Arkadag şäheriniň 1-nji ýöriteleşdirilen okuw-terbiýeçilik toplumynda «Beýik işler bilime daýanýar, bilim bolsa terbiýe bilen geçmeli gymmatlykdyr» diýen şygar bilen geçirilen 2025-2026-njy okuw ýylynyň ýanwar maslahaty

Şu gün Arkadag şäheriniň 1-nji ýöriteleşdirilen okuw-terbiýeçilik toplumynda «Beýik işler bilime daýanýar, bilim bolsa terbiýe bilen geçmeli gymmatlykdyr» diýen şygar bilen 2025-2026-njy okuw ýylynyň ýanwar maslahaty geçirildi. Oňa Arkadag şäher häkimliginiň hem-de bilim müdirliginiň degişli ýolbaşçylary, şäheriň bilim-terbiýeçilik edaralarynyň tejribeli mugallymlaryň 165-si we jemgyýetçilik guramalarynyň wekilleri gatnaşdylar.

Maslahat Döwlet senasynyň ýaňlanmagy bilen başlandy. Soňra giň gerimli çykyşlara orun berildi. Onda Arkadag şäher häkiminiň orunbasary Altyn Tejenowa, Arkadag şäher bilim müdirliginiň başlygy Ýanwar Annaýew, TMÝG-niň Arkadag şäher Geňeşiniň başlygy Mekan Amanlyýew hem-de TDP-niň Arkadag şäher komitetiniň bölüm müdiri Araphan Erniýazow dagylar çykyş etdiler. Çykyşlarda kämil bilimiň beýik geljegiň binýadydygy, ähli ösüşlerimiziň, bagtyýarlygymyzyň we abadançylygymyzyň röwşen ýoludygy, şunuň bilen baglylykda, häzirki wagtda milli bilim ulgamyny halkara derejesinde ösdürmek babatda Gahryman Arkadagymyzyň başyny başlan giň gerimli özgertmeleriniň hormatly Prezidentimiziň baştutanlygynda üstünlikli durmuşa geçirilýändigi buýsanç bilen bellenildi.

Maslahatyň gün tertibine Arkadag şäheriniň bilim ulgamynda 2025-2026-njy okuw ýylynyň birinji ýarymýyllygynyň jemini jemlemek hem-de ikinji ýarymynda öňde durýan möhüm wezipeleri kesgitlemek, mekdebe çenli bilim edaralarynda we umumybilim berýän orta mekdeplerde bilim alýan çagalarda watansöýüjiligi, kämil ahlak ýörelgeleri, lebzihalallygy, türkmen halkynyň gadymy däp-dessurlaryna ygrarlylygy terbiýelemek, olaryň döredijilik ukyp-başarnyklaryny açmak, ylym-bilime bolan höwesini artdyrmak, şeýle hem çagalaryň irki ýaşdan başlap beden we akyl taýdan sazlaşykly ösüşini üpjün etmek, bilim işine okatmagyň iň täze usullaryny giňden ornaşdyrmak, mugallymlaryň sapaklara döredijilikli çemeleşmeklerini ýola goýmak, okuwçylaryň okuw maksatnamalarynyň mazmunyny doly özleşdirmeklerini gazanmak ýaly meseleler girizildi.

Gün tertibiniň meselelerine laýyklykda, «Bilim edaralarynda halypaçylyk işini guramagyň Gözükdirijisine» laýyklykda, umumybilim edaralarynda halypa-şägirt gatnaşyklarynyň talabalaýyk ýola goýluşy» diýen tema boýunça Arkadag şäheriniň iňlis dili dersine ýöriteleşdirilen 2-nji orta mekdebiň müdiri Guwanç Berdiýew, «Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasyna», Türkmenistanda çaganyň irki ösüşi we mekdebe taýýarlygyny ösdürmek babatynda döwlet Maksatnamalaryna hem-de bilim işini kadalaşdyryjy hukuknamalara laýyklykda okuw-terbiýeçilik işleriniň netijeliligini gazanmak boýunça alnyp barylýan işler» diýen tema boýunça Arkadag şäheriniň 4-nji çagalar bakja-bagynyň müdiri Gülşat Annadurdyýew, «Ýaş nesle ruhy-ahlak terbiýesini bermekde türkmen halkynyň Milli Lideri Gahryman Arkadagymyzyň atalyk kitaplarynyň ähmiýeti» diýen tema boýunça Arkadag şäheriniň iňlis dili dersine ýöriteleşdirilen 3-nji orta mekdebiniň mugallymy Oguljennet Şamykowa, «Mekdebe çenli çagalar edaralarynyň pedagogik işgärleriniň hünär bilimlerini, pedagogik ussatlyklaryny yzygider kämilleşdirmek hem-de usuly taýýarlyk derejesini has-da ýokarlandyrmak, öňdebaryjy tejribäni öwrenmek we ulanmak babatda alnyp barylýan işler» diýen tema boýunça Arkadag şäheriniň 20-nji çagalar bagynyň terbiýeçi-usulyýetçisi Ogulboldy Myradowa, «Başlangyç synp mugallymlarynyň hünär derejesini ýokarlandyrmakda we pedagogik ussatlygyny kämilleşdirmekde halypa-şägirtlik gatnaşyklaryny ýola goýmagyň iş tejribesinden» diýen tema boýunça Arkadag şäheriniň 1-nji ýöriteleşdirilen okuw-terbiýeçilik toplumynyň mugallymy Nursoltan Ýelterowa, «Mekdebe çenli ýaşly çagalaryň irki ýaşdan başlap mekdebe taýýarlygyny üpjün etmekde ata-eneler bilen çagalar baglarynyň arabaglanyşygyny ösdürmek hem-de çagalary başlangyç bilimiň maksatnamasyny özleşdirmäge taýýarlamakda öňdebaryjy halkara tejribesinden, innowasion tehnologiýalardan okuw işinde giňden peýdalanmak» diýen tema boýunça Arkadag şäheriniň 4-nji çagalar bakja-bagynyň terbiýeçisi Güljahan Orazsähedowa dagylar çykyş etdiler.

«Garaşsyz, baky Bitarap Türkmenistan — bedew batly at-myradyň mekany» ýylynyň ilkinji günlerinde geçirilen maslahatyň dowamynda 2025-2026-njy okuw ýylynyň ikinji ýarymynda öňde durýan wezipeler kesgitlendi.

      Arkadag şäheriniň öňdebaryjy pedagogik işgärleriniň gatnaşmagynda «Beýik işler bilime daýanýar, bilim bolsa terbiýe bilen geçmeli gymmatlykdyr» diýen şygar bilen geçirilen maslahatyň ahyrynda oňa gatnaşyjylaryň adyndan Türkmenistanyň Prezidenti Serdar Berdimuhamedowyň adyna Ýüzlenme kabul edildi.

Arkadag şäheriniň 1-nji ýöriteleşdirilen mekdebi