Okatmagyň işjeň usullary boýunça tejribeler

Şu günler ýurdumyzyň etrapdyr şäherlerinde bilim işgärleriniň üç günlük usuly-amaly okuwlary dowam edýär. Usuly-amaly okuwlarda «Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasyny» hem-de ony amala aşyrmak boýunça ýerine ýetirilmeli işleriň Meýilnamasyny, kämil, edep-terbiýeli ýaşlary kemala getirmek boýunça bilim işgärleriniň öňünde durýan wezipeleri durmuşa ornaşdyrmagyň iş tejribeleri barada giňişleýin söhbet edildi. 2024 — 2025-nji okuw ýylynyň birinji ýarymynyň jemleri we ikinji ýarymynda ýerine ýetirilmeli işler barada giňişleýin gürrüň edildi. Usuly-amaly okuwlar ýokary guramaçylykly geçirilip, bellenilen temalar boýunça çykyşlara aýratyn orun berildi.

Arkadag şäherindäki 1-nji okuw-terbiýeçilik toplumynyň mekdebe çenli bölüminde geçirilen üç günlük usuly-amaly okuwlar ýokary guramaçylyga eýe boldy. Oňa şäheriň düzümindäki mekdebe çenli çagalar edaralarynyň müdirleri, terbiýeçileri, terbiýeçi-usulçylary, şepagat uýalary we mugallymlary gatnaşdylar. Usuly-amaly okuwlarda Türkmenistanyň Bilim ministrligi we Türkmenistanyň Milli bilim instituty tarapyndan görkezilen temalar boýunça tejribeli terbiýeçileriň, müdirleriň we mugallymlaryň täsirli çykyşlary hem diňlenildi. Sowal-jogaplar alşyldy. Halypa terbiýeçiler ýaş nesliň bilim bilen birlikde, terbiýelerini, başarnyklaryny ösdürmek baradaky tejribelerini paýlaşdylar. Bilim işgäriniň öz hünär taýýarlygyny ýokarlandyryp, çagalara terbiýe we bilim bermekde, okatmagyň usulyýetiniň kämilleşdirilmegine jogapkärli bolmalydygy baradaky çykyşlar bolsa, duşuşyga gatnaşanlarda ýakymly täsir galdyrdy. Şeýle hem häzirki döwürde bilim, terbiýe bermegiň hilini döwrebaplaşdyrmak, okatmagyň usulyýetini kämilleşdirmek baradaky wezipeler dogrusynda hem okuwlardaky çykyşlarda aýratyn bellenildi.

Amanjahan PIRLIÝEWA,

Arkadag şäher bilim müdirliginiň mekdebe çenli bilim, terbiýe bölüminiň başlygy.

Aşgabat şäher Baş bilim müdirliginiň mejlisler zalynda mekdebe çenli çagalar edaralarynyň müdirleriniň, terbiýeçileriniň, terbiýeçi-usulçylarynyň, şepagat uýalarynyň gatnaşmaklarynda usuly-amaly okuwlar geçirildi. Bu ýerde dürli temalar boýunça tejribeli terbiýeçileriň çykyşlary diňlenildi. Onda «Mekdebe çenli çagalar edaralarynda terbiýe we bilim bermek işine öňdebaryjy innowasion çemeleşmeleri giňden ornaşdyrmak, ylmyň we tehnikanyň iň täze gazananlaryna esaslanyp, okuw-terbiýeçilik işini dünýä tejribesine laýyklykda guramak», «Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasynyň» maksatlaryny we wezipelerini durmuşa geçirmekde terbiýeçi-usulçylaryň orunlary» diýen temalar boýunça giňişleýin çykyşlar edildi. Şeýle hem çagalaryň bilesigelijiligini artdyrmakda, olary sapaklara gyzyklandyrmakda iň kämil usullaryň ornaşdyrylmalydygy barada halypa terbiýeçileriň iş tejribeleri hakynda hem aýratyn durlup geçildi.

Maýagözel SAZAKOWA,

Aşgabat şäher Baş bilim müdirliginiň mekdebe çenli bilim, terbiýe we mekdepden daşary edaralar bölüminiň müdiri.

Ak bugdaý etrabyndaky 45-nji orta mekdepde türkmen dili we edebiýat mugallymlarynyň gatnaşmagynda usuly-amaly okuwlar ýokary guramaçylykly başlandy. Usuly-amaly okuwyň ilkinji gününde etrapdaky 16-njy orta mekdebiň mugallymy Gurbanbibi Bäşimowa «Garaşsyzlyk eýýamynyň edebiýatynda halkymyzyň şöhratly taryhynyň we milli gymmatlyklarymyzyň beýany», şol mekdebiň mugallymy Ogulnabat Şalarowa «Türkmen dilini (türkmen edebiýatyny) sanly bilim serişdeleriniň kömegi bilen okatmagyň innowasion çemeleşmeleri», 11-nji orta mekdebiň mugallymy Aýnagözel Annamyradowa «Türkmen dili we edebiýat derslerinde okuwçylaryň sözleýiş medeniýetini kemala getirmegiň iş tejribesinden» diýen temalar boýunça çykyş etdiler. Öz iş tejribelerini dürli mysallaryň üsti bilen görkezdiler. Sowal-jogaplar hem alşylyp, ýaş hünärmenlere maslahatlar berildi. Bu bolsa usuly-amaly okuwyň täsirliligini we netijeliligini has artdyrdy. Onda okuwçylar bilen guralýan sapaklaryň täsirliligini artdyrmakda görkezme esbaplarynyň hem ähmiýeti dogrusynda giňişleýin bellenildi.

Jahan NARLYÝEWA,

Ak bugdaý etrabyndaky 6-njy orta mekdebiň mugallymy.

Murgap etrap bilim bölümine degişli bolan mekdebe çenli çagalar edaralarynyň müdirleriniň usuly-amaly okuwlary işjeň häsiýete eýe boldy. Etrapdaky 6-njy çagalar bakja-bagynda guralan usuly-amaly okuwda öňdebaryjy mekdebe çenli çagalar edaralarynyň müdirleriniň çykyşlaryna aýratyn orun berildi. Usuly-amaly okuwda etrabyň 4-nji çagalar bakja-bagynyň müdiri Humaý Kadyrowanyň «Mekdebe çenli çagalar edaralarynda daşary ýurt dillerini okatmagyň usulyýetini döwrebaplaşdyrmak, ony milli we dünýä iş tejribesine laýyklykda yzygiderli kämilleşdirmek», 7-nji çagalar bakja-bagynyň müdiri Maýsa Babaýewanyň «Mekdebe çenli çagalar edaralarynyň körpelerini türkmen halkynyň milli däp-dessurlaryna laýyklykda terbiýelemekde halk döredijiliginiň orny» atly temalar boýunça çykyşlary has täsirli boldy. Şeýle hem usuly-amaly okuwda çykyş edenler mekdebe çenli çagalar edaralarynda terbiýe we bilim bermek işine iň öňdebaryjy innowasion çemeleşmeleri giňden ornaşdyrmak, ylmyň we tehnikanyň täze gazananlaryna esaslanyp, okuw sapaklaryny dünýä tejribesine laýyklykda guramak işiniň dowam etdiriljekdigi hakynda bellediler.

Maýa ÇOLUKOWA,

Murgap etrabyndaky 6-njy çagalar bakja-bagynyň müdiri.

Türkmenbaşy şäherindäki umumybilim berýän orta mekdeplerde bilim we terbiýe berýän mugallymlaryň gatnaşmaklarynda usuly-amaly okuwlar guramaçylykly geçirildi. Şäherdäki 14-nji orta mekdebe jemlenen mugallymlaryň usuly-amaly okuwlary aýry-aýry ugurlary öz içine aldy. Başlangyç synp mugallymlarynyň okuwlarynda öňdebaryjy mugallymlaryň çykyşlary diňlenildi. Bu ýerde şäherdäki 3-nji orta mekdebiň mugallymy Annasoltan Gurbanowanyň, 2-nji orta mekdebiň mugallymy Jamalsoltan Aşyrowanyň «Mekdebe çenli bilim bilen başlangyç bilimiň üznüksiz arabaglanyşygyny ýola goýmagyň usullary», «Başlangyç synp okuwçylaryny okatmagyň hilini, netijeliligini ýokarlandyrmagyň milli we dünýä tejribeleri, olary okuw-terbiýeçilik işlerine ornaşdyrmagyň ýollary» atly temalardaky çykyşlary diňlenildi. Şeýle hem başlangyç synp okuwçylarynyň dürs ýazuw başarnyklarynyň kämilleşmeginde gündelik guralýan derslerden soňra hem ýörite diktant depderlerini ýöretmegiň ähmiýetli taraplary dogrusynda aýdyldy. Ýaş hünärmenlere iş öwretmekde halypa-şägirtlik gatnaşyklarynyň işjeň ýagdaýa eýe bolmagynyň möhümdigi barada hem bellenildi.

Çynar TÖRÄÝEWA,

Türkmenbaşy şäherindäki 1-nji orta mekdebiň mugallymy.

Saparmyrat Türkmenbaşy etrabyndaky 13-nji we 1-nji orta mekdeplerde durmuş zähmeti, çeperçilik zähmeti, proýektirlemegiň esaslary derslerini okadýan mugallymlaryň gatnaşmagynda usuly-amaly okuwlar geçirildi. Bu ýerde tejribeli halypa mugallymlaryň çykyşlaryna aýratyn orun berildi. Onda

«Hormatly Prezidentimiziň «Ýaşlar — Watanyň daýanjy», «Änew — müňýyllyklardan gözbaş alýan medeniýet» atly kitaplarynyň many-mazmunyny durmuş zähmeti sapaklarynda peýdalanmagyň usullary», «Durmuş zähmeti sapaklarynda okuwçylara azyk önümlerini saklamagyň düzgünlerini öwretmegiň öňdebaryjy iş tejribesinden», «Proýektirlemegiň esaslary sapaklarynda «Kompas-3D» ulgamynda işlemek ukyplaryny ýüze çykarmagyň we ösdürmegiň iş tejribesinden», «Proýektirlemegiň esaslary sapaklarynda geometrik jisimiň ýazgysyny guramak we onuň nusgasyny (modelini) ýerine ýetirmegiň usullary» atly temalardaky çykyşlar has täsirli boldy. Sowal-jogaplar hem alşyldy. Bu ýerde tejribeli mugallymlaryň sapagy täsirli guramakdaky görkezme esbaplaryna, slaýd şekillerine tomaşa edilmegi okuwlara gatnaşyjylary has-da gyzyklandyrdy.

Galpakbaý GURBANBAÝEW,

Saparmyrat Türkmenbaşy etrabyndaky 46-njy orta mekdebiň mugallymy.

Türkmenabat şäherindäki 13-nji orta mekdepde başlangyç synp mugallymlarynyň usuly-amaly okuwlary işjeň ýagdaýda geçdi. Üç gün dowam eden usuly-amaly okuwlarda halypa mugallymlaryň çykyşlary diňlenildi. Ýaş hünärmenlere maslahatlar berildi. Bu ýerde mugallymlaryň hormatly Prezidentimiziň çagalara sowgat beren şahsy kompýuterleriniň sapaklarda netijeli peýdalanylyşy, başlangyç synp okuwçylaryny okatmagyň hiliniň we netijeliliginiň ýokarlandyrylyşy barada aýratyn durlup geçildi. Başlangyç bilim berýän mugallymlaryň okatmagyň, sapaklary täsirli guramagyň iň kämil we döwrebap usullary baradaky öňdebaryjy iş tejribelerine üns çekildi. Usuly-amaly okuwlarda Türkmenistanyň Bilim ministrligi we Türkmenistanyň Milli bilim instituty tarapyndan görkezilen temalar boýunça tejribeli mugallymlaryň çykyşlary ýaş hünärmenlerde uly gyzyklanma döretdi.

Leýli MURADOWA,

Türkmenabat şäherindäki fizika, matematika we iňlis dili

derslerini çuňlaşdyryp öwredýän ýöriteleşdirilen 41-nji orta mekdebiň mugallymy.

"Mugallymlar gazeti"

08.01.2025ý №3

Çeşme: Turkmenmetbugat