TDBGI-niň mugallymlary Türkmenstanyň hormatly Prezidentiniň sowgady bilen sylaglandy

2025-nji ýylyň 3-nji noýabrynda, ýurdumyzda giňden bellenilýän Gurluşyk we senagat toplumynyň işgärleriniň güni mynasybetli geçirilen dabaralaryň çäklerinde, Türkmenistanyň ykdysadyýetiniň öňdebaryjy pudaklarynda ýokary netijeleri gazanan işgärler bilen birlikde, Türkmen döwlet binagärlik-gurluşyk institutynyň birnäçe mugallymy hem Türkmenstanyň hormatly Prezidentiniň sowgady bilen sylaglandylar. Olar “Awtomobil ýollarynyň gurluşygy” kafedrasynyň müdiri, tehniki ylymlaryň kandidaty Ýolly Myradow, “Binagärlik” kafedrasynyň müdiri, uly mugallym Äşe Gubaýewa, “Gurluşyk materiallary” kafedrasynyň uly mugallymy Baýramaly Serdarow, “Binagärlik” kafedrasynyň mugallymy Şirmuhammet Jepbarow.

Bu ýokary sylaglar ýurdumyzyň gurluşyk we senagat toplumynyň ösüşine goşan mynasyp goşandy, şeýle hem ýaşlara berilýän döwrebap ylym-bilim terbiýesiniň döwlet derejesinde ykrar edilmeginiň aýdyň beýany boldy.

Täze taryhy eýýamda ýurdumyzyň gurluşyk we senagat toplumy milli ykdysadyýetiň strategik ugurlarynyň biri hökmünde ösüşiň täze basgançaklaryna çykdy. Milli we döwlet maksatnamalarynyň üstünlikli ýerine ýetirilmegi netijesinde ýurdumyzyň ähli sebitlerinde döwrebap ýaşaýyş jaýlary, önümçilik desgalary, medeni-durmuş maksatly binalar gurlup, halkymyzyň hyzmatyna berildi. Şeýle hem senagat, himiýa, energetika we ýol gurluşygy pudaklarynda täze kuwwatly kärhanalaryň hem-de önümçilik toplumlarynyň işe girizilmegi ykdysady ösüşiň depginini has-da güýçlendirdi.

Berkarar döwletiň täze eýýamynyň Galkynyşy döwrüniň Halkara parahatçylyk we ynanyşmak ýylynda, ata Watanymyzyň gözelligi bilen tanalýan “Awaza” milli syýahatçylyk zolagynda 2025-nji ýylyň 3–4-nji noýabry aralygynda geçirilen “Türkmenistanyň gurluşyk, senagat, himiýa, energetika pudaklarynyň ösüşi” atly halkara sergisi we maslahaty hem ýurdumyzyň ykdysady ösüşiniň möhüm wakalarynyň biri boldy.

Dünýäde deňi-taýy bolmadyk ak mermerli Aşgabat şäheri, döwrebap welaýat merkezleri, şeýle hem Merkezi Aziýada ilkinji “akylly şäher” bolan Arkadag şäheriniň gurluşygy häzirki zaman türkmen binagärliginiň ösüş derejesiniň beýanydyr. Milli binagärlik däpleriniň dünýäniň öňdebaryjy tejribeleri bilen sazlaşykly utgaşdyrylmagy ýurdumyzyň gurluşyk mekdebiniň ýokary hünär derejesini görkezýär. Munuň özi ata-babalarymyzyň köpasyrlyk tejribesine esaslanyp, ylmyň, inženerçiligiň we häzirki zaman tehnologiýalarynyň üstünlikleriniň döredijilikli birleşmeginiň netijesidir.

Bu üstünlikleriň ählisi hormatly Prezidentimiz Arkadagly Gahryman Serdarymyzyň hem-de türkmen halkynyň Milli Lideri, Gahryman Arkadagymyzyň öňdengörüjilikli we döredijilikli syýasatlarynyň miwesidir. Olaryň taýsyz tagallalarynyň netijesinde ýurdumyzyň gurluşyk, senagat, energetika we ulag ulgamlary täze ösüş tapgyryna gadam basýar, ýurdumyz bolsa sebit we halkara derejesinde täze üstünliklere ýetýär.

Türkmen döwlet binagärlik-gurluşyk institutynyň mugallymlary we talyp ýaşlary, şeýle giň mümkinçilikleri döredip berýändikleri üçin, Gahryman Arkadagymyza we Arkadagly Gahryman Serdarymyza tüýs ýürekden çäksiz sagbolsunlaryny aýdýarlar.

Goý, Gahryman Arkadagymyzyň we Arkadagly Gahryman Serdarymyzyň janlary sag, ömürleri uzak bolsun! Döwletimiziň ösüşi we halkymyzyň abadançylygy ugrunda alyp barýan beýik işleri hemişe rowaçlyga beslensin!

Amanmyrat Arazow, Türkmen döwlet binagärlik-gurluşyk institutynyň Ylym bölüminiň başlygy