Russiýanyñ Döwlet kitaphanasynda türkmen diliniñ ösüşi barada umumy sapak geçiriler

Türkmenistanyň medeni-köpçülikleýin özgerişleri bilen baglanyşykly häzirki zaman türkmen diliniň ösüşi — 26-njy iýunda Russiýanyň Döwlet kitaphanasynyň Gündogar edebiýaty merkezinde geçiriljek umumy sapagyñ baş temasy bolar. Bu çäre türkmen diline diňe bir aragatnaşyk serişdesi hökmünde däl, eýsem ýurdumyzda bolup geçýän ähli özgerişleriň janly aýnasy hökmünde hem garamaga mümkinçilik berer.

Umumy sapagy Russiýanyň DIM-niň MHGDI-siniň Ýakyn we Orta Gündogar ýurtlarynyň dilleri kafedrasynyň dosenti, filosofiya ylymlarynyň kandidaty, belli türkmen dili mugallymy Maýa Gylyjowa geçirer. Onuň çykyşy soňky onýyllyklarda Türkmenistanyň jemgyýetçilik durmuşyndaky möhüm wakalaryň edebi we gepleşik dili çygryndaky giň göwrümli sosiologik we lingwistik gözlegleriniñ netijelerine esaslanýar.

Belli bolşy ýaly, jemgyýetiñ durmuşynda bolup geçýän syýasy, ykdysady we durmuş üýtgemeleri dile täsir edýär. Bu özgerişler arkaly islendik jemgyýetçilik prosesleri seljerip bolýar. Bu barlaglar Türkmenistanyñ baý taryhynyñ we çalt depginde ösýän häzirki gününiñ onuñ dilinde şöhlendirilişine has çuñ düşünmäge mümkinçilik berýär.

Şeýle ylmy çäreler diñe bir Türkmenistan bilen Russiýanyñ arasynda akademiki aragatnaşyklary pugtalandyrmaga ýardam bermän, eýsem türkmen diliniñ we medeniýetiniñ daşary ýurtda wagyz edilmeginde esasy orun tutýar. Russiýadaky türkmen diasporasy, sebiti öwrenýän tapyplar, diplomatlar we derñewçiler üçin bu ilkinji elden çuñlaşdyrylan bilimleri almaga, öz taryhy dogduk mekany bilen aragatnaşyk duýmaga ajaýyp mümkinçilikdir.

Şeýle umumy sapaklaryñ Russiýanyň Döwlet kitaphanasy ýaly öňdebaryjy ylmy we medeni merkezlerde geçirilmegi Merkezi Aziýa we Türkmenistana, şeýle hem olaryň medeni we dil mirasyna bolan gyzyklanmanyň artýandygynyň aýdyň subutnamasydyr. Bu bolsa halklaryň arasyndaky dialoga we özara düşünişmäge uly goşant goşýar.