BILIME WE ÝAŞLAR SYÝASATYNA BAGYŞLANAN MASLAHAT
2026-njy ýylyň 20-nji noýabrynda Türkmenistanyň Bilim ministrliginiň mejlisler jaýynda «Bilim we ýaşlar syýasaty – täze taryhy döwrüň belent wezipeleri» atly maslahat geçirildi. Oňa ýurdumyzyň ylym-bilim ulgamynyň wekilleri, ýurdumyzyň ýokary okuw mekdepleriniň mugallymlarydyr talyplary we mekdep okuwçylary gatnaşdylar.
Maslahatda Bilim ministrliginiň Ýaşlar syýasaty bölüminiň başlygy Wepa Gutlyýew, Milli bilim institutynyň bilim işgärleriniň hünärini kämilleşdiriş bölüminiň müdiri, biologiýa ylymlarynyň doktory Sapargeldi Durdyýew, Halkara ynsanperwer ylymlary we ösüş uniwersitetiniň uly mugallymy Çemen Wekilowa, Türkmenistanyň Daşary işler ministrliginiň Halkara gatnaşyklary institutynyň mugallymy, institutyň Ilkinji ýaşlar guramasynyň başlygy Muhammet Süleýmanow, Ylymlar akademiýasynyň Halkara ylmy-tehnologiýa parkynyň nanotehnologiýalar barlaghanasynyň müdiri, Türkmenistanyň Telekommunikasiýalar we informatika institutynyň Telekommunikasiýa ulgamlary kafedrasynyň mugallymy Guwanç Akyýew, Ýagşygeldi Kakaýew adyndaky Halkara nebit we gaz uniwersitetiniň Kiberhowpsuzlyk kafedrasynyň müdiriniň wezipesini wagtlaýyn ýerine ýetiriji, tehniki ylymlaryň kandidaty Maksat Çüriýew hem-de Magtymguly adyndaky Türkmen döwlet uniwersitetiniň žurnalistika hünäriniň 4-nji ýyl talyby Selbinýaz Magsudowa, Aşgabat şäheriniň ýöriteleşdirilen 7-nji orta mekdebiniň 12-nji synp okuwçysy, Türkmenistanyň Ýaşlar baýragynyň eýesi Ogulgerek Maksadowa dagy çykyş etdi.
Maslahatyň dowamynda çykyş edenler ýurdumyzyň geljegi hasaplanýan ýaşlarda watansöýüjilik, zähmetsöýerlik, yhlaslylyk häsiýetlerini oýarmakda ylym-bilim ulgamynda iş alyp barýan hünärmenlere möhüm ornuň degişlidigini nygtadylar. Şeýle-de «Türkmenistanda ýaşlar barada döwlet syýasatynyň 2031-nji ýyla çenli Döwlet maksatnamasynyň» kabul edilmegi hem-de onuň taryhy ähmiýeti, ylaýta-da, ýurdumyzda ýaşlar üçin döredip berilýän mümkinçilikler, şertler barada buýsançly çykyşler edildi.
Mälim bolşy ýaly, häzirki wagtda türkmen ýaşlary ýurdumyz boýunça we halkara derejesinde geçirilýän bäsleşiklere gatnaşyp, baýrakly orunlary eýeleýärler. Mekdep okuwçylary hem-de talyplar matematika, fizika, himiýa, biologiýa we informatika ýaly dersler boýunça geçirilýän halkara olimpiadalarda altyn, kümüş we bürünç medallary gazanýarlar. Şeýle hem ylmy-taslama we innowasion bäsleşiklerde täze açyşlary bilen tapawutlanýarlar. Türgenlerimiz sport ýaryşlarynda medallary gazanyp, ýaşyl tugumyzy al-asmanda parladýarlar. Bu bolsa eziz Diýarymyzyň abraýynyň barha artmagyna şert döredýär.
Şular dogrusynda maslahatda çykyş edenler hem aýratyn bellemek bilen, bilim ulgamynda gazanylýan üstünlikler barada durup geçdiler. Maslahatyň ahyrynda oňa gatnaşyjylar Gahryman Arkadagymyza, Arkadagly Gahryman Serdarymyza alkyş sözlerini aýtdylar.
Türkmenistanyň Bilim ministrligi.



















