Dünýä we Magtymguly

«Asman astyndaky ýurtda» dana Pyraga sarpa

Hormatly Prezidentimiz goşgulary aýdyma, sözleri dilleriň senasyna öwrülen Magtymguly Pyragynyň dost-doganlyga, ynsanperwerlige çagyryşyň owazy bolup ýaňlanýan eserleriniň döwürleri, milletleri we döwletleri baglanyşdyryp, ýakyn-alys, goňşy-garyndaş halklaryň guwanjyna öwrülendigini belleýär. Bu günki gün beýik akyldaryň doglan gününiň 300 ýyllygynyň dünýäniň çar künjeginde giňden dabaralandyrylmagy-da muňa aýdyň şaýatlyk edýär. Golaýda bolsa Pekiniň daşary ýurt dilleri uniwersitetinde «Pähim-paýhas ummany Magtymguly Pyragy we Hytaý bilen Merkezi Aziýanyň arasyndaky ynsanperwer gatnaşyklar» atly ylmy maslahat hem-de şahyryň saýlanan şygyrlarynyň hytaý dilindäki täze neşiriniň tanyşdyrylyş dabarasy geçirildi.

Maslahatyň dowamynda Pekiniň daşary ýurt dilleri uniwersitetiniň rektory S.Wenszýan we Türkmenistanyň Hytaý Halk Respublikasyndaky Adatdan daşary we Doly ygtyýarly ilçisi P.Durdyýew çykyş edip, Magtymguly Pyragynyň döredijiligi, onuň gymmatly mirasynyň ýurtlardyr halklaryň arasynda dostlukly gatnaşyklary ösdürmekdäki ähmiýetine ünsi çekdiler. Bellenilişi ýaly, Magtymguly Gündogaryň iň meşhur akyldarlarynyň biridir. Onuň eserlerinde Watana söýgi, ynsanperwerlik, parahatçylyk söýüjilik ýaly müdimi umumadamzat gymmatlyklary beýan edilýär. Dana Pyragynyň döredijilik hem filosofik mirasy türkmen halkynyň milli gymmatlygydyr, şol bir wagtyň özünde-de dünýä medeniýetiniň genji-hazynasynyň aýrylmaz bölegidir.

Çykyş edenler şahyryň saýlama şygyrlarynyň 100-sini öz içine alýan hytaý dilindäki täze neşiriň ähmiýeti barada aýratyn durup geçdiler. Mälim bolşy ýaly, şu ýylyň ýazynda Türkmenistanyň Ylymlar akademiýasynyň «Ylym» neşirýatyndan Magtymguly Pyragynyň goşgular ýygyndysyny hytaý diline terjime etmek we çapdan çykarmak üçin ygtyýarnama alyndy. Şunlukda, täze kitap Hytaýyň Atçylyk assosiasiýasynyň howandarlygynda, Türkmenistanyň dostlukly ýurtdaky ilçihanasynyň goldaw bermeginde jemi 1000 nusgada çap edildi. Söz ussadynyň şygyrlaryny hytaý diline terjime etmek bolsa Pekiniň daşary ýurt dilleri uniwersitetiniň professory D.Guýsýuwa ynanyldy. Hormatly Prezidentimiz Serdar Berdimuhamedowyň giriş sözleri bilen başlanýan bu kitap «Magtymguly Pyragynyň 300 ýyllygyna» atly ýubileý medalynyň eýesi, Hytaýyň Atçylyk assosiasiýasynyň Baş sekretary Ýue Gaofengiň sözbaşysyny, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň Alymlar geňeşi tarapyndan hödürlenen makalalary öz içine alýar. Çykyş edenler şular barada aýdyp, täze neşiriň hytaý okyjylaryna şahyryň durmuşy, döredijiligi, filosofik pikirleri bilen içgin tanyşmaga mümkinçilik berjekdigine ynam bildirdiler.

Maslahatyň barşynda agzalan bilim ojagynyň türkmen dili bölüminde okaýan talyplar Magtymgulynyň goşgularyny türkmen we hytaý dillerinde labyzly okadylar. Soňra täze kitabyň tanyşdyrylyş dabarasy boldy.

Çäräniň çäginde Türkmenistanyň HHR-däki doly ygtyýarly wekili Pekiniň daşary ýurt dilleri uniwersitetiniň rektory S.Wenszýan bilen duşuşdy.

Londonda döredijilik agşamy geçirildi

Türkmenistanyň Beýik Britaniýanyň we Demirgazyk Irlandiýanyň Birleşen Patyşalygyndaky ilçihanasynyň binasynda geçirilen döredijilik agşamy hem 2024-nji ýylyň «Pähim-paýhas ummany Magtymguly Pyragy» ýyly şygaryna we Magtymguly Pyragynyň doglan gününiň 300 ýyllygyna bagyşlandy. Ýurdumyzyň Londondaky diplomatik wekilhanasynyň Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar instituty bilen bilelikde guran çäresine türkmen wekiliýetiniň agzalary, Dünýä türkmenleriniň ynsanperwer birleşiginiň Beýik Britaniýadaky «Galkynyş» bölüminiň wekilleri, bu ýerde ýaşaýan Türkmenistanyň raýatlarydyr talyplar işjeň gatnaşdylar.

Döredijilik agşamynyň dowamynda Türkmenistanyň Beýik Britaniýadaky Adatdan daşary we Doly ygtyýarly ilçisi Ý.Serýaýewiň, Magtymguly adyndaky Dil, edebiýat we milli golýazmalar institutynyň ylmy işgärleri A.Nuraýewiň we G.Çangliýewiň çykyşlaryna orun berildi. Çykyş edenler Magtymguly Pyragynyň dünýä edebiýatynyň altyn hazynasyna giren baý edebi mirasyny hemmetaraplaýyn öwrenmek boýunça alnyp barylýan işler, şahyryň ýubileýini dabaralandyrmak maksady bilen dünýäniň çar küjeginde guralýan çäreler barada giňişleýin gürrüň berdiler. Şunda söz ussadynyň döredijiliginiň halkara derejedäki ornuna aýratyn üns berildi. Nygtalyşy ýaly, geçen ýylyň maýynda geçirilen ÝUNESKO-nyň Ýerine ýetiriji geňeşiniň 216-njy mejlisinde türkmeniň akyldar şahyry Magtymguly Pyragynyň golýazmalar toplumy ÝUNESKO-nyň «Dünýäniň hakydasy» maksatnamasynyň halkara sanawyna, onuň doglan gününiň 300 ýyllygy bolsa 2024-2025-nji ýyllarda bu gurama bilen bilelikde bellenilip geçiljek şanly seneleriň sanawyna girizildi.

Çäräniň çäginde Magtymguly Pyragynyň döredijiligine we Türkmenistanyň häzirki ösüşlerine bagyşlanan wideofilm görkezildi, şeýle hem şahyryň iňlis diline terjime edilen eserleriniň sergisi guraldy.

Aýgül RAHYMOWA.

«Türkmenistan»

27.11.2024ý. №303

Çeşme: Turkmenmetbugat