Türkmenistan – ABŞ: Ylym we bilim ulgamynda hyzmatdaşlygyň täze gözýetimleri

2025-nji ýylyň 22-nji oktýabrynda, Amerikanyň Birleşen Ştatlaryna iş saparynyň çäklerinde, Türkmenistanyň bilim ministriniň orunbasarynyň ýolbaşçylygyndaky wekiliýetiň agzalarynyň ABŞ-nyň öňdebaryjy gözleg uniwersitetleriniň biri – Montana uniwersitetiniň ýolbaşçylary bilen duşuşygy geçirildi. Duşuşyk Türkmenistanyň Amerikanyň Birleşen Ştatlaryndaky Ilçihanasynyň guramagynda geçirildi we ol bilim ulgamyndaky hyzmatdaşlygy ösdürmäge gönükdirilen çäreleriň dowamy boldy.

Duşuşyga Montana ştatynyň Milli Gwardiýasynyň wekilleri hem gatnaşdy, bu hem hyzmatdaşlygyň köpugurly häsiýetini görkezdi.

Montana uniwersitetiniň ýolbaşçylary türkmen wekiliýetini mähirli garşy aldylar we şeýle duşuşyklaryň ikitaraplaýyn gatnaşyklary has-da ösdürjekdigine ynam bildirdiler.

Duşuşygyň dowamynda uniwersitetiň akademiki maksatnamalary, Mansfield merkezi, halkara bölüminiň işleri, ylmy-barlag taslamalary we howanyň üýtgemegi, suw serişdeleriniň rejeli ulanylmagy ýaly meseleler bilen tanyşdyryldy.

Soňra türkmen wekiliýetiniň agzalary uniwersitetiň kampusyna gezelenç etdiler we iki topara bölünip, sapaklara gatnaşdylar. Merkezi Aziýa we Günbatar Aziýa boýunça alnyp barylýan «Gaýtadan dikeldilýän we arassa energiýa» temasyndaky sapak aýratyn täsir galdyrdy.

Türkmen tarapyna okuw meýilnamalary, dersler we Montana uniwersitetinde ulanylýan kredit ulgamynyň aýratynlyklary giňişleýin düşündirildi.

Duşuşykda geljekde hyzmatdaşlygy ösdürmek boýunça birnäçe anyk teklipler ara alnyp maslahatlaşyldy. Kiberhowpsuzlyk, ekologiýa, daşary ýurt dillerini öwretmek we GIS ulgamy boýunça hyzmatdaşlyk mümkinçilikleri aýratyn bellenildi.

Saparyň ýokary derejede geçmeginde Türkmenistanyň ABŞ-daky Ilçihanasynyň utgaşdyryjy roly aýratyn bellenilmäge mynasypdyr. Ilçihananyň birinji sekretary-konsuly Şohrat Pirmuhammedow: «Bilim ulgamyndaky hyzmatdaşlyk Türkmenistanyň we Amerikanyň arasynda geljegi uly ugurlaryň biri bolup durýar. Ilçihananyň başlangyjy bilen birnäçe uniwersitetler bilen duşuşyklar meýilleşdirildi, Montana uniwersiteti bilen geçirilen duşuşyk bolsa bu strategik ugurda möhüm ädimdir. Biz uniwersitet hyzmatdaşlygyny adam maýasyna goýlan maýa hökmünde görýäris, bu bolsa ýurdumyz üçin aýratyn ähmiýetlidir» diýip belledi.

Taraplar duşuşygyň netijeliligine ýokary baha berip, ikitaraplaýyn bilim gatnaşyklarynyň ösüşinde bu duşuşygyň ähmiýetini nygtadylar.

Montana uniwersitetine edilen sapar, Türkmenistanyň we Amerikanyň arasyndaky dostlukly gatnaşyklaryň ösüşinde nobatdaky möhüm ädim boldy we ylym-bilim ulgamyndaky özara peýdaly hyzmatdaşlygyň täze sahypasyny açdy.

Türkmenistanyň Bilim ministrligi