Üstünliklere beslenen ýyl

Türkmen döwlet bedenterbiýe we sport institutynda «Pähim-paýhas ummany Magtymguly Pyragy» ýylynyň jemlerine bagyşlanyp dabaraly maslahat geçirildi. Dabaraly maslahat ýylyň dowamynda gazanylan üstünliklere bagyşlanyldy.

2024-nji ýylyň dowamynda Türkmen döwlet bedenterbiýe we sport institutynyň talyp türgenleri halkara ýaryşlaryň 41-sine gatnaşyp, 49 altyn, 35 kümüş, 43 bürünç, jemi 127 sany medallary, ýurdumyzda geçirilen 151 sany sport ýaryşlarynda 855 sany medallary gazanmagy başardylar. Ýokary okuw mekdebinde 52 sany ýurt derejesindäki sport ýaryşlary geçirilip, olarda zehinli türgenleri saýlap-seçip almaga aýratyn ähmiýet berildi. 2024-nji ýylyň 18-nji dekabrynda Gazagystan Respublikasynyň Almaty şäheriniň Gazak sport we syýahatçylyk akademiýasynda Bedenterbiýe we sport uniwersitetleriniň halkara birleşiginiň nobatdaky mejlisinde Türkmen döwlet bedenterbiýe we sport instituty abraýly halkara birleşigiň agzalygyna resmi taýdan kabul edildi. Bedenterbiýe we sport uniwersitetleriniň halkara birleşigi dünýä jemgyýetçiliginiň öňdebaryjy 60-dan gowrak bedenterbiýe we sport ugurly ýokary okuw mekdeplerini özüne birleşdirip, bilelikde ylmy-barlag işleri geçirmek hem-de halkara hyzmatdaşlygyny ösdürmek maksady bilen döredilendir.

Taryhy ýylda Türkmenistanyň ýaşlarynyň arasynda ylmy işler boýunça geçirilen bäsleşikde 2 sany, Türkmenistanyň Magtymguly adyndaky Ýaşlar guramasynyň Merkezi geňeşiniň yglan eden Türkmenistanyň Ýaşlar baýragyny almakda 3 sany, halkara derejeli ders bäsleşiklerinde 21 sany, ýurdumyzyň ýokary okuw mekdepleriniň ders, zehin, taslama we döredijilik bäsleşiklerinde 37 sany, Türkmenistanyň Bilim ministrligi tarapyndan geçirilen ýurdumyzyň ýokary okuw mekdepleriniň talyplarynyň okuw dersleri boýunça Döwlet bäsleşiginde 9 sany baýrakly orunlar eýelenildi. 2024-nji ýylda Türkmenistanyň Bilim ministrliginiň okuw-usuly geňeşiniň degişli bölümi we Türkmenistanyň Ylymlar akademiýasy tarapyndan 8 sany okuw kitabynyň, 3 sany okuw gollanmasynyň golýazmalary makullanyldy. “Pähim-paýhas ummany Magtymguly Pyragy” ýylynda ýokary okuw mekdebimize degişli bolan 6 sany okuw kitaby, 3 sany okuw gollanmasy, 2 sany ylmy ýygyndy resmi neşir edildi. Halkara ylmy maslahatlaryň ýygyndylarynda, ylmy žurnallarda, halkara indekslenýän makalalaryň gorunda, şeýle hem ýurdumyzyň ylmy-usuly žurnallarynda, gazetlerinde we elektron neşirlerinde makalalary çap etmekde uly üstünlikler gazanyldy.

Şeýlelikde, ýylyň jemi boýunça sportuň başa-baş tutluşyk kafedrasynyň uly mugallymy Jennet Geldibaýewa ýokary okuw mekdebi tarapyndan ýylyň göreldeli zähmet çeken mugallymy, “Olimp” ylmy-usuly merkezinde ylmy-barlaglary alyp barmaga işjeň gatnaşan sportuň mediki-biologik üpjünçiligi kafedrasynyň professor-mugallymlary bolsa ýylyň dowamynda ýokary netijeleri görkezenler hökmünde saýlanyldy. Ýylyň ýokary netijeleri görkezen talyp türgeni adyna sportuň olimpiýa görnüşleri fakultetiniň 3-nji ýyl talyby, agyr atletika boýunça dünýä çempiony Şahzadbek Matýakubow, ýylyň göreldeli talyby adyna sport fakultetiniň 4-nji ýyl talyby Serdargeldi Nurmuhammedow, ýylyň iň ökde sport žurnalisti adyna bedenterbiýe fakultetiniň 4-nji ýyl talyby Agabaý Akmyradow mynasyp görüldi.

«Pähim-paýhas ummany Magtymguly Pyragy» ýylynda Hormatly Prezidentimiziň, Gahryman Arkadagymyzyň parasatly baştutanlygynda Garaşsyz, baky Bitarap Watanymyzyň ýokary depginler bilen ösüşine goşant goşmakda, kabul edilen milli we döwlet maksatnamalaryny üstünlikli ýerine ýetirmekde, türkmen halkynyň milli ýörelgelerine mahsus nesli terbiýeläp ýetişdirmekde hem-de tutanýerli zähmet çekmekde ýokary netijeleri görkezen professor-mugallymlara ýadygärlik sowgatlar we hormat hatlary gowşuryldy.

Ýylyň jemlerine bagyşlanan dabaraly maslahata gatnaşyjylar döredilýän giň mümkinçilikler üçin Hormatly Prezidentimiziň, Milli Liderimiz Gahryman Arkadagymyzyň adyna köp alkyşlary beýan etdiler.

Arslan MYRADOW,

Türkmen döwlet bedenterbiýe we sport institutynyň 

Ylym bölüminiň hünärmeni.