“Türkmenistan — Bitaraplygyň mekany” atly breýn-ring bäsleşigi

Türkmenistanyň hemişelik Bitaraplygynyň şanly 30 ýyllyk baýramy mynasybetli Halkara senagatçylar we telekeçiler uniwersitetiniň gurnamagynda ýurdumyzyň 17 sany ýokary okuw mekdebiniň talyplarynyň arasynda «Türkmenistan — Bitaraplygyň mekany» atly breýn-ring bäsleşigi geçirildi.

Bäsleşigiň birinji tapgyrynda Halkara ynsanperwer ylymlary we ösüş uniwersitetiniň talyplary Döwletmämmet Azady adyndaky Türkmen milli dünýä dilleri institutynyň topary bilen bäsleşip, 6:3 hasabynda ýeňiş gazandylar.

Ikinji tapgyrda olar Magtymguly adyndaky Türkmen döwlet uniwersitetiniň talyplaryny 4:2 hasabynda ýeňmegi başardylar.

Soňra S. Nyýazow adyndaky Türkmen oba hojalyk uniwersitetiniň toparyny 6:2 hasabynda ýeňip, final tapgyryna gatnaşmaga hukuk gazandylar.

Finalda biziň uniwersitetimiziň topary Türkmen döwlet ykdysadyýet we dolandyryş institutynyň talyplary bilen çekeleşikli bäsleşik geçirip, üstünlik bilen ýeňiji bolmagy başardy.

Bäsleşige taýýarlyk döwründe talyplar Gahryman Arkadagymyzyň hem-de Arkadagly Gahryman Serdarymyzyň kitaplaryny içgin öwrenip, olaryň baý düşünjelerinden we terbiýeçilik ähmiýetli pikirlerinden ruhlandylar.

Halkymyzyň gadymdan gelýän hoşniýetlilik, parahatçylyksöýüjilik we ynsanperwerlik ýaly asylly däplerinden gözbaş alýan hemişelik Bitaraplygymyzyň ähmiýetini açyp görkezmek maksady bilen geçirilen breýn-ring bäsleşigi gyzgalaňly hem-de döredijilikli ýagdaýda geçdi.

Bäsleşikde berlen soraglar Gahryman Arkadagymyzyň we Arkadagly Gahryman Serdarymyzyň eserleriniň esasynda taýýarlanylyp, onuň dowamynda umumy bilim hem-de logiki mazmunly sowallar hem berildi.

Şeýle ylmy-intellektual bäsleşikler talyplaryň döredijilik mümkinçiliklerini açýar, olaryň pikirlenmek, çekeleşikli ýagdaýda çözgüt tapmak başarnyklaryny ösdürýär. Bitaraplyk baradaky sowallar diňe bir taryhy maglumatlary däl, eýsem, ýaşlaryň Watana bolan buýsanjyny hem artdyrýar. Biz ýaş nesliň Gahryman Arkadagymyzyň hem-de Arkadagly Gahryman Serdarymyzyň kitaplarynda beýan edilen gymmatly düşünjelerden ylham alyp ösüş ýoluna ynam bilen gadam goýýandygyna guwanýarys.

Bu bäsleşik ýurdumyzyň talyp ýaşlarynyň arasynda Bitaraplyk ideýasyny, parahatçylyk söýüjilik hem-de yhlasy bilen zähmet çekmek ýörelgelerini wagyz etmekde möhüm ähmiýete eýe boldy.

Bäsleşikde üstünlikli çykyş edip, ýokary netijeleri görkezen Halkara ynsanperwer ylymlary we ösüş uniwersitetiniň talyplary —

Yhlas Kömekow, Aýläle Çaljaýewa, Guljahan Gurbanowa, Sapargylyç Saparglyjew, Meňli Çaryýewa, Jennet Isgenderowa, Alp Arslan Taganow we Mehriýe Rozyýewa — ýeňijiler diýlip yglan edildi.

Ýeňiji talyplarymyz Halkara senagatçylar we telekeçiler uniwersitetiniň I derejeli diplomy we hemaýatkärleriň gymmat bahaly sowgatlary bilen sylaglandy.

Orazsoltan Annamyradowa

Halkara ynsanperwer ylymlary we ösüş uniwersitetiniñ mugallymy