«Sport fotožurnalistikasy» atly okuw gollanmasy neşir edildi

Okuw gollanmasy sport žurnalistikasy hünärinde bilim alýan talyp ýaşlara sport fotožurnalistikasynyň aýratynlyklaryny öwretmegi maksat edinýär. Sport ugrundan makalalary ýazmagyň, olary surat bilen bezemegiň ýollaryny salgy berýär. Sport fotožurnalistikasynyň görnüşlerini düşündirýär. Şonuň ýaly-da, sport fotohabarlarynyň türkmen gazet-žurnallarynda berlişini seljerýär. Türkmen döwlet bedenterbiýe we sport institutynyň Ylym bölüminiň başlygy Şamuhammet Nepesowyň taýýarlamagynda «Ylym» neşirýaty tarapyndan neşir edilen «Sport fotožurnalistikasy» atly okuw gollanmasy žurnalistika ugrundan okaýan talyplar üçin niýetlenilendir.

Sport žurnalistikasy hünärinde bilim alýan talyp-ýaşlaryň sport fotožurnalistikasynyň aýratynlyklaryny ýokary derejede ele almaklaryny gazanmak, olara sport fotosuratlaryny taýýarlamak, metbugat neşirlerinde fotosuratlary ýerleşdirmegi öwretmek, sport fotožurnalistiniň işleriniň köptaraplylygyny, şeýle-de ýurdumyzda neşir edilýän gazet-žurnallaryň we daşary ýurtlaryň fotožurnallarynyň üsti bilen sport suratlaryny, kadrlaryny içgin seljermegi öwretmek – ynha, şular dersiň esasy maksady bolup durýar. Okuw gollanmasy girişden, “Sport fotožurnalistikasy dersiniň maksady we wezipeleri”, “Fotografiýanyň döreýiş taryhy”, “Fotožurnalistikanyň taryhyndan umumy maglumat”, “Fotožurnalistika türkmen metbugatynda”, “Türkmen metbugatynyň taryhyndan”, “Sportuň adamzat jemgyýetinde tutýan orny”, “Sport – fotožurnalistikanyň bir ugry hökmünde”, “Sport bilen bagly ilkinji gazet-žurnallar”, “Türkmen sport fotožurnalistleri”, “Sport fotožurnalistine kömek: sport ýaryşlaryndan nähili surat almaly?”, “Sportuň görnüşlerine görä surata almagyň aýratynlyklary”, “Internet we sport fotožurnalistikasy”, “Sport fotožurnalistikasynyň žanrlary”, “Fotodükanlar. Olaryň metbugatda we internet saýtlarynda ulanylyşy”, “Sport fotožurnalistikasy we etika” atly bölümlerden hem-de peýdalanylan edebiýatlardan ybaratdyr.

Gahryman Arkadagymyzyň, Arkadagly Gahryman Serdarymyzyň alyp barýan öňdengörüjilikli içeri we daşary syýasatynyň netijesinde ýurdumyz halkara sport ýaryşlarynyň geçirilýän mekanyna öwrüldi. Şeýle ýaryşlary sport fotožurnalistikasynyň häzirki zaman usullary arkaly şöhlelendirmekde žurnalistikanyň sportdur fotosurat bilen bagly ugry aýratyn ders hökmünde öwrenilmäge mynasypdyr. Dünýäniň ýokary we ýörite hünär mekdeplerinde sport fotožurnalistikasy dersi okadylýar.

Şeýle gollanmalaryň, okuw kitaplarynyň yzygiderli neşir edilmegi bu ugurda bilim alýan talyp ýaşlara, geljekki hünärmenlere hünär ussatlygyny gazanmaklaryna, ylymlary has ösen derejede öwrenmeklerine, täze möhüm bilimleri ele almaga, şeýle hem taýýarlyk derejesini ýokarlandyrmaga uly mümkinçilikleri döredýär.

Arslan MYRADOW,

Türkmen döwlet bedenterbiýe we sport institutynyň

Ylym bölüminiň hünärmeni.