«HALKARA GATNAŞYKLARYNYŇ TEORIÝASY» ATLY TÄZE KITAP NEŞIR EDILDI

Berkarar döwletiň täze eýýamynyň Galkynyşy döwründe hormatly Prezidentimiz Arkadagly Gahryman Serdarymyzyň parasatly baştutanlygynda üstünlikli amal edilýän ýurdumyzyň daşary-syýasy strategiýasy dünýäniň halkara gatnaşyklary ulgamynda parahatçylygy, howpsuzlygy we durnukly ösüşi üpjün etmek boýunça hemmetaraplaýyn tagallalaryň netijeli bolmagynda möhüm orna eýe bolýar. Şunuň bilen birlikde, ýurdumyzyň halkara abraýynyň, diplomatik gullugynyň mundan beýläk-de kämilleşmegine we geljekki halkaraçy hünärmenleri taýýarlamaklyga aýratyn üns berilýär.

Bu babatda geljekki ýaş halkaraçy hünärmenlere döwrebap bilim bermekde, ýurdumyzyň alyp barýan daşary syýasatyny we häzirki zaman halkara gatnaşyklaryny ylmy we tejribe taýdan düýpli öwrenmekde halkara gatnaşyklary we diplomatiýa boýunça okuw kitaplarynyň we gollanmalaryň taýýarlanmagyna aýratyn üns berilýär. Ýakynda Türkmenistanyň Bilim ministrliginiň hödürlemegi esasynda, Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň uly mugallymy, filosofiýa ylymlarynyň kandidaty Begenç Karaýewiň taýýarlamagynda ýokary okuw mekdepleri üçin niýetlenen “Halkara gatnaşyklarynyň teoriýasy” atly täze okuw kitaby çap edildi.

Bu okuw kitaby 4 bapdan ybarat bolup, halkara gatnaşyklarynyň we diplomatiýasynyň ylmy teoriýalaryna bagyşlanýar. Mundan başga-da, okuw kitaby halkara gatnaşyklary dersiniň maksatnamasyna laýyklykda taýýarlanyp, onda halkara gatnaşyklarynyň binýatlyk düşünjeleri, nazary esaslary, şeýle-de ylmy taýdan öwrenilýän täze ugurlar giňden beýan edilýär. Kitapda halkara gatnaşyklarynyň teoriýasynyň esaslary we ugurlary, diplomatiýanyň hukuk esaslary, Türkmenistanyň Bitaraplyk syýasatynyň halkara gatnaşyklaryndaky orny, halkara gatnaşyklarynyň teoriýasynda esasy paradigmalaryň ähmiýeti, logiki we ylmy esaslar giňişleýin ylmy taýdan açylyp görkezilýär.

Şeýle gollanmalaryň, okuw kitaplarynyň yzygiderli neşir edilmegi bu ugurda bilim alýan talyp ýaşlara, geljekki hünärmenlere hünär ussatlygyny gazanmaklaryna, ylymlary has ösen derejede öwrenmeklerine, täze möhüm bilimleri ele almaga, şeýle hem taýýarlyk derejesini ýokarlandyrmaga uly mümkinçilikleri döredýär.

Hojamyrat BAÝLYÝEW,

Türkmenistanyň Daşary işler ministrliginiň

Halkara gatnaşyklary institutynyň

Halkara gatnaşyklary fakultetiniň III ýyl talyby

Çeşmesi: Halkara gatnaşyklar instituty