Çagalaryň söýgüli seýilgähi

Tomusky dynç alyş möwsümi gyzgalaňly dowam edýär. Bu möwsümiň gelmegi bilen, ýurdumyzda çagalaryň dynç alyş günleri has-da şatlyk-şowhuna beslenýär. Ak mermerli paýtagtymyzyň gözel seýilgähleri bu günlerde köp adamly. Şeýle seýilgähleriň biri-de «Aşgabat» medeni-dynç alyş seýilgähidir.

Bu seýilgäh 1887-nji ýylda ýurdumyzda açylyp ulanmaga berlen ilkinji seýilgähdir. Seýilgäh ilkibaşda «Ýaz howlusy» soňra «Birinji park» diýlip atlandyrylypdyr. Ýurdumyz Garaşsyzlygyna eýe bolandan soňra «Aşgabat seýilgähi» diýlip atlandyryldy hem-de onuň durky 2014-nji ýylda düýpli täzelendi. Paýtagtymyzyň bu gözel künjeginde ençeme ýyllaryň taryhyny özünde jemläp oturan 100 ýaşly uly daragtlar hem bar. Türkmenbaşy we Magtymguly şaýollarynyň ugrunda ýerleşýän bu seýilgäh 7-8 gektara golaý meýdany eýeleýär.

Seýilgähe gireniňde, çagalaryň şadyýan gülki sesleri daş-töweregiňi gurşap alýar. Şol pursatda, göýä diýersiň, özüňem çagalyk ýyllaryňa dolanan ýaly bolýarsyň. Bu ýerde medeniýet we sungat ussatlarynyň çykyşlary, döredijilik duşuşyklary, aýdym-sazly konsertler yzygiderli guralýar. Çagalar bu ýerde wagtlaryny örän hoş geçirýärler. Ondaky «Dinozawrlar dünýäsine» we beýleki owadan ýerlere aýlanyp, surata düşýärler.

— Ahal welaýatynyň Babadaýhan etrabynyň Garawekil obasyndan agtyklarym bilen «Aşgabat» seýilgähine gezelenje geldik. Bu ýerdäki hiňňildikler, oýun meýdançalary, aýdym-sazly çykyşlar göwnüňi göterýär. Çagalara seýilgähdäki göçme dükanlardan dürli görnüşli buzgaýmaklarydyr süýjülikleri satyn alsa bolýar. Perzentlerimiziň şeýle ajap zamanada, asuda, abadan ýurdumyzda wagtlaryny hoş geçirýändiklerini görmek uly bagt! — diýip, çowluk gören 82 ýaşly ene Jumagözel Sakgalowa ýürek buýsanjyny beýan etdi.

Bike ANNAÝEWA,

Türkmenistanyň Daşary işler ministrliginiň Halkara gatnaşyklary institutynyň halkara žurnalistikasy fakultetiniň talyby. Surata düşüren Dörtguly MYRATGULYÝEW

Çeşmesi: Türkmenmetbugat