GDA-nyň Hemişelik ygtyýarly wekilleriniň Geňeşiniň çäginde türkmen halkynyň Milli Lideriniň «Hakyda göwheri» atly kitabynyň tanyşdyrylyş dabarasy geçirildi

Ýakynda Garaşsyz Döwletleriň Arkalaşygynyň agza döwletleriň Hemişelik ygtyýarly wekilleriniň Geňeşiniň mejlisi geçirildi.

Duşuşyga Ýerine ýetiriji komitetiň başlygy – GDA-nyň Baş sekretary Sergeý Lebedew we onuň orunbasarlary, şeýle hem Arkalaşygyň tertipnamalaýyn we beýleki edaralarynyň ýanyndaky agza döwletleriň Hemişelik ygtyýarly wekilleri gatnaşdylar.

Çäräniň dowamynda Türkmenistanyň Belarus Respublikasyndaky Ilçisi N.Şagulýew türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň «Hakyda göwheri» atly kitaby bilen gatnaşyjylary tanyşdyrdy.

«Hakyda göwheri» atly kitabyň tanyşdyrylyş dabarasynyň çäginde Ilçi täze eserde watançylyk, Watan mukaddesligi, şeýle hem dostlugyň, parahatçylygyň we dünýä ýurtlary bilen hyzmatdaşlygy berkitmegiň möhümdigini görkezýän taryhy wakalara aýratyn üns berilýändigini belledi. Kitapda türkmen halkynyň özara kömek, myhmansöýerlik, agzybirlik, deňlik we adalat ýaly adamkärçilikli däpleri nygtalýar.

«Hakyda göwheri» atly kitapda türkmen halkynyň köp asyrlyk däp-dessurlarynyň dowamlylygyna, medeniýetleriň ählumumy dialogynyň ösmegine goşan goşandyna, şeýle hem oňyn Bitaraplyk syýasaty we dünýä jemgyýetçiliginiň ýurtlary bilen konstruktiw huzmatdaşlygyň çäginde Türkmenistanyň häzirki gazananlaryna aýratyn ähmiýet berilýär.

Çeşme: Türkmenistanyň Daşary işler ministrligi