Ýaş matematikleriň buýsandyryjy üstünlikleri

Berkarar döwletiň täze eýýamynyň Galkynyşy döwründe Hormatly Prezidentimiziň tagallalary bilen ýurdumyzyň bilim ulgamynda watanymyzyň geljegi bolan ýaş nesle berilýän bilimiň we terbiýäniň hilini dünýä derejesine ýetirmek ugrunda giň möçberli işler alnyp barylýar. Türkmenistan watanymyzda ýaş nesliň ýokary hilli bilim almaklary üçin ähli şertler döredilýär. Çagalar baglarydyr-mekdeplerimiz okuw-terbiýeçilik işlerini döwrüň talaplaryna laýyklykda alyp barmak üçin iň ýokary tehnologiýalar bilen üpjün edilýär. 

2025-nji ýylyň 24-29-njy iýuny aralygynda Demirgazyk Makedoniýa Respublikasynyň Struga şäherinde Ýaşlaryň 29-njy Balkan matematika olimpiadasy geçirildi. Bu olimpiada dünýäniň 23 döwletinden (Albaniýa Respublikasy, Azerbaýjan Respublikasy, Bosniýa we Gersogowina, Bolgariýa Respublikasy, Çernogoriýa Respublikasy, Horwatiýa Respublikasy, Kipr Respublikasy, Fransiýa Respublikasy, Rumyniýa, Gresiýa Respublikasy, Demirgazyk Makedoniýa Respublikasy, Gruziýa Respublikasy, Ermenistan Respublikasy, Malaýziýa, Molodowa Respublikasy, Saud Arabystan Patyşalygy, Gazagystan Respublikasy, Gyrgyz Respublikasy, Özbegistan Respublikasy, Ukraina,  Serbiýa Respublikasy, Türkiýe Respublikasy, Türkmenistan) 135 okuwçy, ýurdumyzdan 6 okuwçy gatnaşdy. Çekeleşikli geçen bu Olimpiada gatnaşan mekdep okuwçylarymyz üstünlikli çykyş edip, Aşgabat şäheriniň iňlis dili, himiýa we biologiýa okuw derslerini çuňlaşdyryp öwredýän 86-njy ýöriteleşdirilen orta mekdebiniň 9-njy synp okuwçysy Hemra Gurbanow altyn medala, 9-njy synp okuwçylary Atabaý Akmyradow, Ýeňiş Akmämmedow, Aşgabat şäheriniň dil derslerini çuňlaşdyryp öwredýän 87-nji ýöriteleşdirilen orta mekdebiniň 9-njy synp okuwçylary Ýusup Resulow, Parahat Ojarow kümüş medallara, Aşgabat şäheriniň iňlis dili dersine ýöriteleşdirilen 83-nji orta mekdebiniň 9-njy synp okuwçysy Omar Döwranow bürünç medala mynasyp boldular. Şeýlelikde, mekdep okuwçylarymyz 1 altyn, 4 kümüş we 1 bürünç medala eýe bolmagy başardylar.

Mekdep okuwçylarynyň bu abraýly halkara bäsleşiginde baýrakly orunlara mynasyp bolmaklary Hormatly Prezidentimiziň ýaş nesil baradaky yzygiderli aladalarynyň, hemmetaraplaýyn bilimli, intellektual we ruhy taýdan ösen, watansöýüji ýaşlary terbiýeläp ýetişdirmek meselelerine berýän hemişelik ünsüniň “Halkara parahatçylyk we ynanyşmak ýylynda” gazanylan nobatdaky netijeleridir.