“Goý, ýaňlansyn Bitaraplyk aýdymy” atly aýdym-sazly konsert

Türkmenistanyň Oguz han adyndaky Inžener-tehnologiýalar uniwersitetiniň uly mejlisler zalynda hemişelik Bitaraplyk derejesiniň ykrar edilmeginiň 30 ýyllygynyň öňüsyrasynda “Goý, ýaňlansyn Bitaraplyk aýdymy” atly aýdym-sazly konsert geçirildi. Konsert uniwersitetiň aýdymçylarynyň ýerine ýetirmeginde şanly sene mynasybetli ýaňlanan joşgunly waspnama bilen açyldy. Soňra «Parahatçylyk buşlukçysy» diýen edebi aýdym-sazly kompozisiýa ýerine ýetirildi. Dürli halklaryň milli aýdymlarynyň, sazlarynyň we tanslarynyň bir bitewülige utgaşdyrylmagy hormatly Prezidentimiziň alyp barýan syýasatynyň binýadyny emele getirýän oňyn bitaraplygyň halklaryň dostlugyna gönükdirilen häsiýetiniň beýanyna öwrülen ajaýyp sungat öwüşginini çaýdy. Ondan soňra şahyranalyga we şadyýanlyga, sazlaşyga beslenip aýdylan ýapon, hindi, iňlis, ispan, fransuz aýdymlary gülzarly ajaýyp sungat sährasyny ýatlatdy. Olar misli kaleýdoskopdaky ýaly, dünýäniň dürli medeniýetleriniň aýdym-saz gymmatlyklarynyň haýran galdyryjy owazly keşbini emele getirdiler. Folklor äheňinde ýaňlanan aýdym-sazly çykyşlar azerbaýjan, ermeni, rus aýdymly tanslar bilen dowam etdirildi. «Lazgi» özbek tansy hemmelerde aýratyn ruhubelentlik döretdi. Aýdymçylaryň we tansçylaryň yzygiderli çalşyp ýerine ýetiren bu çykyşlary ajaýyp sahna görnüşlerini emele getirdiler. Soňra “Oguzlar” döredijilik tans topary dünýä derejesinde adamzat medeni mirasynyň bir bölegi hökmünde ykrar edilen joşgunly küştdepdi tansyny ýerine ýetirdiler. Beýik Ýüpek ýolunyň ugry boýunça gyzykly syýahata öwrülen bu konsert Garaşsyz, Bitarap Türkmenistanyň oňyn syýasatynyň açyklygyny, köp ugurlylygyny beýan etdi hem-de ýurtlaryň we halklaryň birek-birege ynam we özara baýlaşdyrmak babatynda gatnaşyklarynda medeniýetiň, sungatyň ornuny ýene bir gezek äşgär etdi. Dabaranyň ahyrynda Türkmenistanyň Oguz han adyndaky Inžener-tehnologiýalar uniwersitetiniň “Oguzlar” döredijilik toparynyň aýdymçylary, tansçylary, sazandalary we folklýor-etnografiýa toparynyň talyplary hem-de konserte gatnaşyjylaryň ählisi bilelikde «Üç mukaddeslik» atly aýdymy ýerine ýetirdiler, bu aýdymda çuňňur watançylyk, türkmen halkynyň Milli Lideri Gahryman Arkadagymyzyň we Arkadagly Gahryman Serdarymyzyň baştutanlygynda ösüşli we döredijiligiň ýoly bilen ynamly öňe barýan Watanymyza buýsanç duýgulary ýaňlandy. Konsert uniwersitetiň “Oguzlar” döredijilik toparynyň mugallymlarynyň we talyplarynyň Halkara Bitaraplyk gününe mynasyp sowgady boldy.