Türkmenistanly çagalar 10-njy halkara medeni –bilim forumyna gatnaşdylar

Türkmenistanly çagalar 2025-nji ýylyň 7-16-njy iýuly aralygynda Belarus Respublikasynyň Minsk welaýatynda Garaşsyz Döwletleriň Arkalaşygyna gatnaşyjy döwletleriň Parlamentara Assambleýasynyň Geňeşiniň gurnamagynda geçirilýän “Arkalaşygyň çagalary” atly 10-njy halkara medeni-bilim forumyna gatnaşdylar. Beýik Watançylyk urşunda gazanylan Ýeňşiň 80 ýyllygyna bagyşlanyp geçirilen bu halkara foruma 8 döwletden çagalaryň 80-den gowragy gatnaşdy.

  Halkara foruma ýurdumyzdan gatnaşýan çagalar toparyna Ahal welaýatynyň Ak bugdaý etrabynyň 19-njy orta mekdebiniň mugallymy Honçagül Täşliýewa ýolbaşçylyk etdi.

  “Arkalaşygyň çagalary” atly 10-njy halkara medeni-bilim forumyna döwletimizden gatnaşan çagalar ýörite düzülen meýilnama esasynda geçirilen dürli görnüşli çärelere işjeň gatnaşdylar.

  Myhmansöýer belarus topragynda geçirilen ýubileý forum çagalaryň arasynda dostana gatnaşyklary ýola goýmakda, dost-doganlyk, özara ynanyşmak duýgularyny kemala getirmekde, ösüp gelýän ýaş nesli parahatçylyk söýüjilik ruhunda terbiýelemekde, çagalarda dürli halklaryň milli we medeni mirasy barada giňişleýin düşünjeleri döretmekde, durnukly gelejegi üpjün etmekde, çagalaryň bilimlerini täsirli maglumatlar bilen baýlaşdyrmakda ähmiýetli çäre hökmünde taryha girdi.

  Garaşsyz, hemişelik Bitarap Türkmenistandan foruma gatnaşan çagalar forumyň maksatnamasyna laýyklykda muzeýlere, milli syýahatçylyk seýilgählerine, etnomedeniýet we “Hatyn” ýadygärlikler toplumlaryna, milli kitaphana, Belarus Respublikasynyň Milli geňeşiniň muzeýine gezelenç etdiler. Şeýle hem halkara foruma gatnaşyjy döwletleriň günleriniň çäginde geçirilen medeni-bilim maksatly çärelere, Belarus döwletiniň tanymal aktýorlarynyň we artistleriniň gatnaşmagynda geçirilen halypaçylyk sapaklaryna, sport ýaryşlaryna, interaktiw usulda gurnalan çärelere, intellektual oýunlara, ekologik häsiýetli bäsleşiklere işjeň gatnaşdylar.

  2025-nji ýylyň 13-nji iýulynda halkara forumyň geçýän ýeri bolan “Zubrýonok” milli çagalar bilim-sagaldyş merkezinde Türkmenistanyň Belarus Respublikasyndaky Adatdan daşary we doly ygtyýarly ilçisi Nazarguly Şagulyýewiň gatnaşmagyndaTürkmenistanyň güni mynasybetli medeni-bilim maksatly çäre geçirildi.   

  Çäräniň geçirilen ýerinde gurnalan çagalaryň milli el işleriniň we çeken suratlarynyň sergisi foruma gatnaşyjylarda uly gyzyklanma döretdi. Ýurdumyza wekilçilik edýan mekdep okuwçylarynyň ata-babalarymyzdan we ene-mamalarymyzdan nesilden - nesle geçip gelýän milli senetçilik hem-de el işleriniň görnüşlerini ussatlyk bilen ýerine ýetirmekleri foruma gatnaşyjylar üçin has-da täsirli boldy. Foruma beýleki döwletlerden gatnaşýan çagalara milli senetçilik hem-de el işlerimiziň görnüşleri barada gyzykly maglumatlar berildi we milli däbimize eýerilip, ýurdumyzda öndürilýän süýjülikler hödür edildi. 

  Türkmenistanyň güni mynasybetli şatlyk-şowhuna beslenip geçirilen medeni-bilim çäresiniň dowamynda foruma gatnaşyjylar Türkmenistan barada taýýarlanan wideofilme tomaşa etdiler we Milli Liderimiz Gahryman Arkadagymyzyň hem-de Hormatly Prezidentimiziň taýsyz tagallalary netijesinde Gündogaryň beýik akyldary Magtymguly Pyragynyň arzuwlan bagtyýar zamanasynda çalt depginler bilen ösýän Garaşsyz, hemişelik Bitarap ýurdumyz, şöhratly taryhymyz, köpöwüşginli baý medeniýetimiz we dünýäde nusgalyk hasaplanýan milli mirasymyz, halkymyzyň däp-dessurlary, Watanymyzyň geljegi bolan ýaşlarymyz barada giňişleýin maglumat aldylar.

  Ýurdumyzdan foruma gatnaşýan çagalaryň ýerine ýetiren aýdym-sazly çykyşlary we joşgunly tanslary gyzgyn garşylanyp, halkara foruma beýleki döwletlerden gatnaşýan çagalara baý milli mirasymyz bilen ýakyndan tanyşmaga mümkinçilik döretdi.

  Türkmenistanyň güni mynasybetli geçirilen medeni-bilim maksatly çäre dünýä ýüzünde parahatçylygyň, ynanyşmagyň we dostana gatnaşyklaryň nusgalyk mekany hökmünde tanalýan Watanymyzy wasp edýän “Türkmenistan-dost-doganlyk mekany” atly aýdymyň bilelikde ýerine ýetirilmegi bilen tamamlandy.        

      Oguljahan Alamyşowa, Umumy orta bilim bölüminiň baş hünärmeni