Wenada geçirilen Bütindünýä orkestr festiwalynda Türkmenistanyň Ýaşlar kamera orkestri çykyş etdi

2025-nji ýylyň 23-26-njy iýuly aralygynda Awstriýanyň paýtagty Wenada Bütindünýä orkestr festiwaly geçirilýär. Şu ýyl bu abraýly döredijilik forumy dünýäniň 40-dan gowrak ýurdunyň orkestrlerini birleşdirdi. Festiwaly açmak ýaly uly hormat bolsa Türkmenistanyň at gazanan artisti Resul Gylyjowyň ýolbaşçylygyndaky Türkmenistanyň Ýaşlar kamera orkestrine miýesser etdi.

23-nji iýulda meşhur Wena şäher häkimýetiniň binasynda geçirilen açylyş dabarasynda türkmen orkestri çykyş etdi. Bu döredijilik topary bu derejä 2024-nji ýylda, "Kamera orkestri" ugry boýunça altyn baýragy gazanyp, tomaşaçylaryň hem-de emin agzalarynyň ýokary bahasyna mynasyp bolany üçin çagyryldy.

2025-nji ýyl üçin taýýarlan konsert maksatnamasynyň çäklerinde orkestr Frans Şubertiň eserini ýerine ýetirdi we halkara sahnasynda ýene-de bir gezek ýokary hünär derejesini hem-de täsirli ýerine ýetiriş ussatlygyny görkezdi.

Türkmenistanyň ýaşlar kamera orkestri bu festiwala ilkinji gezek geçen ýylda gatnaşdy, emma şondan bäri abraýly halkara çäräniň görnükli wekili hökmünde özüniň ornuny tapmagy başardy. Onuň gazanan üstünlikleri Türkmenistanyň baý aýdym-saz medeniýetine we ýaş ýerine ýetirijileriniň ýokary derejesine dünýäniň artýan hormat-sarpasyny görkezýär. Şu ýylky festiwal maksatnamasyna konsertler, bäsleşikler we ussatlyk sapaklary hem girýär. Bu çäreleriň jemleýji pursady bolsa, uly dabaraly konsert bolar.