Türkmenistanyň Yslamabatdaky ilçihanasy golf ýaryşyny gurady

Türkmenistanyň Yslamabatdaky ilçihanasy tarapyndan 27-nji sentýabrda ýurduň Garaşsyzlygynyň 34 ýyllygy we hemişelik Bitaraplygynyň 30 ýyllygy mynasybetli ýoldaşlyk golf ýaryşy we baýramçylyk kabul edişligi guraldy.

Çäre Yslamabatdaky «Pines Golf Club» klubunyň ýolbaşçylary bilen bilelikde geçirildi. Ýaryşa Pakistanda akkreditirlenen ilçiler, diplomatlar we pakistanly ezber golfçular gatnaşdy.

Bäsleşik atmosferasy dostluk, sport bäsdeşligi we birek-birege hormat goýmak ruhy bilen tapawutlandy. Bäsleşikden soň iň gowy netijeleri görkezen oýunçylara Türkmenistanyň ilçihanasynyň adyndan ýadygärlik baýraklary we sowgatlar gowşuryldy.

Bäsleşigiň sport bölüminden soň baş myhman hökmünde Pakistanyň Daşary işler ministrliginiň goşmaça sekretary Tshamid Asghar Han bilen gala dabarasy geçirildi. Myhmanlar agşamyň mähirli we dostlukly atmosferasyny bellediler, Türkmenistan bilen Pakistanyň arasyndaky medeni, ynsanperwer we diplomatik gatnaşyklaryň pugtalandyrylmagyna goşant goşan çäräniň ýokary guramaçylygyna minnetdarlyk bildirdiler.

Çeşme: Türkmenistanyň Daşary işler ministrligi