Halkara gatnaşyklary instituty tarapyndan ylmy işler boýunça halkara bäsleşik yglan edildi

Türkmenistanyň Daşary işler ministrliginiň Halkara gatnaşyklary instituty ylmy işler boýunça «Beýik Ýüpek ýoluny dikeltmek strategiýasynda üstaşyr ulag geçelgeleriniň mümkinçilikleri» atly halkara bäsleşik yglan etdi.

Oňa Azerbaýjanyň, Gazagystanyň, Gyrgyz Respublikasynyň, Özbegistanyň, Täjigistanyň, Türkiýäniň, Eýranyň we Hytaýyň talyplary gatnaşyp biler. Hödürlenýän işler 2023-nji ýylyň 1-nji iýunyna çenli kabul edilýär.

Bäsleşigiň ýeňijilerine Türkmenistanyň Kärdeşler arkalaşyklarynyň Milli merkeziniň, Türkmenistanyň Magtymguly adyndaky Ýaşlar guramasynyň, Türkmenistanyň Senagatçylar we telekeçiler partiýasynyň, «Türkmen Logistika» Assosiasiýasy jemgyýetçilik birleşiginiň, «Türkmenistanyň Ulag-logistika merkezi» açyk görnüşli paýdarlar jemgyýetiniň gymmat bahaly sowgatlary we diplomlar gowşurylar.

Halkara bäsleşige hödürlenýän ylmy işleri aşaky temalar boýunça kabul edilýär:

1) Merkezi Aziýa — Hazar deňzi — Gara deňiz sebiti ugry boýunça Gündogar Ýewropanyň mümkinçiliklerini öwrenmek;

2) Merkezi Aziýa — Ýakyn Gündogar ugry boýunça täze ulag-kommunikasiýa ýollaryny kemala getirmegiň mümkinçiliklerini öwrenmek;

3) Merkezi Aziýa —Aýlag sebitiniň üstaşyr ulag mümkinçiliklerinden peýdalanmak;

4) Türkmenistanyň «Beýik Ýüpek ýoluny dikeltmek» strategiýasy;

5) Hytaýyň «Bir guşak, bir ýol» başlangyjy;

6). Aziýa — Ýuwaş umman sebitinden Merkezi Aziýanyň üsti bilen Ýewropa bazarlaryna çykmagyň mümkinçilikleri;

7).«Demirgazyk — Günorta» halkara ulag geçelgesine Merkezi Aziýa ýurtlarynyň mümkinçilikleri;

8). «Lapis-Lazuli» halkara ulag geçelgesini ösdürmegiň mümkinçilikleri;

9) Beýik Ýüpek ýoluny dikeltmek boýunça Ýewraziýa ýurtlarynyň oňyn

başlangyçlary we tejribesi;

10). Merkezi Aziýa sebitinde «TIR-EPD» ulgamyny «ASYCUDA World» awtomatlaşdyrylan gümrük maglumat ulgamy arkaly sanlylaşdyrmagyň mümkinçilikleri.

Bäsleşigiň düzgünnamasy bilen tanyş bolmak isleseňiz şu ýere basyň!