Kitap — bilimler çeşmesi

Kitap egsilmez hazynadyr. Kitap asyrlardan asyrlara, nesillere bahasyny hiç zat bilen ölçäp bolmaýan baýlygy ýetirýän gymmatlykdyr. Özi hem döwürleriň synagyndan geçen, hiç haçan könelmeýän gymmatlykdyr. Şonuň üçin hem ýaşlaryň terbiýesinde kitabyň uly orny bar. Çünki paýhasly jümleler, ylmy garaýyşlar diňe kitaplaryň sahypasynda jemlenendir. Şonuň üçin hem ylmy gözlegde bolmak we kämillige gadam basmak ylmy garaýyşlaryň üsti bilen mümkin bolýar.

Geçmişdäki danalaryň, alymlaryň paýhasly jümlelerini öwran-öwran okaýarys. Bu parasatly sözler durmuş, ylym, dost-doganlyk hakyndaky pikirleri özünde jemleýär. Bu jümleleri okamak, ýol-ýörelge edinmek ynsanyň kämilligi bolup durýar. Emma iň esasy kämillik okamakdyr. Okaýan ynsan kämillige ýetýär, giň düşünjeli bolýar, ylym-bilime düşünýär. Kämillige barýan ýol okamagyň üsti bilen amala aşýar. Türkmen halky kitaba, ylym-bilime aýratyn sarpa goýýar. Esasan-da, kitap okamak, kitaby hemra edinmek asylly ýörelgämizdir. Akyldar şahyrymyz Magtymguly Pyragy hem «Kitap okan gullar magnydan dokdur» diýmek bilen, kitabyň many-mazmuny hakynda çuňňur beýan edýär. Şonuň üçin hem pähimdar pederlerimiz ýaşlara terbiýe berenlerinde ylym-bilimli bolmagy, kitaphon bolmagy wesýet edipdirler.

Biz atalar sözlerine, nakyllara, halk döredijilik eserlerine ýüzlensek hem kitap hakynda ajaýyp pikirlere duş geleris. Bu hakynda söz açanymyzda türkmen nakyllaryny, atalar sözlerini beýan edip bolar. «Bilmeýän zadyňy kitapdan sora», «Kitap okamaýan görýänini görer, kitap okaýan dünýäni görer», «Kitap – geçeni, geljegi öwredýän dana», «Kitap bilen söhbetdeş bolsaň, ýüregiň gysmaz», «Kitap okaýanyň ruhy baý», «Kitap eneň-ataň ýaly terbiýeçidir», «Kitapsyz okalmaz, merdiwansyz çykylmaz» ýaly nakyllarda hem kitabyň ähmiýetini görmek bolýar.

Geçmişde ata-babalarymyz baý golýazma çeşmelerini hem miras goýupdyrlar. Şeýle golýazma çeşmeleriniň özi bolsa öňi bilen pähimdar pederlerimiziň ylymdar bolandyklaryny, ylym ýolunyň nusgasyny kemala getirendiklerini görkezýär. Häzirki ajaýyp döwrümizde ata-babalarymyzyň asylly ýörelgesini dowam edip, bilimli nesilleri kemala getirmäge giň mümkinçilikler döredilýär. Bilim işgärleri hem şeýle ajaýyp mümkinçiliklerden peýdalanyp, döredijilikli zähmet çekýärler.

Maral NURLYÝEWA,

Türkmenistanyň Döwlet energetika institutynyň mugallymy.

"Mugallymlar gazeti"

27.11.2024ý. №96

Çeşme: Turkmenmetbugat