Erasmus+ Ýewropa Bileleşigi taslamasynyň çäklerinde ilkinji duşuşyk

Halkara Parahatçylyk we ynanyş ýylynda Arkadagly Gahryman Prezidentimiziň parasatly ýolbaşçylygynda ýurdumyz ösüşiň täze belentliklerine tarap batly gadam urýar. Hormatly Arkadagly Serdarymyzyň milli bilim ulgamynyň ösüşine aýratyn üns bermegi netijesinde, ylym we bilim ulgamynda halkara hyzmatdaşlygy giňelýär, abraýly ýokary okuw mekdepleri, kompaniýalar we daşary ýurtlaryň ylmy-barlag merkezleri bilen tejribe alyşmak üçin uly mümkinçilikler açylýar. Berkarar Watanymyzyň geljegi bolan ýaşlaryň döwrebap bilim almagy, hünär öwrenmegi we kämilleşmegi ugrunda döwletimiz tarapyndan edilýän tagallalar biziň ýagty geljegimiziň kepilidir.

Hormatly Prezidentimiziň taýsyz tagallalary netijesinde, Türkmenistanyň Ýewropa Bileleşigi bilen ylym we bilim ulgamyndaky halkara hyzmatdaşlygy barha rowaçlanýar.

Ýewropa Bileleşigi tarapyndan maliýeleşdirilýän Erasmus+ maksatnamasynyň çäklerinde Ýewropa ýurtlary hem-de dünýäniň beýleki döwletleri bilen dostluk gatnaşyklary we halkara hyzmatdaşlygy berkeýär. 2021–2027-nji ýyllar üçin niýetlenen Erasmus+ maksatnamasy bilim ulgamyny kämilleşdirmäge we ykdysadyýetiň dürli ugurlary üçin hünärmenleri taýýarlamaga gönükdirilendir. Bu maksatnama ýaşlaryň jemgyýetçilik durmuşyna işjeň gatnaşmagyny, ýaşyl we sanly tehnologiýalara geçişi, şeýle hem sosial integrasiýany esasy ugur edinýär.

Maksatnamanyň utgaşdyryjysy Ýewropanyň Bilim, medeniýet we audiowizual serişdeler boýunça Ýerine ýetiriji agentligidir (EACEA).

Merkezi Aziýa ýurtlary bilen sebitleýin hyzmatdaşlygy berkitmek maksady bilen, 2024-nji ýylda Erasmus+ maksatnamasynyň çäklerinde «Merkezi Aziýanyň bilim we iş bilen üpjünçilik pudaklarynda ekologiýa meselelerini, sosial zerurlyklary we degişli dolandyryşy utgaşdyrmak» (ESGCA) taslamasyny maliýeleşdirmek hem-de onuň utgaşdyryjysy hökmünde Genuýanyň Uniwersitetini bellemek baradaky çözgüt kabul edildi. Türkmenistanyň ýokary okuw mekdeplerinden Halkara nebit we gaz uniwersiteti hem-de Türkmenistanyň Döwlet energetika instituty bu taslamanyň hyzmatdaşlary hökmünde çykyş etmäge hukuk gazandylar.

Taslamada Rumyniýanyň, Slowakiýanyň, Italiýanyň, Gyrgyzystanyň, Gazagystanyň, Täjigistanyň we Özbegistanyň öňdebaryjy uniwersitetleri hem gatnaşýarlar.

Taslamanyň esasy maksady ekologiýa taýdan netijeli dolandyryş we sosial goldaw ulgamynda hyzmatdaşlygy durmuşa geçirmek, bu ugurlar boýunça hünärmenleri taýýarlamak, okuw maksatnamalaryny işläp düzmek we kämilleşdirmek, ylmy-barlag işlerine hem-de innowasiýalara goldaw bermek, hünärmenlere bolan zerurlygy seljermekden ybaratdyr. Taslama 2024-nji ýylyň 1-nji dekabryndan 2027-nji ýylyň 30-njy noýabry aralygynda amala aşyrylar.

2025-nji ýylyň 20–24-nji ýanwary aralygynda Italiýanyň Genuýa şäherinde ESGCA taslamasynyň hyzmatdaş uniwersitetleriniň wekilleriniň gatnaşmagynda ilkinji duşuşyk geçirildi. Duşuşykda hyzmatdaş guramalaryň tanyşdyrylyşy, taslamanyň gurluşy we ýerine ýetiriliş tapgyrlary ara alnyp maslahatlaşyldy, magistr maksatnamalarynyň hem-de innowasion çözgütleriň ornaşdyrylyş strategiýasy işlenip taýýarlanyldy.

Genuýanyň Uniwersitetiniň çakylygy hem-de Türkmenistanyň Hökümetiniň çözgüdi esasynda Halkara nebit we gaz uniwersitetiniň we Türkmenistanyň Döwlet energetika institutynyň wekilleri iş sapary bilen bu duşuşyga gatnaşdylar.

2025-nji ýylyň 21-nji ýanwarynda Genuýanyň Uniwersitetiniň rektoratynda taslama gatnaşýan daşary ýurtly wekiller bilen duşuşyk geçirildi. Duşuşykda uniwersitetiň okuw işleri boýunça prorektory çykyş edip, taslamanyň gatnaşyjylaryna üstünlik we netijeli iş arzuw etdi. Şeýle hem ESGCA taslamasynyň utgaşdyryjysy, Genuýanyň Uniwersitetiniň halkara hyzmatdaşlyk bölüminiň müdiri Anjelo Musai çykyş edip, taslamanyň ähli gatnaşyjylaryna, Ýewropa we Merkezi Aziýa ýurtlarynyň ýokary okuw mekdepleriniň wekillerine minnetdarlyk bildirdi hem-de duşuşygyň gün tertibini tanyşdyrdy.

Duşuşykda Türkmenistanyň Döwlet energetika institutynyň wekili Akmyradow Gadam özüniň ýokary okuw mekdebiniň hem-de taslama bilen bagly alnyp barylýan işleriň tanyşdyrylyşyny iňlis dilinde geçirdi. Şeýle-de, Halkara nebit we gaz uniwersitetiniň wekili Çurýýew Maksat öz ýokary okuw mekdebiniň we taslama bilen bagly işleriniň tanyşdyrylyşyny iňlis dilinde ýerine ýetirdi.

Duşuşygyň çäklerinde ESGCA taslamasynyň resmi internet sahypasynyň (https://esgca-erasmus.com/) deslapky görnüşi taýýar edildi. Sahypada duşuşyk bilen baglanyşykly maglumatlar we suratlar, şeýle hem taslama gatnaşýan ýokary okuw mekdepleri barada maglumatlar ýerleşdirildi.

Taslamanyň utgaşdyryjylary magistr maksatnamasynyň işlenip düzülmegi we ornaşdyrylmagy boýunça çäreleriň meýilnamasyny hödürlediler. Şeýle hem bu maksatnamany işläp düzjek hünärmenler üçin Rumyniýada we Slowakiýada ýörite okuw sapaklarynyň hem-de seminaryň geçiriljekdigi mälim edildi.

Duşuşygyň jemleri boýunça kabul edilen kararlaryň giňişleýin ara alnyp maslahatlaşylmagy üçin tegelek stollaryň guralmagy tabşyryldy.

Biz ylym we bilim ulgamynda bize döredilen mümkinçilikler üçin Arkadagly Gahryman Serdarymyza hem-de Gahryman Arkadagymyza tüýs ýürekden hoşallyk bildirýäris. Hormatly Prezidentimize hem-de Gahryman Arkadagymyza berk jan saglyk, uzak ömür, abadançylyk we Watanymyzyň hem-de halkymyzyň abadançylygy üçin alyp barýan işlerinde uly üstünlikleri arzuw edýäris!