,

Düzgünnama laýyklykda, bäsleşigiň emin agzalary ýurdumyzyň we bu bäsleşige gatnaşýan daşary ýurtlaryň ýokary okuw mekdepleriniň professor mugallymlaryndan ybarat bolar. Olimpiadanyň çäklerinde paýtagtymyza gelen myhmanlar üçin gadymy Nusaý galasyna, Türkmenistanyň Döwlet medeniýet merkeziniň Döwlet muzeýine, şeýle-de paýtagtymyzyň «Aşgabat», «Arkaç», «Berkarar», «Gülzemin» ýaly söwda we dynç alyş merkezlerine gezelençleri guraldy. Daşary ýurtly myhmanlar içinde ähli şertleri döredilen Halkara ynsanperwer ylymlary we ösüş uniwersitetiniň Umumy Ýaşaýyş Jaýynda wagtlaryny gyzykly geçirdiler. Mundan başga-da, uniwersitetiň sport toplumyndaky oýun meýdançalarynda türkmen talyplary bilen bilelikde birnäçe sport oýunlaryny oýnadylar.

Halkara ynsanperwer ylymlary we ösüş uniwersiteti