Dostlugyň bilim binýady

Berkarar döwletiň täze eýýamynyň Galkynyşy döwründe bilim ulgamy üstünlikli ösdürilip, şunda halkara hyzmatdaşlygy ilerletmäge uly ähmiýet berilýär. Munuň şeýledigini ýurdumyzyň ýokary okuw mekdepleri bilen daşary ýurtlaryň, şol sanda Hytaý Halk Respublikasynyň iri bilim edaralarynyň arasynda ýola goýlan netijeli gatnaşyklaryň mysalynda hem aýdyň görmek bolýar.

Mälim bolşy ýaly, 2023-nji ýylyň 6-njy ýanwarynda hormatly Prezidentimiz Serdar Berdimuhamedowyň Hytaý Halk Respublikasyna amala aşyran ilkinji döwlet saparynyň çäginde dürli ugurlardaky ikitaraplaýyn resminamalaryň hatarynda Magtymguly adyndaky Türkmen döwlet uniwersiteti bilen Pekiniň daşary ýurt dilleri uniwersitetiniň arasynda özara hyzmatdaşlyk hakynda Ähtnama hem gol çekilipdi. 2025-nji ýylyň mart aýynda bolsa bu iki ýokary okuw mekdebiniň arasynda mugallymlary we talyplary özara alyşmak baradaky goşmaça Ylalaşyga gol çekildi. Munuň özi özara bilim köprülerini pugtalandyrmakda täze gözýetimleri açdy.

Degişli Ylalaşygy durmuşa geçirmegiň barşynda Pekiniň daşary ýurt dilleri uniwersitetiniň uçurymy Szuý Szýasin Magtymguly adyndaky Türkmen döwlet uniwersitetiniň aspiranty boldy. Maňa hem şu ýylyň 1-nji martyndan Hytaýda mugallymçylyk saparynda bolup, türkmen dili we Türkmenistana umumy syn dersleri boýunça rus dili (türkmen dili) hünärinde okap bilim alýan hytaýly talyplara bilim bermek miýesser etdi. Häzirki wagtda Hytaýyň abraýly ýokary okuw mekdebiniň mugallymy hökmünde talyplara ene dilimiziň dürli many we grammatik aýratynlyklaryny öwredýärin. Şeýle hem olary ýurdumyzyň ösüşi, halkymyzyň milli däp-dessurlary bilen giňden tanyşdyrýaryn. Ýeri gelende, hytaýly talyplaryň türkmen dilini öwrenmäge örän höweslidiklerini aýtmak örän ýakymlydyr.

Gahryman Arkadagymyzyň ýakynda Hytaýa dostluk saparyny amala aşyrmagy we saparyň çäginde geçirilen ikitaraplaýyn duşuşyklarda ylym, bilim ugurlarynda bilelikdäki taslamalary durmuşa geçirmäge bildirilen gyzyklanmalar bizi has-da buýsandyrdy. Milli Liderimiz Hytaý Halk Respublikasynyň Başlygy bilen bolan duşuşygynda türkmen ýaşlaryna Hytaýyň ýokary okuw mekdeplerinde bilim almaga döredilýän mümkinçilikler üçin hytaý tarapyna minnetdarlyk bildirdi. Gahryman Arkadagymyz Hytaýyň “СGTN” teleýaýlymyna beren interwýusynda türkmen-hytaý hyzmatdaşlygynda medeni, ylym-bilim gatnaşyklaryna aýratyn ähmiýet berilýändigini aýdyp: “Bilim ulgamyndaky hyzmatdaşlyk barada aýratyn bellemek isleýärin. Häzirki döwürde Hytaýyň bilim ojaklarynda Türkmenistanyň raýatlarynyň 10 müňden gowragy okaýar. Türkmenistanyň 9 sany ýokary okuw mekdebinde, 10 sany orta mekdebinde hytaý dili öwrenilýär. Biz öz tarapymyzdan Hytaý Halk Respublikasynyň okuw mekdeplerinde türkmen diliniň öwrenilmegini guramakda ýardam bermäge, munuň üçin mugallymlary we hünärmenleri ibermäge taýýardyrys. Bu bolsa biziň hyzmatdaşlygymyzyň geljegine maýa goýumlardyr, türkmen we hytaý halklarynyň arasynda dostlugyň, özara düşünişmegiň aýdyň nyşanydyr” diýip belledi.

Magtymguly adyndaky Türkmen döwlet uniwersiteti bilen Pekiniň daşary ýurt dilleri uniwersitetiniň arasynda ýola goýlan hyzmatdaşlygyň esasynda geljekde türkmen talyplarynyň okuwlaryny Hytaýda, hytaýly talyplaryň bolsa Türkmenistanda dowam etdirmegi üçin mümkinçilikler dörediler. Dostlukly ýurtda türkmen dilini öwrenmäge gyzyklanýan talyplaryň mundan beýläk-de artjakdygyna we şu bölümi tamamlaýan uçurymlaryň iki ýurduň arasyndaky gatnaşyklary netijeli ösdürmäge uly goşant goşjakdyklaryna berk ynanýarys. Ýaşlara uly ynam bildirip, olaryň hünär kämilligini gazanmaga giň mümkinçilikleri döredýän Gahryman Arkadagymyza hem-de hormatly Prezidentimize tüýs ýürekden alkyş aýdyp, janlarynyň sag, belent başlarynyň aman, döwletli işleriniň hemişe rowaç bolmagyny arzuw edýäris.

Didar AMANMUHAMMEDOW,

Pekiniň daşary ýurt dilleri uniwersitetiniň mugallymy.

Çeşmesi:Türkmenmetbugat