Türkmenistanyň wekiliýeti Daşkentde geçirilýän halkara foruma gatnaşýar

Türkmenistanyň wekiliýeti Özbegistan Respublikasynyň paýtagty Daşkent şäherinde geçirilýän «Merkezi Aziýada ruhy miras we aň-bilim» atly halkara kongrese we onuň dowamynda guralýan medeni-ynsanperwer ugurly dürli çärelere gatnaşýar. Bu çäreler şu ýylyň 12 – 16-njy noýabry aralygynda Özbegistan Respublikasynyň Daşkent şäherinde geçirilýän Merkezi Aziýa döwletleriniň Baştutanlarynyň ýedinji konsultatiw duşuşygynyň çäklerinde guralýar.

Çärelere ýurdumyzyň wekiliýetiniň düzüminde Türkmenistanyň Bilim, Medeniýet ministrlikleriniň, Ylymlar akademiýasynyň, ugurdaş ýokary okuw mekdepleriniň, Magtymguly adyndaky Ýaşlar guramasynyň we köpçülikleýin habar beriş serişdeleriniň wekilleri işjeň gatnaşýarlar.

Halkara kongresiň çäklerinde «Merkezi Aziýanyň taryhy-medeni mirasy: bir geçmiş — umumy geljek» atly akademiki forum; Merkezi Aziýa ýurtlarynyň kino günleri we «Obýektiwde Merkezi Aziýa: dokumental filmler, kino we medeni hakyda», «Toýundan ýasalan belgilerden sanly arhiwlere çenli: Merkezi Aziýanyň kitaphanalarynyň geçen ýoly», «Medeniýet» teleýaýlymlary: medeni-taryhy mirasy ýaýbaňlandyrmagyň täze görnüşleri» atly halkara maslahatlar; «Ýaşlar we sanly döwür: gadymy golýazmalardan emeli aňa çenli» atly ýaşlar forumy; Merkezi Aziýa ýurtlarynyň kitaplarynyň, şeýle-de Merkezi Aziýa ýurtlarynyň suratkeşleriniň eserleriniň sergileri; Merkezi Aziýa ýurtlarynyň ýazyjylarynyň we şahyrlarynyň forumy ýaly dürli ugurdaş çäreler guraldy.

Foruma ýurdumyzyň wekiliýetiniň düzüminde Türkmenistanyň Bilim ministrliginiň Ýaşlar syýasaty bölüminiň başlygy hem işjeň gatnaşýar. Türkmen ýaşlaryna halkara derejede ýurdumyza mynasyp wekilçilik etmäge döredilýän şeýle giň mümkinçilikler olara bildirilýän belent ynamdan nyşandyr. Halkara kongresiň çäklerinde geçirilen çärelerde türkmen tarapynyň çykyşlarynda ýurdumyzda ýaşlar syýasaty babatda alnyp barylýan giň gerimli işler, ýaşlary watansöýüjilik, milli mirasa hormat goýmak, ata-babalarymyzdan gelýän asylly ýörelgelere eýermek ruhunda terbiýelemek babatda durmuşa geçirilýän çäreler, ýaş nesilleriň halkara hyzmatdaşlygyny ösdürmek ugrundaky tagallalary we şunda sebitiň ýurtlary üçin täze gözýetimlerdir mümkinçilikler barada hem giňişleýin durlup geçildi.

Sanly tehnologiýalaryň ösen häzirki döwründe ýaşlaryň ornuna bagyşlanan bu forumyň pederleriň miras goýan köpasyrlyk paýhasyny häzirki döwrüň innowasiýa mümkinçilikleri bilen birleşdirmek ýaly umumy maksatlaryň amala aşyrylmagynda dialog üçin platforma bolup durýandygyny nygtamak gerek. Şunda ruhy mirasdan sanly geljege çenli Merkezi Aziýanyň ylmyň, medeniýetiň we bilimiň mekany bolandygy aýratyn bellenilmäge mynasypdyr. Ýeri gelende, ýurdumyzda ýaşlar üçin giň mümkinçilikleriň döredilýändigini, 2023-nji ýylyň şygarynyň hem hut ýaşlar bilen baglanyşdyrylandygyny, şol ýylda «Türkmenistanyň ýaşlarynyň halkara hyzmatdaşlygynyň 2023 — 2030-njy ýyllar üçin Strategiýasynyň» kabul edilendigini, ýurdumyzyň başlangyjy bilen geçirilen halkara çäreleriň, hususan-da, Arkadag şäherinde, Mary welaýatynda we ABŞ-nyň Nýu-Ýork şäherinde halkara ýaşlar forumlarynyň üstünlikli geçirilendigini we olaryň oňyn netijelere beslenendigini hem aýtmalydyrys. Şu ýylyň awgustynda «Awaza» milli syýahatçylyk zolagynda BMG-niň Deňze çykalgasy bolmadyk ösüp barýan döwletler boýunça üçünji maslahatynyň çäklerinde üstünlikli geçirilen ýaşlar forumy hem ýurdumyzda röwşen geljegimiziň eýeleri bolan ýaşlar barada taýsyz tagallalaryň edilýändiginiň aýdyň mysallarynyň biri boldy.

Daşkentde geçirilýän halkara forumyň barşyndaky dürli çärelerde hem bular barada bellenilip, hemişelik Bitaraplygymyzyň şanly 30 ýyllygynyň bellenilýän Halkara parahatçylyk we ynanyşmak ýylynyň ata Watanymyz we halkymyz üçin aýratyn ähmiýetli taryhy ýyllaryň biridigi nygtaldy. Şunuň bilen birlikde, türkmen döwletiniň halkara derejede parahatçylygy, ynanyşmagy, durnukly ösüşi pugtalandyrmakda, howanyň üýtgemegi ýaly ählumumy meseleleriň oýlanyşykly, oňyn çözgütlerini tapmakda öňe sürýän başlangyçlary barada bellenilip, ýaşlaryň işjeňligini, tagallalaryny goldamak ugrundaky üstünlikleri hakynda aýdyldy. Şeýle-de sebitiň halklarynyň umumy we biri-biri bilen aýrylmaz baglanyşykly ruhy mirasynyň, aň-bilim ösüşi babatda gazananlarynyň, gymmatlyklarynyň ýaş nesillere aýawly geçirilmeginde, häzirki döwrüň möhüm meseleleri barada çynlakaý pikirlenip we netijeli çözgütleri kabul edip bilýän kämil ýaşlary terbiýeläp ýetişdirmek ugrunda öňde durýan wajyp wezipelere aýratyn orun berildi.

Türkmenistanyň Bilim ministrligi