Asylly ýörelgeleriň dabaralanmagy

Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň alyp barýan giň gerimli işleri türkmen jemgyýetinde ynsanperwerlik, mätäji goldamak ýaly asylly ýörelgeleriň barha dabaralanýandygynyň güwäsidir. Ýakynda gaznanyň döredilmeginiň dört ýyllygy mynasybetli Arkadag şäherinde geçirilen «Parahatçylyk we ynanyşmak ýyly: çagalaryň hatyrasyna halkara işiniň ösüşi» atly halkara maslahatda hem bu hakykat öz aýdyň beýanyny tapdy. Düýn paýtagtymyzdaky «Mekan» köşgünde halkara forumyň jemlerine bagyşlanyp geçirilen «Halkara parahatçylyk we ynanyşmak ýyly: agzybirligiň, parahatçylygyň, ynsanperwerligiň, dost-doganlyk gatnaşyklarynyň dünýä ýüzüne dabaralanmasy» atly maslahatda çykyş edenler hem muny biragyzdan tassykladylar. Maslahata gatnaşyjylaryň birnäçesiniň çykyşlaryny okyjylara ýetirmegi makul bildik.

Madhumita Hazarika BHAGAT,

Hindistan Respublikasynyň Türkmenistandaky Adatdan daşary we Doly ygtyýarly ilçisi:

— Ýakynda Arkadag şäherinde geçirilen «Parahatçylyk we ynanyşmak ýyly: çagalaryň hatyrasyna halkara işiniň ösüşi» atly halkara maslahat Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň alyp barýan işleriniň örän ähmiýetlidigini we olaryň dünýäde uly gyzyklanma eýedigini görkezdi. Halkara forum Birleşen Milletler Guramasynyň Çagalar gaznasynyň (ÝUNISEF) hünärmenlerine, şeýle-de döwlet düzümleriniň we jemgyýetçilik guramalarynyň, halkara guramalaryň ýolbaşçylarydyr wekillerine çagalaryň hukuklaryny goramak, olaryň abadançylygyny, sazlaşykly ösüşini üpjün etmek babatda pikir alyşmak üçin netijeli meýdança boldy.

Türkmenistanda ýaş nesiller, olaryň bagtyýar, sagdyn durmuşda ýaşamagy barada edilýän aladalar dünýä nusgalykdyr. Şu babatda Arkadag şäheriniň Gurbanguly Berdimuhamedow adyndaky çagalar sagaldyş-dikeldiş merkezinde alnyp barylýan işler möhüm ähmiýete eýe bolup, görelde alarlykdyr. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti forumda eden çykyşynda BMG-niň Ösüş maksatnamasy bilen bilelikde «Türkmenistanda ýokanç keselleriň öňüni almak we bejermek hem-de eneleriň we çagalaryň saglygyny goramak üçin zerur bolan derman serişdeleri bilen üpjün etmek» taslamasynyň amala aşyrylýandygy, onuň baş maksadynyň göwrelilik, çaga dogrulýan we doglandan soňky döwürde, şeýle hem seýrek we örän seýrek duşýan keseller bilen kesellänleri derman serişdeleri bilen üpjün etmek we beýleki möhüm meseleleri çözmek arkaly eneleriň saglygyny goramaga goşant goşmakdan ybaratdygy barada-da aýtdy. Şeýle wezipeleriň islendik ýurt üçin hem möhüm ähmiýete eýedigi öz-özünden düşnüklidir. Hindistanda-da Hökümet tarapyndan bu ugurda zerur tagallalar edilip, netijeli işler alnyp barylýar. Hindistan bilen Türkmenistanyň arasynda degişli ugurlarda hyzmatdaşlygy geljekde-de ösdürmek üçin ägirt uly mümkinçilikleriň bardygyna ynanýaryn.

Sözümiň ahyrynda Türkmenistanyň Hökümetini, hususan-da, ýaş nesiller üçin alyp barýan işleriniň üstünliklere beslenmegi, şeýle-de çagalaryň hatyrasyna halkara işiniň ösdürilmegine bagyşlanan forumy ýokary derejede, netijeli geçirmegi bilen tüýs ýürekden gutlaýaryn.

Arzu DEMIROK,

Türkiýe Respublikasynyň Türkmenistandaky Adatdan daşary we Doly ygtyýarly ilçisiniň maşgalasy:

— Türkiýe Respublikasy üçin Türkmenistan bilen gatnaşyklar hemişe-de aýratyn orna eýedir. Taryhy-medeni taýdan umumylyklarymyz ýurtlarymyzy we halklarymyzy özara berk baglanyşdyrýar. Türkiýe Respublikasy Garaşsyz Türkmenistany resmi taýdan ykrar eden ilkinji ýurt hökmünde Aşgabatda ilkinjileriň hatarynda öz ilçihanasyny açdy. Doganlyk halklarymyz umumy taryha we medeniýete eýe bolmak bilen, kyn günlerde-de hemişe birek-biregi goldap gelýär. 2023-nji ýylda Türkiýede bolup geçen ýertitreme bilen baglylykda-da biz muňa şaýat bolduk. Şonda Türkmenistan Türkiýä doganlyk goldawyny, ynsanperwerlik ýardamyny beren ilkinji ýurtlaryň biri boldy. Ýertitreme zerarly ejir çeken çagalar üçin derman serişdelerinden, lukmançylyk enjamlaryndan, egin-eşik we azyk önümlerinden ybarat jemi 92 tonna ýük Türkmenistandan Türkiýä eltildi. Şol ynsanperwerlik kömeginiň hut Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň serişdeleriniň hasabyna iberilendigini aýratyn bellemek isleýärin. Bu kyn döwürde Türkmenistanyň Hökümeti, türkmen doganlarymyz tarapyndan berlen ynsanperwerlik kömegini türk halky hiç haçan unutmaz.

Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy tarapyndan Owganystanda, Palestinada, Ukrainada we Russiýada ýaşaýan, dürli sebäplere görä ejir çeken çagalara hem ynsanperwerlik kömeginiň berlendigini bellemek gerek.

Türkmenistanyň başlangyjy esasynda, Birleşen Milletler Guramasy tarapyndan 2025-nji ýylyň “Halkara parahatçylyk we ynanyşmak ýyly” diýlip yglan edilmegi röwşen geljegi gurmak ugrundaky umumy wezipelerimizdir maksatlarymyzy bize ýene bir ýola ýatladýar. Bu asylly başlangyç dünýäde çagalar üçin abadan, sagdyn, howpsuz, bagtyýar durmuşy üpjün etmek babatda-da aýgytly ädimleri ätmelidigimizi görkezýär. Türkmenistanyň bu ugurda alyp barýan işleri nusgalykdyr. Arkadag şäherinde geçirilen «Parahatçylyk we ynanyşmak ýyly: çagalaryň hatyrasyna halkara işiniň ösüşi» atly halkara maslahat hem munuň aýdyň mysalydyr. Bu forumyň netijeleriniň dünýäde çagalar üçin has adalatly, asuda we howpsuz geljegi, bagtyýar durmuşy üpjün etmäge ýardam berjekdigine tüýs ýürekden umyt edýäris.

Oguljennet ÇARYÝEWA,

Gurbanguly Berdimuhamedow adyndaky çagalar sagaldyş-dikeldiş merkeziniň lukmany:

— Gahryman Arkadagymyzyň esaslandyran Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň dört ýyllygy mynasybetli geçirilen halkara maslahat şanly ýylyň taryhy wakalarynyň biri boldy. Onuň Arkadag şäherinde daşary ýurtly myhmanlaryň gatnaşmagynda uludan tutulan toýa öwrülmegi biziň buýsançly başymyzy göge ýetirdi.

Gurbanguly Berdimuhamedow adyndaky çagalar sagaldyş-dikeldiş merkezinde guralan baýramçylyk dabarasy hem daşary ýurtlardan gelen myhmanlarda uly täsir galdyrdy. Olar merkezde döredilen mümkinçilikler, alnyp barylýan işler, dünýäniň ösen döwletleriniň ýokary derejeli innowasion lukmançylyk enjamlarynyň kömegi arkaly näsag çagalara berilýän sagaldyş-dikeldiş bejergileriniň görnüşleri bilen ýakyndan tanyşdylar. Merkeziň anyklaýyş-maslahat beriş bölüminde bedenterbiýe, surdolog, surdopedagog, otorinolaringolog, stomatolog, newropatolog, logoped we beýleki lukmanlar tarapyndan bejergä gelýän çagalaryň saglyk ýagdaýlary aýratynlykda öwrenilýär. Bu ýerde häzirki wagta çenli 2 müňden gowrak çagada ýokary derejeli lukmançylyk sagaldyş-dikeldiş işleri geçirildi. Lukman Arkadagymyzyň başlangyçlary bilen, şu ýylyň başynda merkezde ippoterapiýanyň, ýagny atlaryň kömegi arkaly berilýän bejerginiň girizilmegi alyp barýan işlerimiziň netijeliliginiň has-da ýokarlanmagyna ýardam berýär.

Gaznanyň alyp barýan sahawatly işleri türkmen halkynyň ynsanperwer ýörelgeleriniň aýdyň ýüze çykmasydyr. Biz — lukmanlara mümkinçiligi çäkli çagalara ýokary derejeli lukmançylyk sagaldyş-dikeldiş bejergilerini netijeli geçirmek, bu işleri dünýä ülňülerine laýyk alyp barmak babatda ähli mümkinçilikleri döredip berýän lukman Arkadagymyza hem-de hormatly Prezidentimize egsilmez alkyş aýdýarys.

Tylla HALLYÝEWA,

Daşoguz welaýatynyň Saparmyrat Türkmenbaşy etrabynyň ýaşaýjysy:

— Çaganyň sagat dünýä inmegi — uly döwletlilik. Eneleriň arzuwy bolsa çagasynyň sagdyn ösmegi, bagtyýar ýaşamagydyr. Elbetde, şeýle bagtyýarlyk her kime-de nesip etsin! Emma durmuşda her hili ýagdaý bolup bilýär. 2011-nji ýylda doglan gyzym Mähriban jan doga kemisli bolup, kynlyk bilen ýöreýärdi. Ene bolup, 13 ýyl çaganyň gözgyny ýagdaýyny görüp gezmek ýaly agyr dert ýok eken. Müňde bir şükür edýärin, dileglerimiz kabul bolup, Hudaý bizi ýalkady. Şol derdi çekip ýörşümize, bir gün bagt guşy depämize gondy duruberdi. Ýaşaýan ýerimizde maşgala lukmanymyzyň maslahat bermegi bilen, biz geçen ýylda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasyna ýüz tutduk. Bizi güler ýüz bilen garşy alyp, degişli bejergileri berdiler. Gyzymyň aýaklaryndaky kemisligi düzetmek üçin tapgyrlaýyn operasiýalary geçirdiler. Şondan soň Mähriban jan özbaşdak ýöräp başlady.

Meni has begendirýän zat — öz ilimizde ökde, ezber elli lukmanlaryň bardygy. Meniň ýaly ýüzlerçe eneleriň çekýän derdini ýeňledip, çagajyklarda bagtly ýaşaýşa umyt döreden Gahryman Arkadagymyz ynsanperwerligiň beýik nusgasyny görkezýär. Şeýle uly bagta ýetiren Gahryman Arkadagymyza, Arkadagly Gahryman Serdarymyza ene ýüregimden soňsuz alkyş aýdýaryn.

Çeşmesi: Turkmenmetbugat