Türkmen okuwçylary Londondan medally dolandylar

Ýurdumyzyň zehinli ýaşlary London şäherinde geçirilen halkara bäsleşiginde bürünç medaly eýelemegi başardylar.

Halkara bäsleşige Aşgabat şäherindäki ýöriteleşdirilen 97-nji orta mekdebiň «OguzRobot» topary gatnaşdy. Bäsleşigiň netijelerine görä, toparyň agzalary Muhammetnur Saparmyradow we Merdan Muhammetorazow bürünç medal gazandylar.

Bellemeli zat, «OguzRobot» ilkinji türkmen milli robot tehnologiýalary gurnagydyr. Ol 2018-nji ýylda Aşgabat şäherindäki ýöriteleşdirilen 97-nji orta mekdepde esaslandyryldy. Gurnagyň şygary «Pikirlen. Oýlap tap. Täsir galdyr!» (Think. Invent. Impress.). «OguzRobot» toparynyň halkara robot bäsleşigine ozal hem birnäçe gezek gatnaşyp, baýrakly orunlara mynasyp bolandygyny aýratyn bellemegimiz gerek.