Daşoguz welaýatynda mekdebe çenli çagalar edaralarynyň bilim işgärleriniň döwlet derejesindäki usuly-amaly maslahaty geçirildi

Berkarar döwletiň täze eýýamynyň Galkynyşy döwründe Gahryman Arkadagymyzyň, Arkadagly Gahryman Serdarymyzyň alyp barýan öňdengörüjilikli döwlet syýasatynyň netijesinde beýik işler durmuşa geçirilýär. Amala aşyrylýan her bir tutumly işler Milli Liderimiz Gahryman Arkadagymyz tarapyndan başy başlanyp, Arkadagly Gahryman Serdarymyz tarapyndan mynasyp dowam etdirilýän halkymyzyň, aýratyn-da ýaş nesillerimiziň asuda, abadan, parahat durmuşda ýaşamagy baradaky belent maksatlar durýar. Arkadagly Gahryman Serdarymyzyň “Her bir ýurduň bagtyýarlygy, abadançylygy ösüp gelýän ýaş nesil hakdaky aladalardan gözbaş alýar” diýen ajaýyp jümlesinden ugur alnyp, ýaş nesilleriň hemmetaraplaýyn sazlaşykly ösüşini gazanmak, zähmetsöýerlik, arassa ahlaklylyk ýaly häsiýetleri terbiýelemek, pederlerimizden miras galan milliligimiz, däp-dessurlarymyz, edep-terbiýe bermek babatynda yzygiderli işler alnyp barylýar.

“Türkmenistanda çaganyň irki ösüşini we mekdebe taýýarlygyny ösdürmek babatda 2020-2025-nji ýyllarda mekdebe çenli çagalar edaralarynyň işini kämilleşdirmegiň Maksatnamasyndan”, “Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasyndan” gelip çykýan wezipeleri mekdebe çenli çagalar edaralarynyň işine ornaşdyrmak, şeýle-de çagalara ýokary hilli bilim-terbiýe bermekde we olary başlangyç bilimiň maksatnamasyny özleşdirmäge taýýarlamakda oňyn netijeleri gazanmakda pedagogik işgärleriniň bilim derejelerini, hünär ussatlyklaryny yzygiderli kämilleşdirmek maksady bilen ýurdumyzyň mekdebe çenli çagalar edaralarynyň öňdebaryjy bilim işgärleriniň gatnaşmaklarynda 2025-nji ýylyň 30-31-nji oktýabrynda Daşoguz şäheriniň daşary ýurt dilini çuňlaşdyryp öwredýän ýöriteleşdirilen 38-nji çagalar bakja-bagynda Türkmenistanyň Bilim ministrliginiň meýilnamasyna laýyklykda “Mekdebe çenli çagalar edaralarynyň uly (mekdebe taýýarlaýyş) toparlarynda okuw-terbiýeçilik işlerini netijeli guramak we bu ugurda hünärmenleriň iş usullaryny kämilleşdirmek” atly döwlet derejesindäki bilim işgärleriniň usuly-amaly maslahaty geçirildi.

Usuly-amaly maslahatda ýurdumyzyň mekdebe çenli çagalar edaralarynyň öňdebaryjy bilim işgärleri Daşoguz welaýatynyň mekdebe çenli çagalar edaralarynyň körpeleriniň gatnaşmagynda aýdym-saz, tans toparlarynyň çykyşlaryna tomaşa etdiler. Bu maslahatda çagalar bakja-baglarynyň müdirleri, terbiýeçi-usulyýetçileri, terbiýeçileri öz iş tejribelerinden, ýagny usuly işleri boýunça taýýarlan okuw-görkezme esbaplarynyň, işjeň oýun usullar arkaly ýerine ýetiren el işleriniň sergisine gatnaşdylar, işjeň usuldaky görelde sapaklara, çagalar bakja-bagynda geçirilýän gyzyklanma çärelerinde körpelere watançylyk terbiýesiniň berlişine syn etdiler. Daşary ýurt dilleri bolan iňlis we rus dili sapaklarynda, sözleýşi ösdürmek, sowat öwretmek, daş-töwerek we tebigat bilen tanyşmak, ýönekeý matematiki düşünjeleri sapaklarynda, lingafon otaglarynda interaktiw tagtasynyň kömegi bilen, Berkarar döwletiň täze eýýamynyň Galkynyşy döwrüniň ösüşlerini wasp etdiler. Körpelere watançylyk terbiýesini bermekde, döredijilikli oýlanmaga taýýarlamakda, çagalaryň bilime bolan höwesini artdyrmakda, ýatkeşligini berkitmekde, ukyp-başarnyklaryny ösdürmekde Daşoguz şäheriniň daşary ýurt dilini çuňlaşdyryp öwredýän ýöriteleşdirilen 38-nji çagalar bakja-bagynyň terbiýeçisi Ş.Hallyýewanyň, iňlis dili mugallymy E.Sadykowanyň, Daşoguz şäheriniň daşary ýurt dilini çuňlaşdyryp öwredýän ýöriteleşdirilen 39-njy çagalar bakja-bagynyň terbiýeçisi G.Ataýewanyň, rus dili mugallymy Ş.Sadullaýewanyň, Daşoguz şäheriniň 36-njy çagalar bakja-bagynyň terbiýeçisi A.Şajykowanyň, Daşoguz şäheriniň 31-nji çagalar bakja-bagynyň terbiýeçi-usulyýetçisi M.Abdyweliýewanyň görelde sapaklary has täsirli boldy.

Pedagogik işgärleriniň öňünde durýan wezipeler, maksatlar olardan döredijiligi talap edýär. Şonuň üçin bilim işgäri hemişe gözlegde bolmaly, ol täzelikçi, dörediji bolmaly. Mekdebe çenli çagalar edaralarynda sapaklary işjeň usullar arkaly guramak diňe bir çaga üçin däl, eýsem terbiýeçi üçin hem gyzykly. Sapaklarda okatmagyň dürli işjeň usullaryndan we okuw serişdelerinden peýdalanmak diňe bir gyzykly we ýeňil bolman, eýsem, örän netijeli bolýar, çagalaryň hemmetaraplaýyn ösmegine ýardam berýär, terbiýeçileriň hünär başarnygyny kämilleşdirmäge itergi berýär.

Usuly-amaly maslahatyň dowamynda ýurdumyzyň mekdebe çenli çagalar edaralarynyň öňdebaryjy bilim işgärleriniň öňdebaryjy iş usullary boýunça wideo ýazgylar görkezildi, çykyşlary diňlenildi. Iki gün dowam eden döwlet maslahatynyň jemleýji böleginde uly (mekdebe taýýarlaýyş) toparlarynda okuw-terbiýeçilik işlerini netijeli guramakda we bu ugurda hünärmenleriň iş usullaryny kämilleşdirmekde öňdebaryjy iş usullary öwrenmek we ýaýratmak maksady bilen, maslahatyň gün tertibinde göz öňüne tutulan meseleleri we usuly işleri ornaşdyrmak boýunça teklipler berildi, öňdebaryjy iş tejribeler boýunça özara pikir alşyldy.

Ösüp gelýän ýaş nesle döwrebap bilim-terbiýe bermekde, olaryň başarnyklaryny we ukyplaryny ösdürmekde pedagogik işgärleriniň hünär ussatlyklaryny kämilleşdirmek babatynda usuly-amaly maslahatyň işi täsirli we netijeli geçdi.

“Halkara parahatçylyk we ynanyşmak ýylynda” Türkmenistanyň Prezidenti Serdar Berdimuhamedowyň milli bilim ulgamyny döwrebaplaşdyrmak, ýaş nesle berilýän bilimiň hilini we mazmunyny ýokarlandyrmak boýunça berýän gymmatly tabşyryklaryndan, görkezmelerinden ruhlanyp, bagtyýar geljegimiz bolan ýaş neslimizde ata Watanymyza, merdana halkymyza, Arkadagly Gahryman Serdarymyza hem-de türkmen halkynyň Milli Lideri Gahryman Arkadagymyza bolan çuňňur söýgini we wepalylygy terbiýelemekde, çagalarda ata-enäni, ulyny sylamak, kiçini söýmek, maşgala agzalaryna, milli gymmatlyklaryna hormat goýmak duýgularynyň esaslaryny kemala getirmek, zehinlerini açmak we ösdürmek boýunça mundan beýläk hem terbiýeçilik ähmiýetli işleriň, çäreleriň yzygiderli alnyp baryljakdygyna, bilim işgärleriniň adyndan ynandyrasymyz gelýär.

Ösüp barýan ýaş nesil barada uly aladalary edýän Türkmen halkynyň Milli Lideri Gahryman Arkadagymyzyň, Arkadagly Gahryman Prezidentimiziň janlarynyň sag, başlarynyň dik, il-ýurt hem-de umumyadamzat ähmiýetli işleriniň hemişe rowaçlyklara beslenmegini arzuw edýäris!

Bahargül Dädäýewa,

Daşoguz welaýat Baş bilim müdirliginiň

mekdebe çenli bilim, terbiýe we mekdepden

daşary edaralary bölüminiň başlygy