ŞATLYKLY TOMUS – YLHAM ÇEŞMESI

“Awaza” milli syýahatçylyk zolagynda ýerleşýän “Daýanç” çagalar sagaldyş-dynç alyş merkezinde dynç alýan çagalaryň arasynda Türkmenbaşy şäheriniň takyk ugurly dersleri çuňlaşdyryp öwredýän ýöriteleşdirilen 10-njy orta mekdebiniň kitaphanaçysy Güljahan Garabaýewanyň ýolbaşçylygynda “Paýhas ummanynyň dürdäneleri” atly çeper okaýyş bäsleşigi geçirildi. Ýurdumyzyň dürli welaýatlaryndan gelen 9-13 ýaşly mekdep okuwçylary bäsleşige uly höwes bilen gatnaşdylar.

Bäsleşikde türkmen halkynyň Milli Lideri Gahryman Arkadagymyzyň we hormatly Prezidentimiz Arkadagly Gahryman Serdarymyzyň eserlerinden çeper okaýyş guraldy. Okuwçylar Gahryman Arkadagymyzyň we Arkadagly Gahryman Serdarymyzyň atalyk kitaplaryndan bölekleri ussatlyk bilen ýerine ýetirdiler. Çeper okaýyş bäsleşigine gatnaşan çagalar Gahryman Arkadagymyzyň “Türkmen medeniýeti” atly kitabyndan we Arkadagly Gahryman Serdarymyzyň “Ýaşlar – Watanyň daýanjy”, “Änew – müňýyllyklardan gözbaş alýan medeniýet” atly kitaplaryndan bölekleri labyzly ýerine ýetirdiler.

Bäsleşik gyzykly we şowhunly geçdi. Bäsleşigiň netijesinde aýratyn zehinli çagalar ýüze çykaryldy. Çeper okaýyş bäsleşigine gatnaşan ähli okuwçylara Türkmenbaşy şäher Bilim bölüminiň adyndan sagbolsun aýdyldy we aýratyn tapawutlanan çagalar Hormat haty bilen sylaglandy. Tomus möwsümini şadyýanlykda geçirýän çagalar özleri üçin döredilýän mümkinçilikler babatda türkmen halkynyň Milli Lideri Gahryman Arkadagymyza we homatly Prezidentimiz Arkadagly Gahryman Serdarymyza tüýs ýürekden hoşallyk sözlerini aýtdylar.

Jemile Metmyradowa,

Balkan welaýatynyň Türkmenbaşy şäher bilim bölümüniň hünärmeni.